ئەسسالامۇ ئەلەيكۇم، ھۆرمەتلىك قېرىنداشلار! ئۇيغۇر ئوقۇغۇچى ئىشلىرى كومىتېتى: 2011 – يىلى 3 – ئايدا قۇرۇلۇپ، 9 – ئايدا رەسمى ئىشقا كىرىشتى. كومىتېتىمىز – تۈركىيە جۇمھۇرىيىتى مائارىپ مېنىستىرلىكى، ئالىي مائارىپ كومىتېتى ۋە باشقا مۇناسىۋەتلىك ئورگانلار تەرىپىدىن تەستىقلىنىپ، تۈركىيەدە ئۇيغۇر ئوقۇغۇچىلارنىڭ ئىشلىرىنى ئورۇنلاشتۇرۇش سالاھىيىتىگە ئىگە بىردىنبىر ئورگان بولۇپ، تۈركىيەگە كېلىپ ئوقۇماقچى بولغان ۋە ئوقۇۋاتقان بارلىق ئوقۇغۇچىلارنىڭ ئوقۇ – ئوقۇتۇش، تۇرمۇش ۋە ئىجتىمائىي مۇناسىۋەتلىرىگە ھېچقانداق ئايرىمچىلىق قىلمىغان ئاساستا ياردەم قىلىدۇ. بۇ كومىتېت پەقەت ئۇيغۇر ئوقۇغۇچىلارنىڭ ئىشلىرىنى قىلىپلا قالماستىن، بەلكى يۇرتىمىزدىن كېلىپ، ئوقۇماقچى بولغان قازاق، قىرغىز، ئۆزبەك، تاتار قاتارلىق قېرىنداش مىللەت ئوقۇغۇچىلىرىنىڭمۇ خىزمىتىنى قىلىدۇ.
ئۇيغۇر ئوقۇغۇچى ئىشلىرى كومىتېتىنىڭ ئاساسلىق پرىنسىپى ھەر بىر ئوقۇغۇچىنىڭ ئوقۇش نەتىجىسىنى ئاساس قىلىپ تۇرۇپ، تۈركىيەدە ئوقۇماقچى بولغان كەسىپلىرىگە قاراپ مەسلىھەت بېرىش، تۈركىيەدىكى ئوقۇشىنى غەلىبىلىك پۈتتۈرۈشى ئۈچۈن خاندەلىك (ئوقۇش مۇكاپات پۇلى) تېپىپ بېرىش، ياتاق ئۇقۇشۇش ۋە ئوقۇشى تۈگىگەندىن كېيىن، تېخىمۇ يۇقىرى ئۆرلەپ ئوقۇشى ياكى باشقا دۆلەتلەرگە چىقىپ بىلىم ئاشۇرۇشى ۋە ياكى يۇرتقا قايتىپ خاتىرجەم خىزمەت قىلىشى ئۈچۈن ئىمكانىيەتنىڭ بېرىچە ياردەم قىلىش دېگەندەك ئىشلارنى ئۆز ئىچىگە ئالىدۇ.
كومىتېتىمىزنىڭ ئەڭ مۇھىم خىزمىتىدىن بىرى، ئوقۇغۇچىلارنىڭ (ئوقۇش ئۈچۈن) تۈركىيەگە كېلىشىگە ياردەم قىلىش ۋە تۈركىيە مائارىپ مېنىستىرلىكى ۋە ئالىي مائارىپ كومىتېتى تەرىپىدىن تەسىس قىلىنغان خاندەلىك (ئوقۇش مۇكاپات پۇلى) بىلەن ئوقۇيدىغان ئوقۇغۇچىلارنىڭ تىزىملىكىنى تۇرغۇزۇپ، مۇناسىۋەتلىك ئورگانلارغا يەتكۈزۈپ بېرىش بولۇپ، بۇ ئىشلارنى بۇرۇن باشقا ۋەخپە – جەمئىيەت ۋە تەشكىلاتلار يۈرگۈزۈپ كېلىۋاتاتتى، ئەمما بۇ يىلدىن ئېتىبارەن، تۈركىيەدىكى ئوقۇش ئىشلىرى كومىتېتىمىز تەرىپىدىن بىر تۇتاش باشقۇرۇلىدۇ.
قېرىنداشلىرىمىزنىڭ سەمىگە سېلىپ قويۇشقا تېگىشلىك مۇھىم ئىشلاردىن بىرى شۇكى، تۈركىيە ھۆكۈمىتى مائارىپ مېنىستىرلىكى ۋە ئالىي مائارىپ كومىتېتى تەرىپىدىن تەسىس قىلىنغان خاندەلىك (ئوقۇش مۇكاپات پۇلى) ئالالمىغان ئوقۇغۇچىلار پۈتۈنلەي ئۆز خىراجىتى بىلەن ئوقۇيدۇ. تۈركىيەدىكى ئۇنىۋېرسىتېتلارنىڭ ئوقۇش پۇلى بىر – بىرىدىن پەرقلىق بولۇپ، بەزى مەكتەپلەر يىلىغا 10 مىڭ دوللار ئالسا، بەزى مەكتەپلەر 500 دوللار ئالىدۇ. يەنە بەزى مەكتەپلەر بولسا، ئۇنىڭدىنمۇ ئاز ئالىدۇ ياكى پەقەتلا پۇل ئالماي ئوقۇتىدۇ. بۇ، پۈتۈنلەي ھەر بىر مەكتەپنىڭ تۈزۈمىگە باغلىق ئىش. مۇشۇ سەۋەبتىن، كومىتېتىمىز تۈركىيەدىكى بارلىق ئالىي مەكتەپ بىلەن ئالاقىلىشىپ، ئوقۇغۇچىلارنىڭ ئەمەلىي ئەھۋالىغا قاراپ مەكتەپكە تىزىملىتىش ۋە ئوقۇش ئىشلىرىغا ياردەم قىلىدۇ.
