شائىرىمىز نىمشىھىت ھەققىدە نىمىلەرنى بىلىسىز؟

تۇمارىس

مەن  نىشمىتن ىڭ يازملىرنى بەك ياقتۇرمەن .

كۈلكە

نىمشېھىت تۇغۇلغانلىقىنىڭ 110يىللىقى خاتىرلەندى

ۋەتەنپەرۋەر شائىر نىمشېھىت ئەرمىيا ئىلى سايرامى تۇغۇلغانلىقىنىڭ 110يىللىقىنى خاتىرلەش يىغىنى ئاقسۇ ۋىلايەتلىك ئەدەبىيات – سەنئەتچىلەر بىرلەشمىسىنىڭ تەشكىللىشى بىلەن 2014-يىلى 8-ئاينىڭ 26-كۈنى ئاقسۇ شەھىرىدە ئېچىلدى. يىغىنغا شىنجاڭ يازغۇچىلار جەمئىيىتى تەشكىللىگەن << پىشقەدەم ئەدىبلەرنىڭ جەنۇبىي شىنجاڭ سەپىرى>> زىيارەت ئۆمىكىدىكى پىشقەدەم قەلەمكەشلەر ۋە ئاقسۇ دىيارىدىكى قەلەمكەشلەردىن بولۇپ 80 گە يېقىن يازغۇچى، شائىرلار قاتناشتى.
يىغىنغا ئاقسۇ ۋىلايەتلىك يازغۇچىلار جەمئىيىتىنىڭ مۇئاۋىن رەئىسى ئەخمەت كېبىر رىياسەتچىلىك قىلدى. ئاقسۇ ۋىلايەتلىك يازغۇچىلار جەمئىيىتىنىڭ رەئىسى ياڭ جىمىن يىغىندا قارشى ئېلىش نۇتۇقى سۆزلەپ داڭلىق يازغۇچى، شائىر، ئەدىبلەرنىڭ ئاقسۇغا كېلىپ بۇ كاتتا خاتىرلەش پائالىيىتىگە قاتناشقانلىقىغا رەھمەت ئېيتتى. ۋىلايەتلىك ئەدەبىيات – سەنئەتچىلەر بىرلەشمىسى، يازغۇچىلار جەمئىيىتىنىڭ مۇئاۋىن رەئىسى يۈسۈپجان مۇھەممەت تۇغيان شائىر نىمشېھىتنىڭ ھايات پائالىيەتلىرىنى تونۇشتۇرۇپ ئۆتتى. نەسىرچى ئامانگۈل نىياز شائىرنىڭ << سېغىندىم >> ناملىق شېئىرىنى، ۋىلايەتلىك 1-ئوتتۇرا مەكتەپنىڭ ئوقۇغۇچىلىرى شائىرنىڭ << بىلىم ئىشقىدا >> ناملىق شېئىرىنى يىغىندا دېكلاماتسىيە قىلدى. ئاندىن ئىلمىي مۇھاكىمە باشلىنىپ، ئەنۋەر ئابدۇرېھىم << مۇقەددەس كۈسەن دىيارىنىڭ غۇرۇرى، ئۇيغۇر ئەدەبىيات تارىخىدىكى يىقىلماس ئابىدە >> ناملىق ماقالىسىنى، پىشقەدەم يازغۇچى ئەخمەت ۋاھىدى، ئۇچقۇنجان ئۆمەرنىڭ << ئۇيغۇر ئەنئەنىۋى شېئىرىيىتىنىڭ ئاز تېپىلىدىغان سەركىسى >> ناملىق ماقالىسىنى، ئابلىز ئوسمان << نىمشېھىت شىئېرلىرىنىڭ مەنىۋى قىممىتى >> ناملىق ماقالىسىنى ئوقۇپ ئۆتتى. يىغىندا يەنە پىشقەدەم شائىر مۇھەممەت رېھىم ئاكا ئۆزىنىڭ نىمشىھېت بىلەن تۇنجى ئۇچىراشقان ۋە كېيىنكى چاغلاردىكى ھايات ئەسلىمىسىنى ئەسلەپ ئۆتتى. ئاخىرىدا ۋىلايەتلىك تەشۋىقات بۆلۈمىنىڭ مۇئاۋىن باشلىقى ئەخمەت ئىمىن سۆز قىلىپ، كەڭ ئەدىبلەردىن كۈتىدىغان ئۈمىد ۋە تەلەپلىرىنى ئوتتۇرغا قويدى

