بەزى ئاتا-ئانىلار بوۋاققا سوغۇق ئۆتۈپ قالماسلىق ئۈچۈن، دائىم بالىسىغا يۇڭ پوپايكا، پاختىلىق جىلىتكە قاتارلىقلارنى كىيگۈزۈپ ئۇخلىتىدۇ. ئەمەلىيەتتە بۇنداق قىلىش خاتا بولۇپلا قالماي يەنە بوۋاققا زىيانلىق.

    ئادەتتە ئادەم ئۇخلىغاندا مۇسكۇلنىڭ بوشىشى ئەڭ روشەن بولىدۇ. ئالدى بىلەن كۆز ۋە يۈز مۇسكۇللىرىنىڭ بوشىشى بىلەن كۆز يۇمۇلىدۇ، ئۇنىڭغا ئەگىشىپ پۇت-قول، گەۋدە مۇسكۇللىرى تەبىئىي ھالدا بوشاشقا باشلايدۇ. قانچە ئۇيقۇغا كەتكەنسېرى پۈتۈن بەدەن مۇسكۇللىرىنىڭ بوشىشى شۇنچە مۇكەممەل بولىدۇ.

    ئەگەر ئۇخلاشتىن بۇرۇن بوۋاققا كىيىمنى بەك قېلىن كىيگۈزىۋەتكەندە، بالىنىڭ گەۋدىسىنى ئورىۋالىدۇ-دە، قان ئايلىنىشى ئاستىلاپ، نەپەس ئېلىشى راۋان بولمايدۇ، يەنە ئاسان چۈش كۆرىدۇ، ئويغانغاندا بولسا ئىچى سىقىلىش ھېس قىلىدۇ. بۇ خۇددى چوڭلار ئۇخلىغاندا ئىككى قولىنى مەيدىسىگە قويۇۋالغاندا يۈرەكنى، ئۆپكىنى، قان تومۇرلارنى بېسىۋېلىش بىلەن قارا بېسىش، نەپەس توختاپ قالغاندەك ھېس قىلىش، يەنە ۋارقىراپ جۆيلۈش، ئويغانغاندا بولسا قارا تەرگە چۆمۈش، ئىچى سىقىلىش، قورقۇش ئالامەتلىرى بولغانغا ئوخشايدۇ.

    ئەگەر كىيىم يوتقاننىڭ رولىنى ئۆتىگەندە، بالا ناھايىتى ئاسان زۇكام بولۇپ قالىدۇ. شۇڭا بوۋاقنى ئۇخلىتىشتىن بۇرۇن ئامال بار نېپىزراق كىيىم كىيدۈرۈپ ئۇخلىتىش لازىم. ئادەتتە بىر تال ئىچ مايكا بىلەن بىر تال كالتە ئىشتان، شارائىتى يار بەرسە ئۇخلاش كىيىمى كىيگۈزۈپ ئۇخلىتىش كېرەك.

ئەسلى مەنبە: http://uy.ts.cn/life/content/2015-12/03/content_476701.htm