مېترو 1- لىنىيەسىدىكى 23 نۇقتىدا بۇ يىل ئىش باشلىنىدۇ

جاۋ چۈنخۇا

مۇخبىرنىڭ 20- مارت ئۆتكۈزۈلگەن 2015- يىللىق ئۈرۈمچى شەھىرىنىڭ رېلىسلىق قاتناش قۇرۇلۇشى خىزمىتى يىغىنىدىن ئۇقۇشىچە، ئۈرۈمچى شەھىرىنىڭ رېلىسلىق قاتناش قۇرۇلۇشىغا بۇ يىل 4 مىليارد 207 مىليون يۈەن مەبلەغ سېلىنىدىكەن. مېترو 1- لىنىيەسى قۇرۇلۇشىدا بۇ يىلنىڭ ئالدىنقى يېرىمىدا پىلان بويىچە تۇرۇبا لىنىيەسىنى يۆتكەش، دەل - دەرەخلەرنى كۆچۈرۈپ تىكىش، قاتناش لىنىيەسىنى ئۆزگەرتىش، يەر يۈزىدىكى قوشۇمچە بۇيۇملارنى يۆتكەش ۋە يەر ئېلىش - كۆچۈرۈش خىزمەتلىرى تاماملىنىدىكەن؛ 23 نۇقتىدا يېڭىدىن قۇرۇلۇش باشلاش پىلانغان بولۇپ، جەنۇبىي شەھەر رايونى دۆڭكۆۋرۈك بېكىتى، شىنجاڭ ئۇنىۋېرسىتېتى بېكىتى، ئاققوۋۇق بېكىتى، تۆگەدەڭ بېكىتى، يېكەنكۆل مەيدانى بېكىتىدىن ئىبارەت بەش مېترو بېكىتىدە قۇرۇلۇش باشلىنىدىكەن ھەم مۇھاپىزەت قوزۇق تېمى ۋە لىم قېقىش، قېزىلغان مېترو بېكىتى ئورنىنىڭ ئۈستۈنكى قۇرۇلۇشى تاماملىنىدىكەن.
يىغىندا، ئۈرۈمچى شەھەرلىك رېلىسلىق قاتناش قۇرۇلۇشى ئىشخانىسى(شەھەر رېلىس گۇرۇھى) بېيجىڭ رېلىس قۇرۇلۇشىنى باشقۇرۇش شىركىتىنىڭ 5 - تۈرىنى باشقۇرۇش مەركىزى جۇڭگو تۆمۈريول 20- ئىدارىسى گۇرۇھى چەكلىك شىركىتى ۋە جۇڭگو تۆمۈريول 1 - چارلاش - لايىھەلەش يۇرتى، جۇڭگو تۆمۈر يول 4 - ئىدارىسى گۇرۇھى چەكلىك شىركىتى بىلەن رېلىسلىق قاتناش قۇرۇلۇشى پاكلىق قۇرۇلۇشى مەسئۇلىيەتنامىسى ۋە بىخەتەر ئىشلەپچىقىرىش مەسئۇلىيەتنامىسى ئىمزالىدى.
بېيجىڭ رېلىسلىق قاتناش قۇرۇلۇشلىرىنى باشقۇرۇش چەكلىك شىركىتىنىڭ باش دىرېكتورى دىڭ شۇكۇي مۇنداق دېدى: 2015- يىل ئۈرۈمچى شەھىرىنىڭ رېلىسلىق قاتناش قۇرۇلۇشىدىكى ئاچقۇچلۇق يىل ۋە ئۆتكەلگە ھۇجۇم قىلىش يىلى، ئۇ مېترو 1 - لىنىيەسىنىڭ «2018- يىلى تىرىشىش، 2019- يىلى قاتناش باشلاشقا كاپالەتلىك قىلىش» نىشانىغا ئوڭۇشلۇق يېتىش بىلەن مۇناسىۋەتلىك. بۇ يىل بىز 2014- يىللىق قۇرۇلۇش ئومۇمىي ئەھۋالى ۋە ئۈرۈمچى شەھىرىنىڭ قۇرۇلۇش ئالاھىدىلىكىگە بىرلەشتۈرۈپ، قۇرۇلۇشنى ئالدىن ياخشى پىلانلايمىز، ئۈرۈمچىنىڭ ئۈنۈملۈك قۇرۇلۇش قىلىش ۋاقتى قىسقا، ئەمگەك كۈچى بايلىقى كەمچىل، يەر قۇرۇلمىسى مۇرەككەپ بولۇشتەك قىيىنچىلىقلارنى ئويلىشىپ، بىخەتەرلىك، سۈپەت، ئىقتىدار، تەننەرخ، مۇھىتقا كاپالەتلىك قىلىش كۆزلىمە نىشانىدا چىڭ تۇرۇپ، ئۈلگە قۇرۇلۇشى يارىتىمىز.