جاھان ئاگېنتلىقى 4-ئاپرېل خەۋىرى؛ لەگلەك تورى تەرجىمىسى: ئىران تاشقى ئىشلار مىنىستىرى ياردەمچىسى ئاراكچى، ئامېرىكا تاشقى ئىشلار مىنىستىرى  كېررىينىڭ «ئىرانغا قارىتىلغان جازالار باسقۇچلۇق ھالەتتە بىكار قىلىنىدۇ» دىگەن سۆزىگە رەددىيە بىلدۈردى، ئاراكچى؛ «ئىرانغا قارىتىلغان ئىمبارگولار، كېلىشىم ئىجرا قىلىنىشقا باشلىغان تۇنجى كۈنى تامامەن بىكار قىلىنىدۇ» دېدى.
ب ت خەۋىپسىزلىك كېڭىشىنىڭ دائىمى ئەزالىرى، ئامېرىكا، روسىيە، جۇڭگو، ئەنگىلىيە ۋە فرانسىيە بىلەن گېرمانىيە قاتارلىقلار تەشكىل قىلغان «5+1 گۇرۇپپىسى» بىلەن ئىران ئارىسىدا ھاسىل بولغان كېلىشىمدىن كېيىن، تېھرانغا يۈرگۈزۈلگەن جازالار ھەققىدە ھەر قايسى تەرەپلەردىن پەرقلىق باياناتلار ئېلان قىلىندى.
ئىران تاشقى ئىشلار مىنىستىرى ياردەمچىسى ۋە باش مەسلىھەتچى ئابباس ئاراكچى، ئىران دۆلەتلىك تېلىۋېزىيسىدە سۆز قىلىپ، ئامېرىكا ھۆكۈمىتىنىڭ باياناتىنىڭ ئەكسىچە، دۆلىتىگە قارىتىلغان جازالارنىڭ بىرلا قېتىمدا بىكار قىلىنىدىغانلىقىنى ئېيتتى.
ئاراكچى،   كېررىينىڭ ئىرانغا قارىتىلغان جازالارنىڭ باسقۇچلۇق ھالەتتە بىكار قىلىدىغانلىقى ھەققىدە ئېيتقان سۆزىنىڭ ئەمەلىيەتكە ئۇيغۇن ئەمەسلىكىنى ئېيتىپ مۇنداق دېدى: «بۇ سۆزلەرنىڭ ھېچبىرى توغرا ئەمەس، كېلىشىم تېكىستى تامامەن ئاشكارا. ئىقتىسادى جازالار ۋە ب د ت خەۋىپىسزلىك كېڭىشى بېكىتكەن بارلىق ئىمبارگولار، كېلىشىم ئىجرا قىلىنغان تۇنجى كۈنى تامامەن بىكار قىلىنىدۇ». ئاراكچى، 2-فېۋرالدا ئىران تاشقى ئىشلار مىنىستىرى  زەرىف ۋە ياۋرۇپا ئىتتىپاقى تاشقى مۇناسىۋەتلەر ۋە بىخەتەرلىك سىياسىتى ئالى ۋەكىلى Federica Mogherini تەرىپىدىن ماقۇللانغان ئورتاق ئۇقتۇرۇشتا دېيىلگەن نوقتىلارنىڭ ئاشكارا ئىكەنلىكىنى بىلدۈردى.
يادرو مۇزاكىرىسىدە ئىران ۋە غەرب ئەللىرى ئارىسىدا پەيشەنبە كۈنى «سىياسىي رامكا كېلىشىمى» تۈزۈلدى. كېلىشىمنىڭ لايىھەسى يېزىلىشقا باشلىنىدۇ ۋە بارلىق شەرتلەر ئورۇندالغاندا 30-ئىيۇندا ئەڭ ئاخىرقى ھەل قىلغۇچ كېلىشىم ئىمزالىنىدۇ.
ئامېرىكا پرېزىدېنتى  ئوباما ھاسىل بولغان كېلىشىمگە ئالاقىدار سۆز قىلىپ؛ «بۇ ياخشى ۋە تارىخى بىر يارىشىشتۇر، ئەگەر ھەل قىلغۇچ كېلىىشم ھاسىل بولسا دۇنيا تېخىمۇ بىخەتەر بىر ھالەتكە كېلىدۇ. ئىراننىڭ بۇنىڭدىن كېيىن يادرو قورالىغا ئېرىشىش پۇرسىتى بولمايدۇ، ئەگەر ئىران كېلىشىمگە رىئايە قىلسا ئىرانغا قارىتىلغان ئامېرىكا ۋە ب د ت نىڭ جازالىرى باسقۇچلۇق ھالەتتە بىكار قىلىنىدۇ، ئەكسىچە بولغاندا جازالار قايتىدىن ئىجرا قىلىنىدۇ» دېدى.
ئىران پرېزىدېنتى  رۇھانى، تىۋىتتېر ھىساباتى ئارقىلىق بايانات ئېلان قىلىپ، ئىران بىلەن 5+1 دۆلەتلىرى ئارىسىدا يۈرگۈزۈلگەن يادرو مۇزاكىرىسىدە ئاچقۇچلۇق تېمىلار ھەققىدە ھەل قىلىش چارىسى تېپىلغانلىقى ۋە كېلىشىم لايىھەسىنى تەييارلاشنى باشلىغانلىقىنى بىلدۈرگەن ئىدى.