Salam URUMQI :: سالام ئۈرۈمچى :: 乌鲁木齐综合娱乐网 :: 萨拉慕乌鲁木齐 :: 维吾尔综合门户网:: 新疆维吾尔文化::

 جېنىم ئۈرۈمچى

شەھلا

ئۇيغۇرنىڭ يۈرىكىدە يىغلار ئۈرۈمچى،
تۈن كۈننىڭ پاسىلىدا تۈنەر ئۈرۈمچى .
ئۆلۈمنى ئويلىساڭ « گۈلساي» غا بارغىن ،
قەبرىلەر قېتىدا تۈگەر ئۈرۈمچى .
ئۇ شۇنداق شاۋقۇنلۇق ھايات ،
«ئىتتىپاق»نىڭ ئالدىدا كۆيىدۇ كاۋاپ.
بىر چاغلار قان بىلەن يۇيۇلغان يولنى ،
ساناقسز ئەرۋاھلار قىلىدۇ تاۋاپ .
«بۇغدا» نىڭ ئېتەكلىرى سېلىنجا ئۇنىڭغا .
«قىزىلتاغ» نەئۈچۈن قىزىل دىمەيلى !
كۈجىنىڭ كۈللىرى ياققاندا يامغۇر ،
ئايلانغان پاتقاققا رەڭلىگەن تاغنى .
ھەر سەھەر سۈكۈتتە تۇرغان ئىككى تاغ ،
سۆيەلمەس ئەبەتكە بۇلۇتنى ئۇلار .
«يامالىق » ھەسرەتتە بېرىدۇ سالام ،
«ئۆستەڭ» دە جاۋاپقا چىقالماس سۇلار .
ناسوستا ياشارغان سىز كۆرگەن باغلار ،
چۈنكى سۇلار قۇرىدى نىۋاق .
كۆك ئاسمان ئىس ئىچرە كۆرۈنەر ئاپپاق ،
تومۇزدا بىر بۇۋاي كەيگەندەك تۇماق .
ئەلمىساقتىن ئۈنگەندەك يەردىن ،
توپىرەڭ تاملىرى ئالتۇنمۇ كۈمۈش؟
«كاتتا بازار» كىچىك بىر ۋەتەن ،
تۇنۇش چىراي ، تىنىقلار تۇنۇش .
تۈن ئاسمىنى ياققاندا چىراق ،
ئەگىپ باقتىم «كونسول» نى ياياق  .
ئاچچىق، تاتلىق جېنىم ئۈرۈمچى ،
دىلخانەمگە تاشلىدى پىراق .
«بۇلاق بېشى» دا قاينايدۇ ھايات ،
«ئاق مەسچىت» كە قوشنىدۇر « قۇتاد».
بۇ كوچىلار قېنىمدۇر ، جېنىم ،
چۈنكى ساپلىقى يىگىرمە تۆت كارات .
« شامالباغ» ئاخىرقى بىر يول ،
ھامان بىر كۈنى قەبرىگە تۇتاشقان.
تۇغۇلدۇق، ياشىدۇق ، قانمىدۇق بىراق ،
تارتىشقان قاراقتا قاتقان ئۈرۈمچى...

مەنبە :مېھرى ئاي دۇنياسى شەھلا يازمىسى