ئاتا ، بايرىمىڭغا مۇبارەك !

  بىر كۈنلۈك ئىشلىرىمنى تۈگىتىپ بولغاندىن كېيىن ، كونا ئادىتىم بويىچە « بىردەم بولسىمۇ پاراڭلىشىپ ئولتۇرۇپ  كېلەي » دەپ دوستۇم مەرداننىڭ ئۆيىگە قاراپ ماڭدىم . كارىز  سۈيىنىڭ شىلدىرلىغان ئاۋازى بىلەن  قۇشلارنىڭ يېقىملىق سايراشلىرى بىرىكىپ بىرخىل مۇڭلۇق كۈي ھاسىل قىلىپ ، ئادەمگە تەبىئىي ھۇزۇر ئاتا قىلاتتى . تېخى ھېلىلا ئېتىزدىن قايتىپ كەلگەن ئادەملەر مەھەلىمىزنىڭ كوچا دوقمۇشلىرىدا توپ-توپ بولۇشۇپ ، ھاردۇقىنى چىقارغاچ تاماكا چېكىپ ئولتۇرۇشاتتى .
__ ئاداش ، قولۇڭدىكى نىمە ئۇ ؟ __ قولىغا رەڭلىك قەغەزدىن چىرايلىق قىلىپ ئورالغان بىر كىچىك قۇتىنى كۆتۈرگىنىچە ئۆيىگە كىرىپ كېتىۋاتقان مەرداندىن سورىدىم .
__ ئاتامغا بىر سوۋغا  ئالغان  . جۈرە ئۆيگە كىرەيلى __ ئۇ شۇ گەپلەرنى دىگەچ مېنى ئۆيىگە تەكلىپ قىلدى .  مەن مەرداننىڭ كەينىدىن ئۆيگە كىردىم . كىرىپ ھېلىلا ئىشتىن قايتىپ كېلىپ ، تۆردە ئارام ئالغاچ تاماقنىڭ پىشىشىنى ساقلاپ تۇرغان غېنى ئاكام بىلەن قول ئېلىشىپ كۆرۈشتۈم . بىز بۇ يىلقى ھوسولنىڭ قانداق بولىۋاتقانلىقى توغرىسىدا پاراڭلىشىپ  ئولتۇراتتۇق . شۇ ئارىدا مەردان بايىقى كىچىك قۇتىنى ئاتىسىغا سۇنغىنىچە  كۈلۈمسىرەپ سۆزلەشكە باشلىدى :
__ ئاتا ، بايرىمىڭغا مۇبارەك بولسۇن ! ساڭا ئۇزۇن ئۆمۈر ، سالامەتلىك تىلەيمەن !
   بۈگۈن قانداق بايرام ئىكەنلىكىنى ھېچ ئويلىنىپ بىلەلمەي ، ھەيرانلىق  نەزىرىم بىلەن مەردانغا قارىدىم .
__ بۈگۈن « ئاتىلار بايرىمى » ئەمەسمۇ ؟ __ مەردان ماڭا قاراپ چۈشەندۈرگەن تەلەپپۇزدا سۆزلىدى .
   شۇ چاغدا ئۆزۈمنىڭ  نىمە دىيەرىمنى بىلەلمەيلا قالدىم . غېنى ئاكام مەرداننىڭ قولىدىن قۇتىنى ئاستا ئالدى . شۇ چاغدا ئۇنىڭ قوللىرى تىترەپ كېتىۋاتاتتى . بۇ  ئوغلىنىڭ   كىشىلەرنىڭ ئانچە دىققەت-ئېتىبارىنى قوزغاپ كەتمەيدىغان مۇشۇنداق بايرامنىمۇ ئۇنتۇپ قالماي ، ھەتتا  سوۋغات تەييارلىغانلىقىدىن  خۇشال بولغاندىكى تىترەش بولسا كېرەك .  خىجىللىقىمدىن بۇ يەردە ئولتۇرىۋېرىشنى لايىق كۆرمەي ، ئۆيگە قايتىش ئۈچۈن سىرتقا چىقتىم .    شۇ  تاپ  كاللام قۇپقۇرۇق ، كۆزۈمنى بىر نۇقتىغا تىككەن ھالدا كېتىۋاتاتتىم .   ئەگەردە ئاتام ھايات بولغان بولسا ، مەنمۇ مەردانغا ئوخشاش ئاتامغا سوۋغات تەييارلاپ ، بۇرۇنقى جاپالىق كۈنلەرنىڭ شاھىدى بولغان ئەشۇ قورۇق باسقان يۈزلىرىگە سۆيۈپ تۇرۇپ « ئاتا ، بايرىمىڭغا  مۇبارەك بولسۇن ! » دەپ بوينىغا ئېسىلار ئىدىم .  