لوندون نورۇز بايرىمىغا تەكلىپ

سالام ئەلەيكۇم قېرىنداشلار!

ئەنگلىيىدە ياشاۋاتقان ئۇيغۇر جامائىتى سىزنى 20- مارت (يەكشەنبە) لوندوندا ئۇنىۋېرسىتېتىدە ئېلىپ بېرىلىدىغان “ئوتتۇرا ئاسىيا باھار بايرىمى فېستىۋالى” نامىدىكى نورۇز بايرىمىنى تەبرىكلەش پائالىيىتىگە تەكلىپ قىلىدۇ!

بۇ يىللىق “ئوتتۇرا ئاسىيا باھار بايرىمى فېستىۋالى” نامىدىكى نورۇز بايرىمىنى تەبرىكلەش پائالىيىتىگە ئوتتۇرا ئاسىيانى مەركەز قىلغان ھالدا ئەنگلىيىدە ياشايدىغان بارلىق تۈركى دۆلەت ۋە خەلقلىرى قاتنىشىدىغان بولۇپ، ئۇيغۇرلارمۇ بۇ پائالىيەتكە تەكلىپ قىلىنغان.

بۇ قېتىمقى پائالىيەت لوندون ئۇنىۋېرسىتېتى ئىنستىتۇتىنىڭ (UCL Main Quad) ئالدىدىكى مەيداندا 2016- يىلى 20- مارت چۈشتىن كېيىن سائەت 12 دىن كەچ سائەت 5 كىچە ئېلىپ بېرىلىدۇ. بۇ يىللىق نورۇز بايرىمىنى بىرلىكتە تەبرىكلەش ئومۇمىي پائالىيەت پروگراممىسىغا ئەنگلىيىدە يىللاردىن بۇيان ئاكتىپ پائالىيەت ئېلىپ بېرىۋاتقان لوندون ئۇيغۇر ئانسامبىلى شەرەپ بىلەن ئورۇن ئالغان بولۇپ، ئۇلار بۇ سەھنە پۇرسەتلىرى ئارقىلىق ئۇيغۇرلارنىڭ ناخشا- مۇزىكا، سەنئەت ۋە مەدەنىيىتىنى فېستىۋال مېھمانلىرىغا تونۇشتۇرىدۇ. بۇ پائالىيەتنىڭ رەسمى سورۇنىدىن قازاقىستان، قىرغىزىستان ۋە ئۆزبېكىستان دۆلەت ۋە ئاممىۋى جەمئىيەتلىرى قاتارىدا ئەنگلىيىدىكى ئۇيغۇرلارغا ۋاكالىتەن مەخسۇس بىر يايما تەسىس قىلىنغان بولۇپ، بىز بۇ پۇرسەت ئارقىلىق ئۇيغۇرلارنىڭ ۋەتىنى، مەدەنىيەت – سەنئىتى، تارىخى، يېمەك – ئىچمەكلىرى، ئورۇپ – ئادەتلىرى ۋە بۈگۈنكى ھايات ئەھۋاللىرىنى تونۇشتۇرىمىز.

بىز لوندون ۋە ئەنگلىيىنىڭ باشقا شەھەرلىرىدە ياشاۋاتقان بارلىق قېرىنداشلىرىمىزنى يىلدا بىر كېلىدىغان نورۇز بايرىمىنى تەبرىكلەش پائالىيىتىگە قاتنىشىپ بېرىشكە تەكلىپ قىلىمىز.

بىز سىزنى بۇ پائالىيەتكە تەكلىپ قىلىش بىلەن بىرگە سەمىڭىزگە شۇنى سېلىشنى ئىستەيمىزكى ئەگەر سىز ئۇيغۇر بولسىڭىز، ۋەتىنىڭىزنى سۆيسىڭىز، ئۆزىڭىزنىڭ كىملىكىنى ھۆرمەتلىسىڭىز، ئەنگىلىيىدە ئۆزىڭىز بىلەن ئۆزىڭىز ياشاپ، ئۇيغۇر كۆرمەي باشقا مىللەتلەر ئارىسىدا غايىپ بولۇپ كەتمەي، ئۇيغۇر جامائەت توپلىرىنى يىلدا بولسىمۇ بىرەر قېتىم كۆرۈپ تۇراي دېسىڭىز، ھەم مۇشۇ پائالىيەتنى ئەمەلگە ئاشۇرۇش ئۈچۈن ئەجىر سىڭدۈرگەن بىر قانچە قېرىنداشلىرىڭىزنىڭ خالىسانە ئەمگىكىنى قەدىرلەشنى بىلسىڭىز ، سىز بۇ پائالىيەتكە كېلىڭ! بۇ پائالىيەت ھەقسىز، پۇل ئېلىنمايدۇ! سىز بۇنى بىر ئاممىۋىي پائالىيەكەنغۇ دەپ سەل قارىماڭ، بۇ يەنە شۇنداق بىر پائالىيەتكى ئەنگىلىيىدە سانىمىز ئاز بولغان، ئۆز – ئارا ئۇچرىشىش پۇرسەتلىرىمىز ناھايىتى كەم بولۇۋاتقان ئۇيغۇر جامائەت توپىنىڭ ئۇچرىشىشى، ئۆز- ئارا يىل بېشى – نوۋرۇزلۇق سالاملىشىشى، ئۇيغۇر جامائەتچىلىك، كوللېكتىپلىق، ئۇيغۇر مىللىي روھ ۋە ئۆزلۈك ئېڭىنىڭ بىر يەرگە جەم بولۇش سورۇنىدۇر. ئەلۋەتتە لوندون ئۇيغۇر جامائەت توپلىرىنىڭ باشقا قېرىنداش مىللەتلەر بىلەن باراۋەر ھالدا ئاممىۋىي پائالىيەتلەرگە ئاكتىپ قاتنىشىشى، ھەر ۋاقىت ئۆزلىرىنىڭ مەۋجۇتلۇقىنى نامايان قىلىپ تۇرۇشىنىڭ ئۆزىمىزگە ۋە خەلقىمىزگە ئېلىپ كېلىدىغان ئىجتىمائىي ۋە مەنىۋىي ئەھمىيەتلىرى تەسەۋۋۇرىمىزدىن نەچچە ھەسسە كۆپ پايدىلىق بولىدۇ.

