ئالىپايدا ئەمدى باشقىلارنىڭ كارتىسىغا پۇل يۆتكىگىلى بولماسلىقى مۇمكىن

تېڭشۈن پەن-تېخنىكىسىنىڭ 28-ئاۋغۇست خەۋىرى : «غەيرىي بانكا ھەق تۆلەش ئورگىنىنىڭ توردا ھەق تۆلەش كەسپىنى باشقۇرۇش چارىسى (پىكىر ئېلىش ھۆججىتى)» بۈگۈن ئاشكارا پىكىر ئېلىشنى رەسىمىي ئاخىرلاشتۇرىدۇ. بۇ پىكىر ئېلىش ھۆججىتى ئالدىنقى ئاينىڭ ئاخىرىدا مەركىزىي بانكىنىڭ ئورگان تور بېتىدە ئېلان قىلىنغان.

«تارىختىكى ئەڭ قاتتىق» دەپ ئاتالغان بۇ توردا ھەق تۆلەشنى باشقۇرۇش يېڭى بەلگىلىمىسى ئۈچىنچى تەرەپنىڭ ھەق تۆلەش ھېساباتى ئېچىشى، ئىستېمال نورمىسى، ھېساب يۆتكەش ھەمدە پۇل-مۇئامىلە مالىيە باشقۇرۇش قاتارلىق جەھەتلەردە قاتتىق چەكلىمە چىقاردى.

پىكىر ئېلىش ھۆججىتى تۇنجى قېتىم ھەق تۆلەش ئابۇنتلىرىنى «ئۇنىۋېرسال ئابۇنتى» ۋە «ئىستېمال ھېسابات ئابۇنتى» دەپ ئىككى تۈرگە ئايرىدى. ئۇنىۋېرسال ئابۇنت دېگىنى ھەق تۆلەش ھېسابات قالدۇقىنى ئىستېمال، ھېساب يۆتكەش ھەمدە مەبلەغ سېلىش مالىيە باشقۇرۇش مەھسۇلاتى ياكى مۇلازىمىتى سېتىۋېلىشقا ئىشلەتسە بولىدىغان ئابۇنت، ئىستېمال ئابۇنتى بولسا ھەق تۆلەش ھېسابات قالدۇقىنى پەقەت ئىستېمال قىلىش ھەمدە ئۆزىنىڭ بانكا كارتىسىغا پۇل يۆتكىسە بولىدىغان ئابۇنتنى كۆرسىتىدۇ.

پىكىر ھۆججىتى ئابۇنت تىزىملاتقان مەۋھۈم ھېساباتتا تەمىنلىگەن سالاھىيەت ئىسپاتىنىڭ ئاز كۆپلىكىگە قارىتا ئابۇنتنىڭ بىخەتەرلىك دەرىجىسىنى پەرقلەندۈردى.

پىكىر ئېلىش ھۆججىتىنىڭ 17-ماددىسىدا:«ھەق تۆلەش ئورگانلىرى خېرىدار بېجىرگەن بانكا ھېساباتىغا ھەق تۆلەش ھېسابات نومۇرى ئارقىلىق پۇل يۆتكىگەندە، يۆتكىلىدىغان ھېسابات نومۇرى پەقەت ھەق تۆلەيدىغان خېرىدارنىڭ ئۆزىنىڭ بانكا كارتىسى بىلەنلا چەكلىنىدۇ؛ ھەق تۆلەش ھېساباتى ئارقىلىق بانكا كارتىسىغا ھېساب يۆتكىگەندە، پۇل يۆتكىلىدىغان ھېسابات پەقەت خېرىدار ئالدىن بەلگىلەپ قويغان ئوخشاش ئىسىمدىكى بانكا ھېساباتى بولۇشى كېرەك» دېيىلگەن.

مۇبادا بۇ بەلگىلىمە ئىجرا قىلىنىپ قالسا، كېيىن ئابۇنتلار ئالىپاي (جىفۇباۋ) قاتارلىق ئۈچىنچى تەرەپ ھەق تۆلەش ھېساباتى ئارقىلىق باشقىلارنىڭ بانكىسىغا پۇل يۆتكىگىلى بولمايدىغانلىقىدىن دېرەك بېرىدۇ.