جاھان ئاگېنتلىقى 4-ئاپرېل خەۋىرى؛ لەگلەك تورى تەرجىمىسى: يەمەننىڭ سابىق ئاغدۇرلغان پرېزىدېنتى ئەلى ئابدۇللاھ سالىھنىڭ روسىيەدىن دىپلوماتىك خادىملارنى قايتۇرۇپ كېتىش ئۈچۈن كەلگەن ئايرۇپىلان بىلەن يەمەندىن ئايرىلغانلىقى بىلدۈرۈلدى. يەمەن تاشقى ئىشلار مىنىستىرى رىياد ياسىن، سابىق پرېزىدېنت ئەلى ئابدۇللاھ سالىھنىڭ ، روسىيە تەرەپتىن دىپلوماتىيە خادىملىرىنى قايتۇرۇپ كېتىش ئۈچۈن ئەۋەتىلگەن بىر ئايرۇپىلان بىلەن دۆلەتتىن ئايرىلغانلىقى ھەققىدە خەۋەر تاپشۇرۇپ ئالغانلىقىنى بىلدۈردى. ياسىن، سەئۇدى ئەرەبىستاننىڭ «شەرقۇل ئەۋسەت» ئوتتۇرا شەرق گېزىتىگە سۆز قىلىپ، «سابىق پرېزىدېنت سالىھنىڭ دىپلوماتىيە خادىملىرىنى قايتۇرۇش ئۈچۈن سەنئا ئايرۇدرومىغا كەلگەن روسىيە ئايرۇپىلانى بىلەن دۆلەتتىن ئايرىلغانلىقى ھەققىدە بىزگە خەۋەر يەتكۈزۈلدى» دېدى. ياسىن، يۇقارقى ئايرۇپىلاننىڭ قاھىرە ئايرۇدرومىدىن كەلگەنلىكى ۋە يەمەن ھاۋا دائىرىسىگە كىرىش ئۈچۈن «كەسكىن قارار بورىنى» ھەرىكىتىگە قاتناشقان قىسىملاردىن رۇخسەت سورىغانلىقىغا ئىشارەت قىلىپ، ئايرۇپىلاننىڭ قوزغىلىشىدا 12 سائەت كېچىكىش بولغانلىقىنى تەكىتلىدى.
ياسىن يەنە، «كەسكىن قارار بورىنى» ھەرىكىتى ھەرىكىتىگە قاتناشقان ئايرۇپىلانلارنىڭ ، ھۇسىيلەر ۋە سالىھنى قوللىغۇچى گۇرۇپپىلار تەرىپىدىن كونترول قىلىنغان قورال-ياراغ ئامبارلىرىنىڭ تەخمىنەن يۈزدە 85% نى ۋەيران قىلغانلىقىنى ئېيتتى.
يەمەندىكى ئاغدۇرۇلغان رەھبەر ئەلى ئابدۇللاھ سالىھنىڭ باشچىلىقىدىكى خەلق قۇرۇلتىيى پارتىيىسىنىڭ ياردەمچى باشلىقى ئەھمەد ئۇبەيد ئىبنى داگارنىڭ پارتىيەدىن ئايرىلىپ ئوممان پادىشاھلىقىغا قېچىپ كەتكەنلىكى بىلدۈرۈلگەن ئىدى. ئىبنى داگارغا يېقىن دائىرلەردىن ئېرىشكەن ئۇچۇرغا ئاساسلانغاندا، ئىبنى داگارنىڭ دۆلەتنىڭ شەرقىدىكى سارفىت چېگرا ئېغىزىدىن ئۆتۈپ ئوممان پادىشاھلىقىغا يىتىپ بارغانلىقى، ئۇنىڭ پارتىيەدىن ئايرىلىپ ئوممانغا كېتىشىگە، سالىھنىڭ «قانۇنلۇق ھۆكۈمەت» كە قارشى ھۇسىيلەر بىلەن ھەمكارلىق ئورناتقانلىقى سەۋەب بولغانلىقى بىلدۈرۈلگەن ئىدى.