يەنە كېلىپ بۇ خىلدىكى ئاممىۋىي پائالىيەتلەرگە لوندوندا ياشاۋاتقان ئۇيغۇر جامائەت توپىنىڭ قاتنىشىشى بۈگۈنكى دۇنيا تەرىپىدىن كۈنسايىن ئۇنتۇلۇۋاتقان ئۇيغۇرلار بېرتانىيەدەك ھەممە ئىمكانلا مەۋجۇت بىر دۆلەتتە ھىچ بىر تەمتىرىمەستىن ئەركىن ھالدا لوندونلۇقلارغا لوندوننىڭ يۈرىكىدىكى بىر ئالىي بىلىم يۇرتىدا، شەھەرنىڭ مەركىزىدە ئۆزىنىڭ ئاۋازنى “بىز ئۇيغۇر!” دەپ ئاڭلىتالايدۇ. ھىچ بولمىغاندا بۇ پائالىيەت بولۇپ ئۆتىدىغان 4 سائەت داۋامىدا بولسىمۇ ئۇيغۇرلار ئۆزىنىڭ دۇنيادا جۈملىدىن ئەنگلىيىدە مەۋجۇت بىر مىللەت ئىكەنلىكىنى نەچچە مىڭ ئادەملەرگە بىلدۇرەلەيدۇ! ئۆز مەدەنىيىتىڭىز نامايان قىلىنىدىغان بۇ بايرام تەنتەنىسىدىن تەبىئىيكى سىزنىڭ، پۈتۈن ئائىلىڭىزنىڭ ۋەتەننى سېغىنىپ چاڭقىغان قەلبىڭىزگە بىر مەھەل بولسىمۇ شادلىق بېغىشلايدۇ! بۇ پائالىيەتكە ئۆزىڭىزگە قوشۇپ ئۆيىڭىزدىن ئۇيغۇرنى تونۇشتۇرۇشقا پايدىلىق ھەرقانداق بىر نەرسە بولسا ھىچ ئىككىلەنمەي ئېلىپ كېلىشىڭىزنى سورايمىز ۋە سىز ئېلىپ كەلگەن ئۇيغۇرغا تەۋە بۇيۇملارنى يايما قىلىپ فېستىۋال ئەھلىگە كۆرسىتىمىز. بۇمۇ ئەلۋەتتە سىزنىڭ خالىس ھالدا ئۇزاقتا قالغان ۋەتىنىڭىزنى، خەلقىڭىزنى سۆيگەنلىكىڭزنىڭ بىر گۈزەل سىماسى بولۇپ قالغۇسى!

قېنى ئۇنداقتا بىزنىڭ ئۇيغۇر تىللىق قېرىندىشىمىز، مىللەتدىشىمىز، ۋەتەندىشىمىز، دىندىشىمىز، سىزنى 20- مارت كۈنىدىكى نورۇز بايرىمى تەنتەنىسىدە كۆرۈشكە نېسىپ بولسۇن!

ھۆرمەت بىلەن ئەنگلىيە “بىز ئۇيغۇر پىدائىيلار” گۇرۇپپىسىدىن.

12- مارت، 2016- يىلى.

پائالىيەت ئورنىنىڭ ئادېرىسى:

University College of London. Gower Street, WC1E 6BT, London

________________________________________________________

лондон норуз байримиға тәклип

салам әләйкум қериндашлар!

әнглийидә яшаватқан уйғур җамаити сизни 20- март (йәкшәнбә) лондонда университетидә елип берилидиған “оттура асия баһар байрими фестивали” намидики норуз байримини тәбрикләш паалийитигә тәклип қилиду!

бу йиллиқ “оттура асия баһар байрими фестивали” намидики норуз байримини тәбрикләш паалийитигә оттура асияни мәркәз қилған һалда әнглийидә яшайдиған барлиқ түрки дөләт вә хәлқлири қатнишидиған болуп, уйғурларму бу паалийәткә тәклип қилинған.

