گۇما
يۈرىكىمگە ئويۇلغان نامىڭ
 ۋۇجۇدۇمغا كۆمۈلگەن جىسىمىڭ .

سەن تونۇتقان ئىدىڭ سۆيگۈنى
مەن تالادا تىلسىز يۈرگەندە ،
 بىر قەدىمىي سىھرلىك كۈيسەن
 دەريا مەپتۇن ، تاغلار لال بولغان .
 يۈرەك پارەڭ ياد ئېتەر سېنى
 كۆزلىرى قان ، يۈرىكى ھىجران .
 قۇملار سۆزلەر مەسۇم تورغايدەك
تورغاي كەتكەن ئاخىرقى چۈشكە ،
مەن يەنىلا كۈتۈپخانامدا
ياكى سىدام خەرىتىلەردە
يىلان باغىرى سوزۇلغان شۇ يول
 بارار ئوتتەك يۇرتۇم ، ئەي ، ساڭا .

 شاپتۇل ، قوغۇن مەي بولدى جەزمەن
 دىلىمدىكى غەمكىن ئازابتەك .
ئەتراپىمدا ئادەم دېڭزى
ئۇچرىمايدۇ ھىچكىم خۇشچىراي
 كۆۋرۈك بېشى دوقمۇشىدىكى
چاڭگا ساقال ، بەڭگە قاسساپتەك .
 موجى ، چودا ، كۆكتىرەك ، سايۋاغ
قىززىپ كەتتى بەلكىم قوقاستەك
ئاشۇ ئوتلۇق نەپەسلەر ئارا
 تۇيۇلىمەن ئاخىرقى قاردەك .

ماشنىلار ، ئادەملەر ، تاشلار
يەنە بىر رەت ساختا تەبەسسۇم
 مېنى يوقلاپ تۇرىدۇ ھەركۈن .
قەلىبم ئىزدەر سېنى ھەر دەقىق
روھىم باھار ئىزدەپ يۈرگەندەك .
چىراغ نۇرى غۇۋا شۇ دەمدە
ئۆچمەك بولۇپ تۇرغاندەك يۈرەك .

قەلەمدان قۇرۇقدىلىپ قالغان
ئۈستىلىمنى غىربلىق باسقان ،
مەن ئىلگىرى قاردا ئوينىغان
قار ئۇچقۇنىدەك ياكى سوغۇقتەك
شۇنچە خىرامان .
قاپاقتېرەك يالىڭاچ ئىدى
توپىسىراپ تۇرغان يول بويىدا .
بۈگۈن روھىم ئانىدىن تۇغما
مەن خانەمدە ، قات - قات ئىچىدە .
كۆزلىرىمدىن ئەگىيدۇ ئەگىز
سەن قەيەردە ئەي ، گۇمىلىق قىز !
دەدلىرىمنى كىمگە تۆكىمەن
دەرياغىمۇ ياكى تاشلارغا
چاچلىرمنى يۇلۇپ ساراڭدەك
ئېسىلايمۇ ئاخىرقى دارغا ؟!...

گۇما !
مەن مۇساپىر ئەركە بالاڭمەن
ئوغۇز سۈتىڭگە قانمىغان تېخى .
تېلېفۇن سىمى ياكى چۈمۈلە
خىيالىمنىڭ غەمسىز مېھمىنى
سېنى ئەسلەپ تۇرغان تاڭلاردا
ناخشا ئېيىتقان ياكى ياش تۆككەن .
بىنالاردا ئىزىم قالمىدى
بىنالارغا سۆزلىيەلمىدىم .
بىناۋاغا ئايلاندىم سەنسىز
گۇگۇم ماراپ تۇرغان ئويۇمدا ،
يالىڭئاياغ ، ساددا بالىلار
قارىشىدۇ ماڭا شۇدەمدە
10 يىل بۇرۇنقى ئاشۇ ماكاندا .
مەن ئۇ چاغدا يولنى بىلمەيىتتىم
يولنى دائىم قەبرىستان دەيىتتىم .
دادام ، مەكتەپ ياكى ھويلىمىز
مەندىن بەكمۇ يىراق جايدىكى
چاقناۋاتقان ماي بوياق رەسىم .

[ بۇ يازمىنى ساقلىۋىلىڭ ] :