مەنبە :ئەلقۇش تور بىكتى

كۈلكە

كۈلكە

ئوقۇغىلى كەتكەن ئىنىمغا خەت

نىمشېھىت

چىمەنلىكتە بۇلبۇل ئەركىن سايرىشىپ كەتسۇن ،
ئانا ۋەتەن قۇچىقىدا يايرىشىپ كەتسۇن ،
چوغلۇق دىلغا باھار بۇلۇتى ئەتىرلەر سەپسۇن،
ئىرپان سۈيى ئەلەمزادىلەر قەلبىگە يەتسۇن،
ئوقۇش ئۈچۈن كەتكەن ئىنىم مۇرادىغا يەتسۇن .

ئىلمۇ - ئىرپان دولقۇنلىرى مەۋج ئۇرماقتا،
تەشنا لەۋلەر بەھرىلىنىپ سىراپ بولماقتا،
شۇم قۇش ئۇۋىسى بىر تەرەپتىن چۇۋۇلماقتا،
ئوقۇش - ئۆگىنىش خەلقىمىزگە زۆرۈر بولماقتا،
قانلار يۇتۇپ شەيتان لەئىن دوزاخقا كەتسۇن .

ئۆلكەم ئىدى ئون يىل بۇرۇن مەيدە ئاغرىقچان،
خەلقىمىزمۇ ھەيكەل بولۇپ قالمىغانتى قان ،
شۇم بويىلار تېگىدە بېسىلىپ قالغانتى رەيھان،
بولمىغان نان ياكى تەندىن چىقمىغان بۇ جان،
تازىلانغان بۇ ئىللەتلەر قايتىپ كەلمىسۇن.

ئۇ كۈنلەردە قۇرۇق سۆڭەك گەۋدىلىك دېھقان،
چۈنكى خەلقنىڭ كۆپى كېسەل ، قالغىنى نىمجان،
ئەڭ يۇقۇرى دورا بولۇپ «كىرگۈزەتتى جان ...
يالپۇز بىلەن يۇمغاقسۈت ،ئارپا بېدىيان ......»
كۆز كۆرمىسۇن ، ئىبرەت ئۈچۈن قۇلاق ئىشىتسۇن.

ئۇزاق ئۆتمۈش مۇدھىش ئىدى ، شۇنداق بەك يامان ،
ھالسىز بەدەن ، قانسىز چىراي سارغايغان سامان،
كۆزىمىزگە تار كۆرۈنگەن كەڭرى بۇ جاھان،
ئېسىت !...بىزنى ئەزگەن ئىكەن شۇم دەھشەت زامان،
كۈلى ئۆچسۇن كۆككە مەڭگۈ، ئەمدى كەلمىسۇن .

زۇلۇم شۇنداق چەككە يەتكەن ، مەن ئىدىم بىتاپ،
تۇيۇقسىزدىن ئەلدىن كەلدى :
                     -ئويغان!-دەپ خىتاپ،
ئەل ئويغاندى ،جانلار ئازاد بولدى مىھىساب،
دېدى خەلقىم چىن كۆڭلىدىن :
                      - ھۈرلۈك ياشىسۇن!-

جاھالەتنىڭ ئىشىكىنى چېقىپ تاشلىدى ،
ئوقۇش ئۈچۈن ھەممىمىزگە كەڭ يول باشلىدى،
خەلقىمىز شاد،دۈشمەنلەرنىڭ كۆزىن ياشلىدى،
نادانلىقنىڭ تورلىرىنى يىرتىپ تاشلىدى ،
بۇ يول بىلەن بارلىق خەلقىم مەقسەتكە يەتسۇن .

