پاكىستان پروگراممېرلار بازىرى دۇنيا IT ساھەسىدە ئۈچىنچى ئورۇنغا ئۆتتى

قۇشۇلغان ۋاقتى : 2015/8/15 16:37:11        كۆرۈلىشى: 683 قېتىم

جۇڭگو ئاخبارات تورى 14- ئاۋغۇست خەۋىرى : ئامېرىكا «نيۇ يورك ۋاقىت گېزىتى» تور بېتى 8- ئاينىڭ 10- كۈنى «پاكىستان يېڭى بىر ئەۋلاد يۇمشاق دېتال مەركىزى بولالامدۇ» دېگەن تېمىدا خەۋەر بەرگەن. كشىلەر ئادەتتە پاكىستاننى ھەرگىزمۇ IT ساھەسىدىكى كۈچلۈك دۆلەت دەپ قارىمايدۇ. پاكىستاننىڭ IT تىجارىتىدىكى بازار ئۈلۈشى پەقەتلا 2 مىلىيارد 800 مىليون ئامېرىكا دوللىرى بولۇپ، بۇنىڭ ئىچىدە تېخنىكا، IT مۇلازىمىتى ۋە يۇمشاق دېتال ئېكىسپورت قىلىش قاتارلىقلار 1 مىليارد 600 مىليون ئامېرىكا دوللىرىنى ئىگەللەيدۇ. بۇ سان تەخمىنەن 3 تىرىليون 200 مىليارد ئامېرىكا دوللىرىلىق دۇنيا IT بازىرىغا نىسبەتەن تولىمۇ كىچىك بىر ئۈلۈشنى ئىگەللەيدۇ، ھەتتاكى يىللىق ئېكىسپورت مىقدارى 100 مىلىيارد ئامېرىكا دوللىرى بولغان ھىندىستانغىمۇ سېلىشتۇرغىلى بولمايدۇ.

ئەمما يېقىندىن بۇيان پاكىستاننىڭ IT ساھەسى ئەركىن پروگراممېرلار ۋە ئەقلىي ئىقتىدارلىق يانفون ئەپ تەتقىقاتچىلىرى ئۈچۈن بىر شادلىق باغچىسى بولۇپ قېلىۋاتىدۇ. نۆۋەتتە پاكىستاندا رويخەتكە ئالدۇرغان IT شىركەتلىرى 1500 دىن ئاشىدىغان بولۇپ، ھەر يىلى 10 مىڭدىن ئارتۇق ئوقۇش پۈتتۈرگەن ئوقۇغۇچى بازارغا كىرىدۇ. پاكىستاندىكى داڭلىق ئۇنىۋېرسىتېتلاردا ئوقۇۋاتقان ئوتتۇرا قاتلام بۇرژۇئا ئائىلىسىدىن كېلىپ چىققان ياشلار مارافونچە پائالىيەت، ئىگىلىك تىكلەش كۆرگەزمىسى، ئالىي مەكتەپلەردىكى رەقەملەشكەن كەسىپلەرنىڭ باشلىقلار يىغىنى، كارخانىچىلار مۇنبىرى، يۇمشاق دېتال شىركىتى ۋە ئۇچۇر- تېخنىكا جەمئىيىتى قاتارلىقلاردا تېخنىكا بىلەن چېنىقتۇرىلىدۇ.

پاكىستاندىكى ئەركىن پروگراممېرلارنىڭ ھەممىسى Upwork، fiverr.com قاتارلىق سۇپىلارغا كېلىدىغان بولۇپ، بۇ سۇپىلاردا ئامېرىكا، ئاۋسترالىيە ۋە ئەنگىلىيەدىن كەلگەن رەقەملەشكەن كەسپلەردىكى خوجايىنلار پروگراممېرلارنى ۋە ئەپ تەتقىقاتچىلىرىنى ياللاپ ئىشلىتىدۇ. بۇ ئەندىزىنىڭ ھەقىقەتەنمۇ ئۈنۈمى كۆرۈلدى. يەنى پاكىستان پروگراممېرلار ساھەسى پۈتۈن دۇنيادا ئىككى يىل ئىلگىرىكى بەشىنچىلىكتىن بىراقلا ئۈچىنچى ئورۇنغا ئۆتۈپ، بۇ ساھەدە ئامېرىكا ۋە ھىندىستاندىن قالسىلا ئەڭ كۈچلۈك بولۇپ قالدى.

ئىككى ئامىلنىڭ پاكىستاننىڭ يېقىندىن بۇيان ئۇچۇر- تېخنىكا رىقابىتىدە تېز باش كۆتۈرىشىگە چوڭ ياردىمى بولدى. ئادەتتە كىچىك تىپتىكى تېخنىكا شىركەتلىرى كۈچلۈك تەۋەككۈلچىلىك روھىغا ئىگە چەتئەل مەبلەغچىلىرى بىلەن ئۇزۇن مەزگىللىك مۇناسىۋەت ئورنىتىشقا تىرىشچانلىق كۆرسىتىدۇ. نەتىجىدە قابىلىيەتلىك ۋە ئىشەنچلىك ئىگىلىك تىكلىگۈچىلەر مۇشۇ خىل يول بىلەن مۇۋەپپەقىيەتكە ئېرىشىدۇ.

ئۇنىڭدىن باشقا ئۆتكەن بەش يىلدا خەلقئارا ئۇچۇر- تېخنىكا ساھەسىدىكى سودا ئەندىزىسى پاكىستاندا غايەت زور ئىسلاھاتلارنى باشتىن كەچۈردى. مىكروسوفت قاتارلىق پىشقەدەم ۋە چوڭ شىركەتلەر ئەمدى ياللاش خىراجىتىنى مۇرەككەپ ۋە چوڭ تىپتىكى پاكىستان شىركەتلىرىگە سېلىپ كۆپ يىللىق يۇمشاق دېتال كەسپىنى ھۆددىگە ئېلىشقا ئېھتىياجلىق بولماي قالدى. مۇتەخەسىسلەرنىڭ بىلدۈرىشىچە، چەتئەل شىركەتلىرى ھازىر پۈتۈنلەي ئۈمىدىنى 3- 4 نەپەر ياش پروگرامما تۈزگۈچىلەردىن تەشكىل تاپقان كىچىك شىركەتلەر ۋە «ئامبار ۋە ياتاق ئۆي»لەردە ئەپ ياسايدىغانلارغا باغلىماقتا.