شائىرىمىز نىمشىھىت ھەققىدە نىمىلەرنى بىلىسىز؟

ئاتىكەم

مەرھۇم   شائىرىمىزنىڭ  ھاياتى توغرىسىدا  ئەتراپلىق  بىلىمگە   ئىگە  قىلغۇدەك  ئىسىل  تىما  ئىكەن  .

كۈلكە

شۇنداق ياخشى تىما ئەكەپسىز كۆپ تەشەككۈر .
مەرھۇم شائىر نىمشىھىت ئارمىيە ئېلى سايرامىدىن پۈتۈن خەلقىم پەخىرلىندۇ .

abduweli

خاككىر يوللىغان ۋاقتى  2014-5-21 13:54
سىزسىمۇ شۇ رەسىمگە چۈشكەندەك جىم تۇرغاندا ئاندىن سىز ...

ھى ھى .... جىم تۇرۇپ بەرمىسىمۇ ئېسىل سىزىپ قۇيدىغانلار بار دەيمەن ، تەسۋىرگە باي

كۈلكە

مەرىپەتپەرۋەر شائېر نېمشىھىت ئەرمىيە ئېلى سايرامىنىڭ ھاياتى
ۋە ئىجادىي قول يازما ئەسەرلىرى

     ئۇيغۇر خەلقىنىڭ سۆيۈملۈك پەرزەنتى، ۋەتەنپەرۋەر شائىر، مەرىپەت پېشۋاسى، ھارماس كۈيچى، 20 – ئەسىردە ۇيغۇر خەلق ئېغىز ئەدەبىياتىنى توپلاش ۋە رەتلەشنىڭ باشلامچىلىرىدىن بېرى ئەرمىيە ئېلى سايرامى نېمشېھىت (1906 — 1972) باي ناھىيەسىنىڭ سايرام يېزىسىدا ئېلى ئاخۇن ئىسىملىك بىر مەرىپەتپەرۋەر دېھقان ئائىلىسىدە تۇغۇلغان. ئۇ ئۆز يېزىسىدىكى دىنىي مەكتەپتە ساۋادىنى چىقارغاندىن كېيىن 1922 — 1930 – يىللىرىغىچە باي ۋە كۇچا ناھىيەلىرىىدكى مەدرىسلەردە ئوقۇغان. 1930 – يىلى قەشقەردىكى «خانلى مەدرىسە»دە ئوقۇغان. 1933 – يىلى قەشقەردە مىلىتارىست چىڭ شورىننىڭ مۇستەبىت ھۆكۈمرانلىقىغا قارشى دېقھقانلار قوزغىلىڭى پارتلىغاندا شائىر بۇ قوزغىلاڭغا قاتنىشىپ بۇ جەڭدە بوينىغا ئوق تېگىپ ئېغىر يارىلانغان. شۇنىڭدىن كېيىن يازغان شېئىرلىرىنى «نېمشېھىت» دېگەن ئەدەبىي تەخەللۇس بىلەن ئېلان قىلغان. شائىر شۇ قېتىملىق ھادىسىدە تېنى ئاجىزلاپ كەتكەچكە يۇرتىغا قايتىپ بىر مەزگىل داۋالانغاندىن كېيىن باي ناھىيەسىنىڭ قېيىر دېگەن تاغلىق كەنتىدە يېڭى قۇرۇلغان پەننى باشلانغۇچ مەكتەپتە ئوقۇتقۇچىلىق قىلغان. 1936 – يىلى «ئاقسۇ ئۇچۇرى» گېزىتىنىڭ تەھرىرلىكىگە تەكلىپ قىلىنىپ تا 1945 – يىلىغىچە شۇ يەردە ئىشلىگەن. 1945 – يىلى 8 – ئايدا ئۈچ ۋىلايەت ئىنقىلابىنىڭ جەنۇبقا يۈرۈش قىلىش ئارمىيەسى باينى ئازات قىلغاندا نېمشېھىت چەكسىز خۇشاللىققا چۆمۈپ ئارمىيەگە قاتنىشىپ «قوماندانلىق ئىشتاب»نىڭ تەشۋىقات، مەدەنىي ئاقارتىش ئىشلىرىغا مەسئۇل بولغان. 1949 – يىلىغىچە ئۈچ ۋىلايەت ئىنقىلابى ۋاقىتلىق ھۆكۈمىتى تەۋەسىدىكى مەتبۇئات ئورۇنلىرىدا ئىشلىگەن. يېڭى جۇڭگو قۇرۇلغاندىن كېيىن تۈرلۈك خىزمەتلەرنى ئىشلەپ، 1972 – يىلى ئۆز يۇرتىدا ۋاپات بولغان.