бу қетимқи паалийәт лондон университети институтиниң (укл маин қуад) алдидики мәйданда 2016- йили 20- март чүштин кейин саәт 12 дин кәч саәт 5 кичә елип берилиду. бу йиллиқ норуз байримини бирликтә тәбрикләш омумий паалийәт программисиға әнглийидә йиллардин буян актип паалийәт елип бериватқан лондон уйғур ансамбили шәрәп билән орун алған болуп, улар бу сәһнә пурсәтлири арқилиқ уйғурларниң нахша- музика, сәнәт вә мәдәнийитини фестивал меһманлириға тонуштуриду. бу паалийәтниң рәсми сорунидин қазақистан, қирғизистан вә өзбекистан дөләт вә аммиви җәмийәтлири қатарида әнглийидики уйғурларға вакалитән мәхсус бир яйма тәсис қилинған болуп, биз бу пурсәт арқилиқ уйғурларниң вәтини, мәдәнийәт – сәнити, тарихи, йемәк – ичмәклири, оруп – адәтлири вә бүгүнки һаят әһваллирини тонуштуримиз.

лондон вә әнглийиниң башқа шәһәрлиридә яшаватқан барлиқ қериндашлиримизниң йилда бир келидиған бу норуз байримини тәбрикләш паалийитигә қатнишип беришкә тәклип қилимиз. биз сизни бу паалийәткә тәклип қилиш билән биргә сәмиңизгә шуни селишни истәймизки әгәр сиз уйғур болсиңиз, вәтиниңизни сөйсиңиз, өзиңизниң кимликини һөрмәтлисиңиз, әнгилийидә өзиңиз билән өзиңиз яшап, уйғур көрмәй башқа милләтләр арисида ғайип болуп кәтмәй, уйғур җамаәт топлирини йилда болсиму бирәр қетим көрүп турай десиңиз, һәм мушу паалийәтни әмәлгә ашуруш үчүн әҗир сиңдүргән бир қанчә қериндашлириңизниң халисанә әмгикини қәдирләшни билсиңиз , сиз бу паалийәткә келиң! бу паалийәт һәқсиз, пул елинмайду! сиз буни бир аммивий паалийәкәнғу дәп сәл қаримаң, бу йәнә шундақ бир паалийәтки әнгилийидә санимиз аз болған, өз – ара учришиш пурсәтлиримиз наһайити кәм болуватқан уйғур җамаәт топиниң учришиши, өз- ара йил беши – новрузлуқ саламлишиши, уйғур җамаәтчилик, коллектиплиқ, уйғур миллий роһ вә өзлүк еңиниң бир йәргә җәм болуш сорунидур. әлвәттә лондон уйғур җамаәт топлириниң башқа қериндаш милләтләр билән баравәр һалда аммивий паалийәтләргә актип қатнишиши, һәр вақит өзлириниң мәвҗутлуқини намаян қилип турушиниң өзимизгә вә хәлқимизгә елип келидиған иҗтимаий вә мәнивий әһмийәтлири тәсәввуримиздин нәччә һәссә көп пайдилиқ болиду.

йәнә келип бу хилдики аммивий паалийәтләргә лондонда яшаватқан уйғур җамаәт топиниң қатнишиши бүгүнки дуня тәрипидин күнсайин унтулуватқан уйғурлар бертанийәдәк һәммә имканла мәвҗут бир дөләттә һич бир тәмтиримәстин әркин һалда лондонлуқларға лондонниң йүрикидики бир алий билим юртида, шәһәрниң мәркизидә өзиниң авазни “биз уйғур!” дәп аңлиталайду. һич болмиғанда бу паалийәт болуп өтидиған 4 саәт давамида болсиму уйғурлар өзиниң дуняда җүмлидин әнглийидә мәвҗут бир милләт икәнликини нәччә миң адәмләргә билдурәләйду! өз мәдәнийитиңиз намаян қилинидиған бу байрам тәнтәнисидин тәбиийки сизниң, пүтүн аилиңизниң вәтәнни сеғинип чаңқиған қәлбиңизгә бир мәһәл болсиму шадлиқ беғишлайду! бу паалийәткә өзиңизгә қошуп өйиңиздин уйғурни тонуштурушқа пайдилиқ һәрқандақ бир нәрсә болса һич иккиләнмәй елип келишиңизни сораймиз вә сиз елип кәлгән уйғурға тәвә буюмларни яйма қилип фестивал әһлигә көрситимиз. буму әлвәттә сизниң халис һалда узақта қалған вәтиниңизни, хәлқиңизни сөйгәнликиңзниң бир гүзәл симаси болуп қалғуси!

қени ундақта бизниң уйғур тиллиқ қериндишимиз, милләтдишимиз, вәтәндишимиз, диндишимиз, сизни 20- март күнидики норуз байрими тәнтәнисидә көрүшкә несип болсун!

һөрмәт билән әнглийә “биз уйғур пидаийлар” гурупписидин.

12- март, 2016- йили.

https://www.facebook.com/events/203246383375447

https://www.facebook.com/CASFUK

http://www.uyghurensemble.co.uk/en/?p=615