ئامېرىكىلىق بىر ھامىلدار ئايال ئوباماغا تەھدىت سالدى

قۇشۇلغان ۋاقتى : 2013/6/16 6:57:08        كۆرۈلىشى: 2367 قېتىم

شىنخۇا ئاگىنتلىقىنىڭ خەۋەر قىلىشىچە، ئامېرىكىدىكى بىر ھامىلدار ئاكتىيور 7-ئىيۇن كۈنى ئامېرىكا زۇڭتۇڭى ئوباما ۋە نىيۇ يورىك شەھىرىنىڭ شەھەر باشلىقى مايكول. بىلومبېرىگقا كانا كەندىرىنىڭ زەھىرى بولغان خەت-چەك يوللىغانلىقى ئۈچۈن ئەيىبلەنگەن.
تېكساسلىق شاننون.رىچاردسون 7-ئىيۇن كۈنى ساقچىلار تەرىپىدىن قولغا ئېلىنىپ، شۇ كۈنى سوتقا ئېلىپ چىقىلغان.
ئامېرىكا تەپتىش ئاپپاراتىنىڭ باياناتچىسى دېۋېلىن.ۋالستون تەپتىش شاننوننىڭ ئالدىنقى ئايدا ئوباما، بىلومبېرىگ ۋە قورال-ياراغنى چەكلەشنى قوللايدىغان بىر كوللىكتىپقا «زەھەرلىك خەت-چەك» يوللاپ، قورال-ياراغ چەكلەشنى قوللىغۇچىلارغا تەھدىت سالغانلىقى ئۈچۈن تەپتىش مەھكىمىسى تەرىپىدىن ئەرز قىلغانلىقىنى دەلىللىدى. ئۇنىڭ دېيىشىچە، ئەگەر جىنايەت تۇرغۇزۇلسا شاننون 10 يىللىق قاماقتا يېتىشى مۇمكىنكەن.
شاننون 35 ياش بولۇپ، بەش بالىنىڭ ئانىسى، ئالتىنچى بالىسىنى بۇ يىل 10-ئايدا يەڭگىشى مۇمكىن. ئۇنىڭ قىسقىچە تەرجىمىھالىدا كۆرسىتىلىشىچە ئۇ «قانخور ئالۋاستىنىڭ كۈندىلىك خاتىرىسى» ۋە «تىرىك جەسەت» قاتارلىق تىلىۋىزىيە تىياتىرلىرىدا قوشۇمچە روللارنى ئالغان.
تەكشۈرگۈچى خادىملار ئامېرىكا ئاگىنتلىقىنىڭ مۇخبىرلىرىغا مۇنداق دېدى: «شاننون نەچچە كۈن بۇرۇن دىلو مەلۇم قىلىپ، يولدىشى ناسانېئىل.رىچاردسوننىڭ ھەرىكەتلىرىنىڭ گۇمانلىق ئىكەنلىكىنى، ‹زەھەرلىك خەت-چەك› گە چېتىشلىق بولىشى مۇمكىنلىقىنى ئېيتقان».
ناسانېئىلنىڭ بىر ئاقلىغۇچىسىنىڭ دېيىشىچە، ناسانېئىل بۇنىڭدىن بۇرۇن شاننون بىلەن ئاجرىشىشنى تەلەپ قىلغان بولۇپ، ئۇ زىيانكەشلىككە ئۇچرىغان بولىشى مۇمكىنكەن.