نېمشېھىت يىتۈك شائىر. ئۇ ئۆز ھاياتىدا كۆپلىگەن سەر خىل شېئىرلارنى يېزىپ، خەلقنى، ۋەتەننى، ئىلىم – پەننى، ھەق – ئادالەتنى مەدھىيەلىگەن.
نېمشېھىت ئۇيغۇر يېقىنقى زامان مەدەنىيەت تارىخىدا خەلق ئېغىز ئەدەبىياتىغا دائىر ئەسەرلەرنى توپلاش، رەتلەش، مەتبۇئاتتا جامائەتچىلىك بىلەن يۈز كۆرۈشتۈرۈش جەھەتتە ئەڭ دەسلەپ مېھنەت سىڭدۈرگەن مەدەنىيەت پېشۋاسى ئىدى. شائىرنىڭ شېئىرلىرىدا تىل ئالاھىدىلىكى، ئۇسلۇبى روشەن ئىپادىلىنىپ تۇرىدۇ. چۈنكى نېمشېھىت خېلى بۇرۇنلا ئۇيغۇر خەلق ئېغىز ئەدەبىياتىنى توپلاشقا كىرىشىپ بىر قىسىم ئەپسانە، رىۋايەت ۋە چۆچەكلەرنى توپلاپ رەتلىگەن.
خەلقنىڭ مەنىۋى مەدەنىيىتىگە چوڭقۇر ھېرىسمەن بولغان شائىر «موللا تاپقاق ئاخۇنۇم»، «يىلان مۈڭگۈزى»، «شىتىلە بىلەن پىتىلە»، «زېرەك بىلەن زېرىككەك»، «دات»، «ئۇچقان ئادەم»، «ھۈنەرنىڭ خاسىيىتى» قاتارلىق چۆچەكلەرنى توپلاپ، رەتلەپ ئېلان قىلدۇرغان. «موللا تاپقاق ئاخۇنۇم» ناملىق چۆچەكلا «قوناق ئۇنى بايۋەچچە»، «كىگىز كىتاب بايۋەچچە»، «موللا تاپقاق ئاخۇنۇم»، «موللا تاپقاق ئاخۇنۇم ۋە ئۇنىڭ كەشى»، «يېپىشىۋالغان تەلەي»، «موللا تاپقاق ئاخۇنۇمنىڭ ئەڭ چوڭ كارامىتى»، «كۈتۈلمىگەن غەلىبە» قاتارلىق يەتتە پارچە چۆچەكتىن تەركىب تاپقان بولۇپ، بۇ ئەسەر 1946 – يىلى شائىرنىڭ ئۆز خىراجىتى بىلەن غۇلجا مەتبەئەسىدە رەسىملىك كىتاب قىلىپ تۈزۈلۈپ، نەشر قىلىپ تارقىتىلغان. «يىلان مۈڭگۈزى» دېگەن چۆچەك بولسا «باش پىشۇرۇش»، «سودىگەرچىلىك»، «پادىشاھلىق»، «سوقۇش ھەم جادۇگەرلىك» قاتارلىق چۆچەكلەردىن تەركىب تاپقان. بۇ چۆچەك 1949 – يىلى مارتتا غۇلجىدا «ئىتتىپاق» ژۇرنىلىدا ئېلان قىلىنغان. بۇ چۆچەكلەر شىنجاڭدا ھازىرقى زامان ئۇيغۇر تىلىدا، يېڭى زامان مەتبەئەسىدە ئېلان قىلىنغان دەسلەپكى ئۇيغۇر خەلق چۆچەكلىرى بولۇپ، يۇقىرى قىممەتكە ئىگە. يۈكسەك خەلقچىللىق ھەم ئىلغار دۇنيا قاراشقا ئىگە شائىر نېمشېھىتنىڭ «موللا تاپقاق ئاخۇنۇم» ناملىق چۆچەكنى ئەينى دەۋردە ئۆز خىراجىتى بىلەن نەشر قىلدۇرۇشى كىشىنى ئويغا سالىدۇ ۋە قاتتىق تەسىرلەندۈرىدۇ.
