جاھان ئاگېنتلىقى 25-مارت خەۋىرى؛ لەگلەك تورى تەرجىمىسى: لىۋان ئىچكى ئىشلار مىنىستىرى نىھات ئەل مەنشۇق، لىۋان ئاللاھ پارتىيىسىنىڭ سۇرىيە مۇداخىلىسىنى ئەيىبلەپ، تەشكىلاتنىڭ سۇرىيەدە ئۇرۇشقا كىرىشىنىڭ نەتىجىلىرى بىلەن ھىسابلاشماي، ئۆز بېشىمچىلىق بىلەن تارىخى جىدەل-ماجرا ۋە بۆلگۈنچىلىكنى پەيدا قىلىدىغانلىقىنى ئېيتتى.
مەنشۇق، ئەسەد ھۆكۈمىتىنىڭ ئاز دىگەندە 250 مىڭ سۇرىيەلىك پۇقرانى ئۆلتۈرگەنلىكىنى تەكىتلەپ، بەششار ئەسەدنىڭ ھاكىمىيەتتە پۇت دەسسەپ تۇرۇشى مۇمكىن ئەمەس، قىرغىنچىلىقنى داۋاملاشتۇرغان تەقدىردىمۇ سۇرىيەدە بۇنىڭدىن كېيىن ھاكىمىيەت يۈرگۈزەلمەيدۇ دېدى. ئۇ يەنە، دەمەشىق ھۆكۈمىتىنىڭ لىۋان ۋە سۇرىيەدە نۇپۇزىنىڭ قالمىغانلىقىنى تىلغا ئېلىپ، ھازىر سۆزلەۋاتقىنى ئىرانلىقلاردۇر! دېدى.
مەنشۇق،« لىۋان ھۆكۈمىتىنىڭ دۆلەتنى بۇ ئۇرۇش ئوتىنىڭ ئىچىگە چۈشۈپ كېتىشتىن ساقلىغانلىقىنى، سۇرىيە-لىۋان چېگرىسىدىكى تۇقۇنۇشلارغا لىۋان ئاللاھ پارتىيسى قۇراللىقلىرىنىڭ مەسئۇل ئىكەنلىكىنى ئېيتىپ، چېگرىدىكى مۇساپىلار لاگېرىنىڭ تۈرلۈك سەۋەبلەر بىلەن ئىچكى تەرەپكە يۆتكىلىشىنى رەت قىلىۋاتىدۇ، سۇرىيەلىكلەر ئارسەل رايۇنىدىن ئايرىلىپ بەكادىكى لاگېرغا ئورۇنلىشىشقا مەجبۇر، ئەمما بۇنىڭ ئۈچۈن ماددى ياردەم لازىم، كۇۋەيتتە ئېچىلىدىغان يىغىندا بۇ ئېھتىياجنى قامداشقا تىرىشىمىز» دېدى.
سۇرىيە ئۆكتىچى ۋە ئىنقىلابچى كۈچلەر ئىتتىپاقى باشلىقى خالىد غوجا، ئەركىن سۇرىيە ئارمىيىسىنىڭ پەقەت ئەسەد ھۆكۈمىتى بىلەن ئەمەس، ئىران ئىشغالىيتى ۋە ئىراق-شام ئىسلام دۆلىتى ئەسەبىي تەشكىلاتىغا قارشى ئۇرۇش قىلىۋاتقانلىقىنى تەكىتلىگەن. ئەسەدنىڭ پەقەت ئىراننىڭ پىلانلىرىنى ئىجرا قىلىدىغان بىر خادىم ئىكەنلىكىنى ئېيتقان. خالىد غوجا، ئىراننىڭ بۇنىڭدىن كېيىن ئەسەدنى كۆتۈرۈپ بولالمايدىغانلىقىنى ۋە ۋاقتى كەلگەندە نۇرى مالىكىغا ئوخشاش ئۇنى يالغۇز قويىدىغانلىقىنى ئېيتقان.