شۇڭا، بۇنىڭدىن كېيىن تۈركىيەگە كېلىپ ئوقۇماقچى بولغان قېرىنداشلارنىڭ بىۋاسىتە كومىتېتىمىز بىلەن ئالاقە قىلىشىنى، يىللاردىن بېرى داۋاملىشىپ كېلىۋاتقان ۋىزا ۋە مەكتەپ ئىشلىرىدىكى قالايمىقانچىلىق ۋە ئالدامچىلىق ۋەقەلىرىنىڭ تەكرارلىنىپ قالماسلىقى ئۈچۈن، باشقا ئورگان ياكى شەخسلەر بىلەن ئالاقە ئورناتماسلىقىنى ئالاھىدە تەۋسىيە قىلىمىز.
ھۆرمەت بىلەن ئۇيغۇر ئوقۇغۇچى ئىشلىرى كومىتېتى
ئالاقىلاشقۇچى كومىتېت كاتىپى سابىرجان كۆكتۇغ
ئالاقىلىشىش تېلېفون نومۇرى: 6657851 – 212 – 0090
يانفون: 5554331836 – 0090
ئېلخەت: info@uyguroku.com
uyguroku@uyguroku.com
بۇ بىر ئوبدان ئىش بوپتۇ. تولىمۇ سۆيۈندۈم. ئاللاھ ئۆزى ئاسانلىق بەرگەي!
بۇ يىلقى ئاسپىرانت ئوقۇغۇچىلارنىڭ مەكتىپىنى قانداق بۆلدىڭلاركىن، نېمىگە ئاساسەن بۆلۈندى، ئاز ساندىكى ئوقۇغۇچىلار نېمىشقا ئىستانبۇلدا قېلىش ئېمكانىيتىگە ئېرىشەلمىدى؟ بۇنىڭ سەۋەبىنى بىلىش ھوقۇقىمىز بارمۇ؟ بار بولسا كىمدىن بىلسەك بولىدۇ؟ قانداق ئالاقىلىشىمىز؟
قېرىنداشلار! شۇنى ئۇنتۇپ قالمايلىكى، ئوقۇغۇچىلارنى شەھەر ياكى مەكتەپكە بۆلۈش بىزنىڭ ھەددىمىز ئەمەس، بۇنىڭغا ھەققىمىزمۇ يوق، ھوقۇقىمىزمۇ يوق. بۇ پۈتۈنلەي ئالىي مائارىپ كومىتېتى (يەنى YÖK)نىڭ ئىشى. مۇشۇ پۇرسەتتىن پايدىلىنىپ، يەنە بىر نەرسىنىمۇ ئەسكەرتىپ قويماقچىمىز، ئوقۇغۇچىلارغا بېرىلىدىغان خاندەلىك (يەنى Milli Eğitim Bursu)مۇ تامامەن شۇلارنىڭ ئىلكىدىكى ئىش. ئەتە – ئۆگۈن بۇ ھەقتىمۇ بىزدىن ھېساب سوراپ يۈرمىگەيسىلەر!
تور بەتنى باشقۇرغۇچى ئەپەندى، يۆكتىن سىلەرنى كۆرسىتىپ تۇرىۋاتسا، بۇ يەردە خەنزۇ پەدىسىگە تېكتاپتوپ ئويناۋاتامسىلەر؟ يۆكتىن ئوقۇغۇچى بۆلۈش، بۇرس تەقسىماتى دېگەنلەردىمۇ ئۇلارنىڭ ئىش قىلىش پىرىنسىپى باردۇ؟ نېمىگە ئاساسەن بولىدۇ بۇ ئىشلار بىزنىڭ بىلىش ھوقۇقىمىز بولار؟يەڭ ئىچىدە ھەممىنى پۈتتۈرۈپ بولۇپ ئاندىن ھېچ ئىشنى بىلمەيدىغان قىياپەتتە يۈرسەڭلار تىللاپ يۈرۈپ چۈشۈرۋەتكەن ھامۇتخاندىن پەرقىڭلار بولامدۇ؟ دېموكراتىك دۆلەتتە دېموكراتېك شەكىلدە ئىش قىلغايسىلەر، ھەممە ئىشنىڭ ئوچۇق-ئاشكەرە، ئادىل بولغۇنى تۈزۈك!
بىز يۇقىردىكى دوستىمىزنى قوللايمىز
ۋەئەلەيكۇم ئەسسالام! پاسپورت دەردىنى ھەممىمىز ئوبدان بىلىمىز. لېكىن بىز بۇ تەرەپتىن ھېچقانداق ياردەم قىلالمايمىز. شۇڭا بىر ئامال قىلىپ، ئۆزىڭىز ھەل قىلىشقا تىرىشىڭ. ھەم مەكتىپىڭىزنى پۈتتۈرۈشكىمۇ خېلى باردەك قىلىدۇ. ئاڭغىچە ھەل بولۇپ قالار دېگەن ئۈمىدتىمىز.