شائىرنىڭ خەلق ئەپسانە، رىۋايەتلىرىدىن «لەيلى ۋە مەجنۇن»، «مىڭ ئۆي ۋە پەرھات شېرىن» ناملىق ئوپىرا ۋە داستانلىرى مۇھىم ئورۇن تۇتىدۇ.
نېمشېھىت ئازاتلىقتىن بۇرۇن ئاقسۇدا ئىشلەپ ئىجادىيەت بىلەن شۇغۇللىنىپ يۈرگەن مەزگىلدە «لەيلى ۋە مەجنۇن» داستانىنىڭ خەلق ئىچىدىكى بىرنەچچە خىل ۋارىيانتلىرىنى توپلاپ، شۇ ئاساستا «لەيلى ۋە مەجنۇن» ئوپېراستىنى يېزىپ چىققان ھەم بۇ ئوپېرا سەھنىلەردە ئويلىنىپ كۆرەرمەنلەرنىڭ قىزغىن ئالقىشىنى قوزغىغان. ئەپسۇسكى ئوپېرانىڭ تولۇق نۇسخىسى «مەدەنىيەت زور ئىنقىلابى»نىڭ قالايمىقانچىلىقىدا يوقىلىپ كەتكەچكە، يېڭىدىن نەشر قىلىنغان «نېمشېھىت ئەسەرلىرى»گە ئۇنىڭ پەقەت ئۈچ پەردىسىلا كىرگۈزۈلگەن.
شائىر يەنە زامان – زامانلارىدن بۇيان تارقىتىپ خەلق ئارىسىدا چوڭقۇر تەسىر پەيدا قىلىپ كەلگەن مەشھۇر «پەرھات ۋە شېرىن» توغرىسىدىكى رىۋايەتلەرنىڭ تۈرلۈك ۋارىيانتلىرى بىلەن ئۇچرىشىپ ھەمدە ئەلشىر نەۋائى قاتارلىق كىلاسسىك شائىرلارنىڭ شۇ ناملىق داستانلىرىدىن ئىلھاملىنىپ «مىڭ ئۆي ۋە پەرھان شېرىن» ناملىق داستاننى يېزىپ 1945 – يىلى «ئاقسۇ گېزىتى»دە ئېلان قىلدۇرغان. بۇ ئەينى زاماندا جامەئەتچىلىك ئارىسىدا كۈچلۈك تەسىر پەيدا قىلغان. شائىر نېمشېھىت بۇ داستاننى قايتا – قايتا ئىشلەپ «ئىلى گېزىتى»دە يەنە بىر قېتىم ئېلان قىلغان. كېيىن ئۇنى يازغۇچى زۇنۇن قادىرنىڭ تەشەببۇسى بىلەن ئۆز يېنىدىن پۇل چىقىرىپ ئۈچ مىڭ نۇسخا باستۇرۇپ تارقاتقان. ئاقسۇدا يېرىم يولدا ئۈزۈلۈپ قالغان «مىڭ ئۆي ۋە پەرھان شېرىن» ئوپېراسىنى يېزىپ پۈتكۈزۈپ «لەيلى ۋە مەجنۇن» ئوپېراسى بىلەن بىرلىكتە ئىلى سەھنىلىرىدە ئامما بىلەن يۈز كۆرۈشتۈرۈلگەن.
شائىر نېمشېھىت يەنە «يۈسۈپ – زۇلەيخا» ناملىق داستانىنىمۇ يازغان. بۇ يۇقىرىقى ئىككى ئەسەرگە ئوخشاش ئاشىق – مەشۇقلۇق توغرىسىدىكى خەلق قىسسىسى بولۇپ، شائىر ئۇنىڭدىن ئۈنۈملۈك پايدىلانغان.
نېمشېھىتنىڭ خەلق ئەدەبىياتىغا بولغان قىزغىن مۇھەببىتى شائىر قەلبىنىڭ خەلققە تولىمۇيېقىن ئىكەنلىكىنى، خەلقتىن ئېلىپ خەلققە قايتۇرۇش، ئەمگەكچى خەلقنىڭ مەنىۋى مىراسلىرىنى ساقلاپ، ئۇنى تېخىمۇ نۇرلاندۇرۇشقا بولغان ئىنتىلىشنى تولۇق نامايان قىلىپ بېرىدۇ. بىز بۇلارنى تىلغا ئالغىنىمىزدا شائىرنىڭ ئاشۇ قىيىن ۋە مۇرەككەپ شارائىتتا چىدام ۋە غەيرەت بىلەن ئىشلەپ، بىر قاتار ئەسەرلەرنى قالدۇرۇپ كەتكەنلىكى بىزنى چەكسىز ئىلھاملاندۇرىدۇ.