ئوقۇ ئىنىم ، مىنۇت چېغىڭ بوشقا كەتمىسۇن!
جەمئىيەتنىڭ كۈتكەنلىرى بىكار كەتمىسۇن !
ھورۇنلۇقتىن سڭا كېيىن ئەلەم يەتمىسۇن !
خىجىللىقتا يەرگە پېتىپ ، بېشىڭ قاتمىسۇن ،
تىرىشچان بول !خەلق ساڭا رەھمەتلەر ئېيتسۇن .

جەمئىيىتىم ئايرىدى ساڭا بىر بۆلۈم خىزمەت ،
مۇمكىن ئەمەس ئورۇندىماي ،ئاڭا قىل دىققەت !
قايتماس روھ بول !كۈرەش ئۈچۈن توپلىغىن غەيرەت ،
مەيۈسلەنمە ، تاغ - داۋاندىن ئاتلا ! قىل جۈرئەت،
ئالى غايەڭ خانتەڭرىدىن ئۈستۈنرەك بولسۇن .

مەخسۇس ئەمەس بۇ ئېيتقىنىم ئىنىمغا تامام،
قۇلاق سالسۇن ئوقۇش ئۈچۈن بارغان خاسئام،
تەسىرلەنسۇن بارچە مىللەت پەرزەنتى ئۇكام ،
ياش يۈرەكلىك قېرى ئاكاڭ يوللايدۇ سالام ...
ئەل خىزمىتى كۆڭلۈڭلەردە يىلتىزلار تارتسۇن .



1944-يىل ماي ،ئاقسۇ

كۈلكە

ئۆيگە خەت

نىمشېھىت

ھەي ئاتام بىرلەن ئانام ئەھۋالىمىز بولدى خاراپ ،
كەلسە بايدىن ئەگەر ،«كەلدى!»دەپ قولغا قاراپ ،

نە سەۋەبتىن خەت يازمىدىڭلار يا كۆڭۈل ئاغرىقمىدۇر ؟!
ياكى قەغەز ئالمىدىڭلار سەككىز - ئون پۇلنى ئاياپ !...

نە ئۈچۈن خەت يازمىدىڭلار يا كۆڭۈل ئەنسىزمىدۇر ؟!
ئەۋەتسىلە بولماسمىدى بىر پارچە خەت ھالىم سوراپ .

ياكى مەندەك پەرزەنتلىرىنى ئۇنتۇپمۇ قالدىلىمۇ ؟!
نە سەۋەبتىن خەت يازالماي چالدىلا غەمدىن راۋاپ ؟!