ئىختىيارسىز  كۆزۈمدىن ئىككى تامچە ياش مەڭزىمنى بويلاپ ئېقىپ چۈشتى .  رەھمەتلىك ئاتام بىلەن خىيالىي مۇڭدىشىشقا باشلىدىم  «  ئاتا ، بىرەر قېتىم بولسىمۇ بايرىمىڭنى تەبرىكلەپ قويمىغان ، سېنى كۆپ قېتىم رەنجىتكەن  مېنىڭدەك ئەقىلسىز ئوغلۇڭنى كەچۈرگىن ! بەلكىم ئەشۇ چاغلاردا ساڭا سوۋغات تۇرماق  بىر ئېغىز بولسىمۇ  بايرىمىڭنى تەبرىكلەپ قويغان بولسام سەن قانچىلىك خۇش بولۇپ كېتەر ئىدىڭ – ھە !  توۋا  ، ئادەم دىگەن ئاجايىپ بولىدىكەن . دائىم ئاتا-ئانىمىز  بېرىدا  قەدرىگە يەتمەي ، كېتىپ قالغاندا بولسا  كەينىدىن ئازاپلىنىپ ياش تۆكىدىكەنمىز !  »   .
   ئاتامنىڭ ۋاپات بولغىنىغىمۇ ئالتە يىل بولۇپ قالدى . ئاتام  دائىم باشقىلارغا  ياردەم قولىنى سۇنۇپ ، ئۇلاردىن ھېچنېمىسىنى  ئايىمايدىغان ، پۈتۈن ئۆمرىنى  خەلققە خىزمەت قىلىش ئۈچۈن ئۆتكۈزگەن ھۆرمەتكە سازاۋەر  يېزا كادىرى  ئىدى . يېزىمىزدىكىلەرنى ياخشى تۇرمۇشقا ئىگە قىلىش ئۈچۈن  ئاتام مەيلى قەھرىتان سوغۇق ، تومۇز ئىسسىقلاردا بولسۇن خىزمەت ھەلەكچىلىكىدە ئالدىراشلا يۈرەتتى . شۇ چاغلاردا مەن پەرزەنتلىك مەسئۇلىيىتىمنى  ئادا قىلماقتا يوق  ، ئاتامنى تالاي قېتىم رەنجىتكەنىدىم . ھازىر ئويلىساملا  يۈرىكىم خۇددى يىڭنە سانجىلغاندەك ئاغرىپ  ئازاپلىنىپ كېتەتتىم .  قايسى بىر شائىرىمىز ئۆز شېئىرىدا « مەن ئاتامدىن ئايرىلىپ ، سۇندى قانىتىم  يەنە قايرىلىپ » دېيىلگىنىدەك   مانا ھازىر  تۇرمۇش ھەلەكچىلىكىدە بېشىمدىن نۇرغۇن ئىسسىق- سوغۇقلار ئۆتۈپ ، ئەينى ۋاقىتلاردا  ئاتامنىڭ قانچىلىك جاپا تارتقانلىقىنى ،  « ئاتا » دىگەن بۇ سۆزنىڭ دىمەككە  ئاددىي ئېيتىلسىمۇ  ئەمما ئۇنىڭ ۋەزنىنىڭ شۇنچىلىك ئېغىر ئىكەنلىكىنى ئەمدىلىكتە تونۇپ يېتىۋاتىمەن  .
      « ئاتا » دىگەن بۇ  سۆزنى دېيىشتىن  مەھرۇم قالغان ، سېنى سېغىنىپ  كۆزىدىن ئەمەس  يۈرىكىدىن  يىغلاۋاتقان ئەشۇ  ئوغلۇڭ  ئەمدى بولسىمۇ  بۈگۈنكى بايرىمىڭنى  تەبرىكلىۋالاي  :
  «  ئاتا ، بايرىمىڭغا  مۇبارەك !  ئاللاھ  ،  ياتقان  يېرىڭنى  جەننەتتە     قىلسۇن  !!!  » 
             2009 - يىلى 6- ئاينىڭ 14- كۈنى    تۇرپان
                                 (   تۈگىدى )

مەنبەسى : باس باس توربىكىتى يوللىغۇچى :ھېكمةت