بۈگۈنكى كۈنگە كەلگەندە نىمشېھىت توغرىسىدا خاس تەتقىقات ئېقىمى شەكىللەندى.ئۇنىڭ   ئەسەرلىرى ئۈرۈمچىدە بىرقانچە نۆۋەت نەشر قىلىندى.يەنە ئۇيغۇرچە-خەنزۇچە سېلىشتۇرما نۇسخىسى ئىشلىنىپ بۈۋىھەجەر ئەرمىيەنىڭ نەشرگە تەييارلىشى بىلەن«نىمشېھىت شېئىرلىرى»دېگەن مەۋزۇ ئاستىدا 2011-يىلى شىنجاڭ ياشلار ئۆسمۈرلەر نەشرىياتى تەرىپىدىن نەشر قىلىندى.       ئۇنىڭ تەرجىمىھالى ۋە ئەسەرلىرى توغرىسىدىكى بايانلار ئىمىنجان ئەھمىدى تەرىپىدىن يېزىلىپ، شىنجاڭ خەلق نەشرىياتى تەرىپىدىن 1996-يىلى نەشر قىلىنغان«ئۇيغۇر ئەدەبىياتى تارىخىدىكىدىكى نامايەندىلەر»،ئازات سۇلتان،جاڭ مىڭ، نۇرمۇھەممەد زامان قاتارلىقلار تەرىپىدىن يېزىلىپ ،شىنجاڭ ئۇنىۋېرىسىتىتى نەشرىياتى تەرىپىدىن 2001-يىلى خەنزۇچە نەشر قىلىنغان «20-ئەسىر ئۇيغۇر ئەدەبىياتى تارىخى» قاتارلىق كىتاپلاردا ۋە«ھازىرقى زامان ئۇيغۇر ئەدىپلىرى» (ئابلىمىت ئىسمائىل، مەھمۇدجان ئىسلام قاتارلىقلار يازغان،شىنجاڭ خەلق نەشرىياتى تەرپىدىن 1993-يىلى نەشر قىلىنغان)، «20-ئەسر ئۇيغۇر ئەدەبىياتى تارىخى» (پروفىسسۇر ئازات سۇلتان،جاڭ مىڭ ۋە دوتسىنت نۇرمۇھەممەد زامان قاتارلىقلار تەرىپىدىن يېزىلىپ،شىنجاڭ ئۇنىۋېرىسىتىتى نەشرىياتى تەرىپىدىن 2001-يىلى خەنزۇچە نەشىر قىلىنغان)،«ئۇيغۇر ئەدبىياتى تارىخى» (4-توم،ئازات سۇلتان،كېرىمجان ئابدۇرېھىملار يازغان، مىللەتلەر نەشرىياتى 2006-يىلى نەشر قىلغان)قاتارلىقلارغا   كىرگۈزۈلگەن.
يەنە «جۇڭگودىكى ئاز سانلىق مىللەتلەرنىڭ مەدەنىيەت تارىخى»(2000-يىلى مىللەتلەر نەشرىياتي خەنزۇچە نەشر قىلغان)،«جۇڭگو ئاز سانلىق مىللەت قەھرىمانلىرى شەجەرىسى»(2000-يىلى گەنسۇ خەلق نەشرىياتى خەنزۇچە نەشر قىلغان)قاتارلىق قامۇسلاردىن ئورۇن ئالدى.قىرغىزىستان پەنلەر ئاكادىمىيىسىدىن پرۇفىسسۇر ئەزىز نارىنبايۇۋ يازغان«ئۇيغۇرىسكى مىسلېتىلى»(1995-يىلى پىشكەكتە روسچە نەشر قىلىنغان)ناملىق كىتابىنىڭ 106-116-بەتلىرىدە ۋە «ئىزراخخى پروزۋېدېنىيە»(2004-يىلى پەشكەكتە روسچە نەشىر قىلىنغان)ناملىق كىتابىنىڭ 541-550-بەتلىرىدە نىمشېھىت ۋە ئۇنىڭ ئىجادىيىتى ھەققىدە مەخسۇس توختىلىپ ئۆتكەن ۋە ئۇنىڭ شىئىرىي ئەسەرلىرىگە يۇقۇرى باھا بەرگەن.