1929-يىلى

كۈلكە

ئۇكام ساڭا

نىمشېھىت

سالام يوللاي ۋەتەن ئۈچۈن جان كۆيدۈرۈپ ،
ئىشلەۋاتقان قىزغىن روھلۇق ئۇكام ساڭا !
چىن كۆڭۈلدىن بەلنى باغلاپ خەلق ئۈچۈن ،
تىماي ئىشلە نىشانسىزلىق ھارام ساڭا !
شەخسىي ئىشىڭ ۋەتەن - ئەلگە بېغىشلانسۇن ،
پەن - مەرىپەت ئىشلىرىگە قىل جان پىدا !...
ئېغىرچىلىق - قىيىنچىلىق  تالدۇرمىسۇن ،
ھاردىم دېيىش زور ئېيىپتۇر ئۇكام ساڭا !
خەلقىمىزنىڭ كۈتكىنىنى ئادا قىلىش ،
ئىجاد قىلىش ، مېھنەت قىلىش قەرزدۇر ساڭا !
ئەۋلادلارغا نەمۇنىلەر قالدۇرۇشقا ،
ئۆمۈربويى ئىشلىگىنىڭ راھەت ساڭا !
ھەركىم ئەگەر ئىستىقبالغا سېلىپ نەزەر ،
ئىش باشلىسا ئۇ ، بولغۇسى ئۇستاز ھامان .
ئوتلۇق يۈرەك قەلبىڭ تازا بولسۇن ھامان ،
ۋىژدانلىق ئەر مەزلۇم ئەلگە چوڭ بىر پانا !...
كېلىچەكنىڭ مېھمانلىرى ئەستە بولسۇن ،
قالدۇرغىنىڭ ئۇلار ئۈچۈن ئارتسۇن يانا!
ئاناڭمۇ ھەم ساڭا بەرگەن سۈتلىرىگە ،
رازى بولسۇن كۈتكىنىدەك ئىشلە ئۇكا !
خوشال بولسۇن سېنىڭ ئۆسكەن ئايماقلىرىڭ ،
ۋەزىپەڭنى جان كۆيدۈرۈپ قىلغىن ئادا .
تەكەببۇرلۇق ، ئىككى يۈزلۈك ، يالغانچىلىق ،
مەغرۇرلۇقنى سەن ئۆزۈڭگە ھېچ يولاتما !
قىزغىن روھلۇق ،ئۆتكۈر كۆزلۈك ، چىداملىق بول ،
ئۇنۇتمىغىن ئەلنى دائىم ئەستە ساقلا !
بۇ سۆزۈمنى ئىش يۈزىدە كۆرسىتىشتە ،
«سۆزى باغدا ،ئىشى تاغدا »بولۇپ قالما !
كونا تۇرمۇش ئادىتىنى ئارزۇ قىلغان ،
قۇرۇق مېڭە جاھىللارغا ئۇرغىن پەشۋا !
گۈللەپ ئۆتسۇن يۇرتىمىزدا مەدەنىيەت ،
قانلار يۇتسۇن كۆرەلمەسلە ھەم ئىپلاسلا !
ئارزۇلارنى كۆڭۈل قويۇپ ئىشلىگەندە ،
قەتئىي بولۇڭ كۈچلۈك بىلەك سىزدەك ياشلا !
بۈگۈن سېنىڭ بۇ شەرەپلىك خىزمەتلەرنى ،
ئۆتەش ۋاقتىڭ سۇسلۇق قىلما سەن بۇ يولدا .
خەلق ئۈچۈن ئىشلەيدىغان يارانلارغا ،
ئىلھام بولسۇن ئىلتىماسىم ئۆز ۋاقتىدا .
سېزىلسە ئەگەر خەلق ھاياتىنى قىرقىغۇچى ،
يوقۇتۇشقا بىر مىنۇتمۇ سۇسلۇق قىلما !
يالغۇز ئەگەر نۇرغۇن دۈشمەن ئارا كىرسەڭ ،
بومبا بولۇپ پارتلا ئۇنى تىتىپ تاشلا !
قايناپ تۇرسۇن قىزىق قېنىڭ ۋولقانلاردەك،
پۇرسەت بەرمە ئالدامچىغا ئىنىم ئەسلا !
ئۆگىنىشتە تىرىشچانلىق يولۇڭ بولسۇن ،
يەنچىپ تاشلا ئەگەر يولۇقسا توسالغۇلا !
چېلىش - كۈرەش مەيدانىدا جەۋلان قىلغىن،
ئارتتا قالغان ئوغلانلارنى ئالغا باشلا !
شۇ مەقسەتتە ئىشلەيدىغان بارلىق ئۇكام ،
نېمشېھىتنىڭ تىلىكى شۇ بېسىڭ ئالغا !


1941-يىل 23- ئاۋغۇست ، ئاقسۇ

كۈلكە

يۇرتۇمغا خەت
نىمشېھىت

مىڭ پىغان -يۈزمىڭ پىغان بېشىمغا چۈشتى ئىپتىراپ ①،
ئولتۇرۇپ قان يىغلىسام ،بولماس يېتىپ يول كۆپ يىراق .

كۆيدۈرۈپ كۈل قىلدى جانۇ - تېنىمنى ئوتلۇق پىراق ،
ئەمدى پۇرقەت ئوتىغا كۆيمەككە تاقەت بولدى تاق .

