ئەنگلىيە «كۈندىلىك پوچتا گېزىتى» نىڭ 7-ئاپرېل خەۋەر قىلىشىچە، ئاۋسترىيەنىڭ ۋىيېنا شەھىرىدىكى مايا پىندېئۇس (Maya Pindeus) ۋە جوھاننا پىچلبائۇئېر (Johanna Pichlbauer) ئىسىملىك ئىككى لايىھەلىگۈچى يېقىندا ئاياللارغا گىرىم قىلىپ قويالايدىغان ماشىنا ئادەم ياساپ چىققان ۋە بۇنى فىرانسىيە سانتا ئېتېننې 2015-يىللىق خەلقئارا لايىھەلەش قوش يىل كۆرگەزمىسىدە تۇنجى قېتىم نامايان قىلغان.
گەرچە بۇ ‹‹گىرىم قىلىش ئۇستىسى›› نىڭ گىرىم قىلىش سۈپىتى ئانچە ياخشى بولمىسىمۇ، لېكىن ئۇ ئىنسانلار بىلەن ماشىنا ئادەم ئوتتۇرىسىدىكى ئارىلىقنى تېخىمۇ يېقىنلاشتۇرغان.
مەزكۇر ‹‹گىرىم قىلىش ئۇستىسى›› لەۋ سۇرۇخ ئۈسكۈنىسى، كۆزگە سىزىق سىزىش ئۈسكۈنىسى، ئەينەك قاتارلىق ئوخشاش بولمىغان ئۈچ خىل قۇرۇلمىدىن تەشكىل تاپقان بولۇپ، ھەر بىر ئۈسكۈنىنىڭ ئالدىغا ئىڭەك تىرىگۈچ ئورنىتىلغان. گىرىم قىلىشتىن بۇرۇن لايىھەلىگۈچىلەر ماشىنا ئادەمنىڭ قۇرۇلمىسىنى ئورۇنلاشتۇرغان ۋە ئەينەكنىڭ ئورنىنى ئۆزگەرتىپ چىققان.
مۇناسىۋەتلىك سىن ماتېرىيالىدىن شۇنى كۆرۈۋېلىشقا بولىدۇكى، ماشىنا ئادەمنىڭ بىلكى ئالدى بىلەن كۆز مەلھىمىنى مۇقىملاشتۇرۇۋالىدىكەن، ئاندىن كۆز چوتكىسى ئارقىلىق كۆزگە سىزىق سىزىشقا باشلاپ، خۇددىي ئادەملەردەك نورمال تەرتىپ بويىچە كۆزگە سىزىق سىزىش مەشغۇلاتىنى تاماملىيالايدىكەن.
بىراق ھەرىكەت قىلىش دائىرىسى ھەددىدىن زىيادە چوڭ بولغانلىقى ئۈچۈن، سىناق قىلىپ گىرىم قىلدۇرغۇچىلارنىڭ پىشانىسى، يۈز-كۆزلىرى ۋە بۇرنى قاتارلىقلار «گىرىم قىلىش ئۇستىسى» تەرىپىدىن قاپقارا قىلىۋېتىلگەن. لەۋ سۇرۇخ ئايلىنىش دائىرىسى بىرقەدەر كىچىك بولغان ئەگرى دەستىگە ئورنىتىلغان ئىكەن، بىراق ھەممە ئايالنىڭ لەۋ شەكلى ئوخشىمىغاچقا، ماشىنا ئادەم ئۇلارنىڭ لەۋ شەكلىنى پەرقلەندۈرەلمەي، لەۋ سۇرۇخنى ئاياللارنىڭ ئىڭەكلىرى ۋە يۈز-كۆزلىرىگە سۈرۈۋەتكەن.
بۇ ‹‹گىرىم قىلىش ئۇستىسى›› غا يەنە LED يورۇتۇش چىرىغى ئورۇنلاشتۇرۇلغان بولۇپ، بۇنىڭ نۇر توسۇش تاختىسى ئاياللارنىڭ تىرىسىنى پارقىراق قىلىپ كۆرسىتىدىكەن.
لايىھەلىگۈچى مايا پىندېئۇس بىلەن جوھاننا پىچلبائۇئېر مۇنداق دېگەن: ‹‹بۇنىڭ ئۈنۈمى بىز ئويلىغاندەك بولماي قالدى، بىراق بىز يەنىلا ماشىنا ئادەمنىڭ مۇھەببەتكە ئىگە ئىكەنلىكىدەك بىر تەرىپىنى بايقىۋالدۇق››.
ئۇلار يەنە: «بىزنىڭ ماشىنا ئادىمىمىزنىڭ ئۆزىگە چۇشلۇق ئوي-پىكىرى ۋە خاھىشى بار. بىز بۇ ئارقىلىق كىشىلەرنى ماشىنا ئادەمنىڭ گۈزەللەشتۈرۈش مۇلازىمىتىدىن بەھرىمەن قىلىپ، ئىنچىكە ئىشلارنى ماشىنا ئادەمگە قىلدۇرۇپ بېقىش تەسىراتىغا ئىگە قىلماقچى›› دېگەن.