مەنبە :يېشىل ئارال مۇنبىرى ( شۇ مۇنبەر ئەزاسى مەرىپەت ئوغلى تەمىنلىگەن )

كۈلكە

نىمشېھىت غەزەللىرى


بىلىم ئىشقىدا

جاھان رەنالىرى ئىچرە بىلىمدەك بىر گۈزەل يار يوق،
بىلىمدىن ئۆزگە تۇتقان يار  بولۇر ئۇ گاھىدا بار-يوق.

قارا قاشلىق ،تولۇن ئايلار ساڭا بىر نەچچە كۈن يولداش،
ئەگەر سەن پۇلدىن ئايرىلساڭ ،سېنى تاشلايدۇ ،ھېچ ئار يوق.

كىرىپ كەينىگە نەپسىڭنىڭ بىلىمدىن ئۆزگە يار تۇتساڭ،
بېشىڭغا چۈشەر بىر كۈنلەر ،ئۇ چاغدا سە كەبى خار يوق.

پاراغەت ئىزدىسەڭ،ئەسلا  بىلىمدىن ئۆزگە يار تۇتما،
سېنىڭ قەدرىڭنى ساقلاشتا بىلىمدەك ياخشى ھەمكار يوق.

ھاياتلىقتا بىلىم قانداق كىشىنىڭ يولدىشى بولسا،
قەيەرگەب بارسا باش قاتماس،بىلىمدەك   ئاڭا غەمخار يوق.

بىلىمسىز ساق تېنىڭ مەجروھ،ھەمىشە نالە-پەريادتا،
جاھان ئىچرە بىلىمسىزنىڭ دىلىدەك ئەسكى بىمار يوق.

بىلىمگە ئاشىنا بولساڭ، ئوقۇش  ئىشقىدا بۇلبۇل بول،
ئۆگەنمەككە مائارىپ باغچىسىەك ياخشى گۈلزار يوق.

چاپان بىرلە ئۆزۈڭنى پارقىراتساڭ بىر بوياقچىسەن،
بىلىم ئەسىرى بۈگۈن،سىرلىق چاپانلاغا خېرىدار  يوق.

بىلىمدىن ھەممە ئىش روياپقا چىققان بىر ئەسىردۇر بۇ،
بلىش لازىمكى بۇ كۈندە بلىمسىزلەرگە خۇشتار يوق.