ھەددىدىن ئاشتى سېغىنماق -جاندىن ئۆتتى ئىشتىياق ،
خانۇ -ماندىن ئاجرىغاننىڭ تەلىپى بولمايدۇ ساق ،

ئىككى كۆزنىڭ چەشمىسىدىن ئاقار ھامانۇ قان بۇلاق ،
كۆزگە زىنداندەك كۆرىنەر گۈل - چىمەندە سايرىماق .

ھەر كىشى ئايرىلمىسۇن ، ئەۋلادىدىن-ئەلدىن يىراق ،
جۈپتى قىل يارەپ مۇسەللىم ھەرگىزمۇ قىلما زادى تاق،

«ئاھ !...»دىدىم مەن دوستلىرىم چۈشتى بېشىمغا ئوت-پىراق،
ئەل پىراقۇ ،ئەل پىراقۇ ،ئەل پىراقۇ ،ئەل پىراق .

1929-يىلى
***********************************************
1347-يىلى ھىجىرى 2- ئاي ، قەشقەر.
① ئىپتىراق - جۇدالىق ،ئايرىلىش

كۈلكە

خاتا

نىمشېھىت

مەست-مۇستەغەرق بولۇپ غەپلەتتە ياتماقلىق خاتا،
يەنى غاپىللىق بىلەن ئۇيقىغا پاتماقلىق خاتا.

يېمەك - ئىچمەك ھەممىنى ئۆز نەپسى ئۈچۈن توپلىۋېلىپ ،
بىرگە توققۇز نەرق قويۇپ ، پايدىغا ساتماقلىق خاتا.

مەرت سەن ، ئەل بىرلەن ئول ، بىللە تىرىل ھەم بىللە كۈل ،
بىللە يىغلا ، ئەلنى تاشلاپ چەتتە ياتماقلىق خاتا.

جان بىلەن تەڭ قولغا كەلگەن راھىتىڭ قەدرىنى بىل !
چۈنكى مەغرۇرلۇق بىلەن ئەپسانە بولماقلىق خاتا.

خەلقنى دە ، «تەۋرات»ئوقۇ «ئىنجىل»ۋەيا«قۇرئان»ئوقۇ،
نېمە قىلساڭ قىل ،لېكىن نومۇسىنى ساتماقلىق خاتا.

زارلىنىپ بىچارىلەر غەمدىن كۆزىگە ئالسا ياش ،
ياش تۇرۇپ ، يۇشۇرۇن يۈرۈپ ،پىنھاندا ياتماقلىق خاتا .

سەن يىگىت جايىڭدا تۇر ! مەزلۇم بولۇپ دەرد تارتمىغىن ،
ئەر تۇرۇپ :«مەزلۇم !» دېگەن بەدنامنى ئالماقلىق خاتا.

گەردېسەڭ جىنىم جاپاكارلاردىن جاپا تارتمىسۇن ،
كۆپكە باق ئەمما لېكىن ،كۆك بۆككە باقماقلىق خاتا .

غەمخورۇڭ دائىم سېنىڭ غېمىڭنى يەم زار قاخشىسا ،
ئاڭلىماي گاستەك بولۇپ ، تاماشا قىلماقلىق خاتا.

چۈنكى سەنمۇ ئەر ئۆزۈڭ ،ئەردەك ئۇلۇغ مەردانە بول !
تەڭرىنى يادلاپ قويۇپ ،تەدبىرنى قويماقلىق خاتا.

«يارىتىشنى ھەق ياراتتى ،يارىلىش ئۆزۈڭدىدۇر ...»
بايقىماي كۆرۈپ تۇرۇپ قاپقانغا باسماقلىق خاتا.

ۋەدىگە تۇرماق ھەربىر ئادەمنىڭ شەرەپلىك شەنىدۇر،
باشتا بىر ۋەدە قىلىپ ئاخىردا بۇزماقلىق خاتا.

چارە يوق بۇزماسقا گەر چىقسا مۇخالىپتىن بۇزۇق ،
تەندە جېنىڭ بار تۇرۇپ «ئەلھۆكمى»ئېيتماقلىق خاتا.