ئەجەپلەنمە بىلىم نۇرىدا نۇرلانسا كىشى كۆڭلى،
ئۇنىڭغا كۆكتە ،سۇدا،تاغ،دېڭىزدا يۈرسە دىشۋار يوق.

ئۆزۈڭنى نىمشېھىت ئۇشبۇ پىكىرگە ئەيلىگىن قۇربان،
بىلىمدىن رىشتە ئۈزگەنلەر كەبى قاتتىق گۇناھكار يوق.

كۈلكە

شۇم پەلەك

   (مۇسەددەس)
نېمشىھىت

پاتتى كۆكسۈمگە زەھەر تىرناقلارىڭ، ئەي شۇم پەلەك،
ئۇردى قانلىق قامچاسىن ئالچاقلارىڭ، ئەي شۇم پەلەك،
قاقشتىپ يۇتتى مەنى پاتقاقلارىڭ، ئەي شۇم پەلەك،
ئالدى گۈل كەينى تىكەن-يانتاقلارىڭ، ئەي شۇم پەلەك،
قان شوراپ چاقتى - زۈلۈك چاققاقلارىڭ، ئەي شۇم پەلەك،
ھەر قەدەمدە مىڭ تۇزاق-قىلتاقلارىڭ، ئەي شۇم پەلەك.

قايسى بىر نەس كۈنىكىم مەن تۆرەلدىم زىمىنگە؟!
قايسى بىر دۇنيا جەھەننەم ئوخشاغاي بۇ تۈرمىگە؟!
قان يۇتۇپ ھەر دەم زەھەر-زەقۇم يەدىم مەن كۈنىگە،
مىڭ ئۆلۈپ، مىڭ يول تىرىلدىم چەرخى بىدات زۇلمىگە.
باستى باشىمنى بۇ زۇلمەت تاغلارىڭ، ئەي شۇم پەلەك،
بارمىكىن دۇنيادا ئادىل چاغلارىڭ، ئەي شۇم پەلەك؟!

ئۇچتى شەمى كۆزلەرىمدىن ئۇچتى ئۈمىدنىڭ نۇرلارى،
كەتتى سەۋرى ئىلكىمىزدە ئۆتتى ھۆرلۈك كۈنلەرى،
قايدا بارسام زۇلمى بىداد نالە-پەرياد ئۈنلەرى،
كۆزىمىزنى باستى زۇلمەت قاپ-قاراڭغۇ تۈنلەرى.
قان بىلەن ئالۇدە قول-بارماقلارىڭ، ئەي شۇم پەلەك،
بەلكى قول-پۇتتۇر ساڭا قورچاقلارىڭ، ئەي شۇم پەلەك.

كىمگەدۇر روزى-ساپا، كىملەرگەدۇر زۇلۇم- سىتەم،
كىمگەدۇر بايراملارىڭ، كىملەرگەدۇر چەكسىز ئەلەم،
بىز نىچۈن تەڭلىك سۈيىدىن بەھرى ئالماي قەترە ھەم،
سۈرسە شۇملار ئەيشى-ئىشرەت، بىز نىچۈن تەشنا شۇ دەم؟!...
يوق ئىكەن ئەدلىڭ بىلەن ئىنساپلارىڭ، ئەي شۇم پەلەك،
بوغۇزىمىزغا سۈردى تىغ قاسساپلارىڭ، ئەي شۇم پەلەك.

بولدى زۇلمىڭدىن جۇدا گۈلزارىدىن بۇلبۇللارى،
بىگۇناھ چۈشتى قەپەسكە قىرىلىپ نۇرغۇنلارى،
بى ۋەتەن  بولدى قاچىپ يۇرتىدىن ئوغۇللارى،
بولدى خار بويۇن قىسىپ يېتىم-يېتىمە تۇللارى.
چىقمىدى دەردىڭ بىلەن ئارمانلارىڭ، ئەي شۇم پەلەك،
قايدىدۇ ئەخلاق يەنە ۋىجدانلارىڭ، ئەي شۇم پەلەك؟

قانمىدۇ، مارجانمىدۇ، يا قەترە شەبنەم ياشىمىز،
تاشمىدۇ، يا تاغمىدۇ، قايغۇدا ياتقان باشىمىز،
يوقمىدۇ دۇنيادا بىزنىڭ ئىچ كۆيەر يولداشىمىز،
دائىما قايغۇ-ئەلەم، ھەسرەتمىدۇ قۇرداشىمىز.
سورۇلۇپ باش ئۈستىگە تۇپراقلارىڭ، ئەي شۇم پەلەك،
بولدىغۇ زىندان كەبى ھەرياقلارىڭ، ئەي شۇم پەلەك.

ۋاھ... ئەجەب قۇش ئۇۋاسىغا شۇم يىلان «مېھمان ئىكەن»!
بىلمىدۇق ئاۋۋال دىلىدا بىر غەزەل پىنھان ئىكەن،
ئالدانىپ قىلتاققا چۈشتۇق --- ھىلەگەر دەۋران ئىكەن،
ياكى قىسمەتنى ئەزەلدە موللاسى يازغانمىكەن؟!...
زەپمۇ پاتتى بوغۇزىمىزغا قارماقلارىڭ، ئەي شۇم پەلەك،
بىگۇناھلار كۆكسىنى يارماقلارىڭ ئەي شۇم پەلەك.

نە گۇناھلىق بەندە بىز زۇلمەتتە قالدۇق ناگىھان،
جايىمىز پۇرقەتكە تولدى، داغ بىلەن قىينالدى جان،
يوق ئاداۋەت-گىنە بىرلە بىزگە بولدۇڭ بەدگۇمان،
كۆرمىگەندۇ شۇڭغاچە ھېچكىم بۇ ئىشنى ھېچقاچان.
كۆزلەرىڭ كوردۇر  سەنىڭ قورساقلارىڭ، ئەي شۇم پەلەك،
قان-يىرىڭ-زەرداپقا تولغان دوۋساقلارىڭ، ئەي شۇم پەلەك.

ئاي بەرگى

/thread-2150-2-1.html

كۈلكە

ئاي بەرگى يوللىغان ۋاقتى  2015-2-7 14:54
/thread-2150-2-1.html

mushundaq yazmining  barliqni bilip turup yene testiqlapsizghu hada?  eskertish berip quyupla uchirwatsngiz bilip qalattim ,boptu mashhurlirmizni qanche yad etsek erziydu ...

ئاي بەرگى

كۈلكە يوللىغان ۋاقتى  2015-2-7 17:18
mushundaq yazmining  barliqni bilip turup yene testiqlapsizghu hada?  eskertish berip quyupla uchi ...

مەن ئىككى تېمىنى سېلىشتۇرۇپ بېقىپ ئاندىن  تەستىقلىدىم،گەرچە ئاساسي مەزمۇن ئوخشاپ كەتسىمۇ يەنە مەلۇم   پەرىقلەر بولغاچقا  ھەر  ئىككىسى تۇرېۋەرسۇن دەپ  ئويلىدىم،ئەسلى ئىككى  تېمىنى  بىرلەشتۈرۈپ  يىغىۋىتەي  دەپ  ئويلىغان،ۋاقتىنچە  ئادىرىسنىلا   قالدۇرۇپ  تۇردۇم،

كۆكتاش

نىمشىھىتنىڭ ئالدىدا ،بىلىم ئىشقىدا قاتارلىق يازمىلىرىنى ياخشى كۆرەتتىم !ھەقىقەتەن ئىسىل ئەسەرلەر نى يازغانىكەن !ھىلىمۇ ئوقۇرمەنلەر سۆيۈپ ئوقۇيدۇ !سىزگىمۇ رەھمەت كۈلكە ،ئۇ توغرىسىدا تەپسىلى ماترىيال بىلەن تەمىن ئەتتىڭىز !كۆپ تەشەككۈر!