قەدىرلىك يۇرت ، ئەل ، ۋەتەنگە نىمشېھىتنىڭ ئەرزى بۇ ،
«دات»دېگەنلەر «دادىنى»دالدىغا قاقماقلىق خاتا.


1947-يىل ماي، غولجا

كۈلكە

ئالدىدا
نىمشېھىت

رۇخسەت ئەيلەڭلەر بۈگۈن سۆزلەشكە مەيدان ئالدىدا ،
ئېيتايىن كۆڭلۈمدىكى سىرىمنى ۋىژدان ئالدىدا ،
بۇلبۇلى شەيدا كەبى باغ ئىچرە رەيھان ئالدىدا،
تەنگە جان سىغماس خۇشالمەن خۇددى بوستان ئالدىدا،
ياش يىگىتنىڭ كۆڭلى ئوخشاش يارى - جانان ئالدىدا .

سۆز بېشىدا داھىمىز ماۋجۇشىغا ھۈرمەت تىلەي ،
كوممۇنىستىك پارتىيە مىڭ - مىڭ ياشا دەپ ئۆرگىلەي ،
ئىشچى - دېھقان بىرلىكىنى جاندىنمۇ ئارتۇق بىلەي ،
دۈشمىنىم قان يىغلىسۇن ،خەلقىم بىلەن دائىم كۈلەي ،
ئاتىمىز ، ئۇستازىمىز داھى قەدىردان ئالدىدا .

نەچچە يۈز يىلدىن بۇيان بۇ ئۆلكەم باغرىنى زۇلمەت قاپلىغان ،
زومۇگەرلەر ھەر قەدەمدە دېھقانغا تۆھمەت چاپلىغان ،
قاپقاراڭغۇ زەي-سېسىق زىنداندا جاننى ساقلىغان ،
نەگە بارسا جان سىقىلغان بىردەم ئامانلىق تاپمىغان ،
قانچە «سادىر »،«نوزۇگۇم»لار بولدى قۇربان ئالدىدا.

بوغسىمۇ مۇدھىش زۇلۇم ھۋچ توختىماي ئۆستى تىلەك ،
«ئاھ !...يورۇق تاڭ قايدا ؟!»دەپ قان كەچتى ھەر كۈچلۈك بىلەك ،
نەچچە «قاينام ئۆركىشى»ئالدى قەلەم ئوتلۇق يۈرەك ،
قان ئىچىپ زار قاخشىتىپ كەلگەن ئىدى زالىم پەلەك ،
كەتتى زۇلمەت ،كەلدى ئازاد كۈن بۇ ئىمكان ئالدىدا .

خەلقىمىزنىڭ ئاھۇ - زارى ئەرشتىن ئۆتكەن ئىدى ،
كاج پەلەكنىڭ «قەدرى»ماڭلايغا نەق پۈتكەن ئىدى ،
كۆڭلىدە خەلقىم تىلەكنى دائىما كۈتكەن ئىدى ،
تەندە ھەم كۆزلەردە ھەم غەزەپ ئوتى يانغان ئىدى ،
«ئاقىۋەت راھەت كېلۇر»دەپ ،بىزگە ئىنسان ئالدىدا .

قانچە مەردلەرنى زۇلۇم ئاتىسىدىن ئايرىغان ،
قانچە بۇلبۇللار مازاردا «سۆيگۈنۈم »دەپ سايرىغان،
غۇنچىدەك نازۇك بەدەنلەرنى شېخىدىن قايرىغان ،
يوق ئىدى ۋىژدانى بارلاردىن بىرەرسى يايرىغان ،
خارلىنىپ ياتقان ئەزىز تەنلەر گۆرۈستان ئالدىدا.

ئېيتىۋەرسەم تۈگىمەيدۇ زۇلۇمنىڭ مىڭدىن بىرى ،
بېشى ئاق ئېيىق ئىدى ،ئون ئىككى ياش قىزنىڭ ئېرى ،
ھۆكۈمران ئەجدەر ئىدى ،جانلاردىن ئۆتكەن نەشتىرى ،
شۇم ھوقۇش ئىلكىدە بولغان قىز - ئوغۇلنىڭ تەغدىرى ،
مۇردىدىن ئالۋاڭ تىلەپ قويمايتتى زىندان ئالدىدا .

شۇنداق تۇرمۇش بېشىمىزدا ئىدى خۇددى سايىدەك ،
ئويلىغان ھەر كۈننى يىرتقۇچلار مۇقەددەس ئايىدەك ،
شۇم زامان ئەلنى شورايتتى خۇددى ھايۋان مايىدەك ،
«ئاھۇ - زارنى»ئاڭلار ئىدى خۇددى بىر «ناي -نايى»دەك ،
شۇندا ئازادلىقتىن خەۋەر كەلدى گۈلىستان ئالدىدا .

كۈن چىقىشتىن كۈن چىقىپتۇ :«بارىكاللا !...»دېدى ئەل ،
كوممۇنىستلار خەلقنى ئازاد قىلغىلى باغلاپتۇ بەل ،
بولدى ئارمان -ئارزۇيىمىز پارتىيە يولىدا ھەل ،
ئۈستىمىزدىن كۆتۈرۈلدى چىقىراپ تۇرغان ئەجەل ،
كۈن ئۆزى نۇرىنى چاچتى بىزگە ئاسمان ئالدىدا .

پارتىيىمىز بىزنى ئازاد قىلدى زۇلمەت ئىلكىدىن ،
قوينى قويچى ئاستىراندەك بۆرى بىلەن تۈلكىدىن ،
ئىشچى - دېھقان بولدى ئازاد فېئوداللار مۈلكىدىن ،
قىز - ئوغۇللار توختىيالماس شادۇ - خۇرام كۈلكىدىن ،
كۆز يېشى قىلماس ئېلىم ئەمدى زىمىستان ئالدىدا.

قىلدى ئۆلكەمدە زۇلۇمنى يەرگە يەكسان پارتىيە ،
سۇنى باشلاپ چۆلنى قىلدى باغۇ - بوستان پارتىيە ،
ھەر قەيەرگە بارسا قىلدى گۈل - گۈلىستان پارتىيە ،
سايرىسا بۇلبۇل ساداسى بولدى داستان پارتىيە ،
ھەممە ئەمكان بولدى تەييار ئىشچى -دېھقان ئالدىدا .

تۈگىمەيدۇ تەرىپىڭنى قانچە يازسام پارتىيە ،
دىل كۈلەر شەنىڭگە مەن سازىمنى چالسام پارتىيە ،
ئارزۇيۇم دۈشمىنىڭنىڭ گۆرىنى قازسام پارتىيە ،
قەدىرلىك بولغاي سۆزۈم ئىنۋانغا يازسام پارتىيە ،
خەلق ئالەم خۇش سۆيەر نامىڭنى داستان ئالدىدا .

بىز ئىدۇق ئەسىر بويى پەننى بىلىمدىن بىخەۋەر ،
نەچچە يىللار ئوقۇساق بىلگىنىمىز «پەش،زىرۇ-زىۋەر»،
پارتىيىمىز قايسى چاغ تاپتى ئۆلكەمدە زەپار ،
بەس،شۇ كۈندىن بېرى بولدۇق مەكتەپ بىلەن مۆتىۋەر ،
شۇ سەۋەبتىن پارتىيىنى سۆيىمىز جان ئالدىدا .

ئەل قاتارى تەڭ ھوقۇقلۇق بولدى ئەمدى خەلقىمىز ،
ھەممە مىللەت تەڭ باراۋەر ئىتتىپاق ساپ قەلبىمىز ،
كەمسىتىشلەر يوقۇلۇپ پۈتتى ئاداۋەت غەلۋىمىز ،
تارتىمىز تاناۋىنى چىقسا ئارىدىن تەلۋىمىز ،
تىلىمەيمىز «ئاھ!»ئۇرۇپ شەپقەتنى گۈلخان ئالدىدا .

ئالتە يىلدىن بېرى بەردى بىزگە تۈرلۈك تەربىيە،
ھەممىنى ئەركىن ياشاتتى خەلق ئازادلىق ئارمىيە ،
شۇ سەۋەبتىن «ياشا !...»دەيمىز كوممۇنىستىك پارتىيە ،
«كۆپ ياش !...»دەپ يەنە ئېيتاي كوممۇنىستىك پارتىيە ،
ئەمدى باش قويماس ئېلىم ھەرگىزمۇ شەيتان ئالدىدا .

«ئۆلكىمىز مۇختارىيەت !»دەپ باشلىۋەتتۇق يېڭى توي ،
پارتىيىدىن كەلدى بىزگە بۇ شەرەپلىك ئابروي،
كۈتۈرۈلدى شادۇ -خڭراملىقتىن پەلەككە ھاي-ھۇي ،
ئەل ئامان ، ئازاد زامان ،كۈلدى ۋەتەن بولغاندا توي ،
كۆپ ئاش ئالدى دېھقان ئوخشاش كۈزدە خامان ئالدىدا .

بەختىياردۇر ئۆلكىمىزنىڭ ھەمدە پارلاق كەلگۈسى ،
سوتسىيالىزىمغا بارماقنىڭ بۇ ئاساسىي بەلگىسى ،
شانۇ -شەۋكەت ،بەخت -سائادەت ئەلئارا تەڭشەلگۈسى،
ئەلگە راھەت ھەم سانائەت ئۆلكىدە تىكلەنگۈسى ،
تۇرمىغاي خەلقىم گادايدەك تەلمۈرۈپ نان ئالدىدا .

يەڭگىل بولار بەس شۇ چاغدا بىزنىڭ ھەممە ئىشىمىز ،
ئىشلىسەك بىردەك ئۆتەر ھېچ قايغۇسىز ياز-قىشىمىز،
ئاتنى تاغقا ،گۈلنى باغقا ،قوشقا تۆمۈرنى قوشىمىز ،
ۋاقىتنى ئاسراپ كۆك يۈزىدە قۇشقا ئوخشاش ئۇچىمىز ،
قولدا بەش يىللىق پىلان ھۈججەت ئېرۇر سان ئالدىدا .

تانا تارتىپ قاتنىغاي تېزدىن تۆمۈر يولدا تۆمۈر ،
راھىتى -ئاسايىشتا ئۆتكەي ياشنىغان بىزنىڭ ئۆمۈر ،
كېمەيمەس ئۈستۈڭدە تون ، ئامباردا ئۇن ، خاڭدا كۆمۈر،
بەختىمىز ، ئىقبالىمىزغا بولدى قانۇن جان تومۇر،
خىزرى تەبىئىمگە مۇناسىپ ئابى ھايۋان ① ئالدىدا .

باسىمىز ئالغان قەدەملەپ پارتىيىنىڭ ئىزىدىن ،
ئالىمىز كۆپلەپ ھوسۇل شۇندا ھەر بىر يېزىدىن ،
سۆيۈنەر بوۋاي ،مومايلار ئوغلىدىن ھەم قىزىدىن ،
كەتكۈسى غەملىك ئالامەت ھەممە ئادەم يۈزىدىن ،
بويغا يەتكەن قىزغا ئوخشاش ئۆيدە مېھمان ئالدىدا .

بۇ پاراغەتلىك ھاياتتۇر پارتىيىنىڭ شەپقىتى ،
بىزنى ھۈرلۈككە چىارغان ئارمىيىنىڭ ھىممىتى ،
ئارزۇلارنى قىلۇر ھەل ئىشچى - دېھقان غەيرىتى ،
ئەل ئارا ئاشماقتا ھەردەم خەلقىمىزنىڭ ھۈرمىتى ،
نىمشېھىت ئېيتتى غەزەل ،ئۇشبۇ مەيدان ئالدىدا .

1955-يىل ئۆكتەبر ،ئۈرۈمچى

***********************************************
①ئابى ھايۋان- ھاياتلىق سۈيى - ئابى ھايات