جاھان ئاگېنتلىقى 24-فېۋرال خەۋىرى؛ لەگلەك تورى تەرجىمىسى: ئافغانىستان ئ‍ىجرا ھەيئىتى باشلىقى ئابدۇللاھ ئابدۇللاھ، تالىبان بىلەن تىنچلىق سۆھبىتى ئۇچرىشىشىنى يېقىندا باشلايدىغانلىقىنى ئېيتتى، ئۇ«ئۇچرىشىشلاردا مىللىي مەنپەئەتلىرىمىز ئاساس بولىدۇ» دېدى. ئابدۇللاھ ئافغانىستان مىنىستىرلار كومىتىتىغا سۆز قىلىپ، تالىبان بىلەن بولغان تىنچلىق سۆھبىتىنىڭ دۆلەتنىڭ مىللىي مەنپەئەتلىرىگە ئاساسەن يۈرگۈزۈلىدىغانلىقىنى تىلغا ئالدى. ئابدۇللاھ،«خەلقىمىز تىنچلىق سۆھبەتلىرىنىڭ باشلىنىدىغانلىقىدىن، ئورنى ۋە يېڭى ئۆزگىرىشلەردىن خەۋەردار بولىدۇ. بۇ سۆھبەتتە ئافغانىستان مىللىي مەنپەئەتى ئاساس قىلىنىدۇ. تىنچلىق ئافغانىستان خەلقىنىڭ ئارزۇسى، ئەمما تىنچلىق ئۈچۈن ئالدىنقى يىللاردا قولغا كەلتۈرگەن غەلبىلەر قۇربان بولمايدۇ» دېدى.

ئابدۇللاھ، تىنچلىق سۆھبىتىنىڭ باشلىنىشىنىڭ ئافغانىستان خەلقى ئۈچۈن ياخشى بىر خۇش-خەۋەر ئىكەنلىكىنى تىلغا ئېلىپ،«پاكىستان تەرەپ، ئافغانىستان قوراللىق كۈچلىرىگە ھۆكۈمەت بىلەن تىنچلىق سۆھبىتى ئۆتكۈزۈشنى ۋە بۇنىڭدىن باشقا ھېچبىر چارىنىڭ يوقلىقىنى ئېيتقان ئىدى. ئافغانىستاندا تىنچلىقنىڭ كاپالەتكە ئېرىشىشى ھەققىدە پاكىستاننىڭ يېڭى كۆز-قاراشلىرى بىلەن دۆلىتىمىزدە تىنچلىقنىڭ كاپالەتكە ئىگە بولىدىغانلىقىنى ئۈمىد قىلىمەن» دەپ ئىپادە بىلدۈردى.

ئافغانىستان پرېزىدېنتى مۇھەممەد ئەشرەف غەنى ئالدىنقى كۈنى تالىبان بىلەن تىنچلىق سۆھبىتىنىڭ توغرا بىر شەكىلدە ئىلگىرلىگەنلىكىنى تەكىتلەپ، بۇ تېمىغا ئالاقىدار تېخىمۇ كۆپ مەلۇمات بېرەلمەيدىغانلىقىنى ئېيتقان ئىدى. ئافغانىستان ھۆكۈمىتى بۇنىڭدىن ئالدىنقى يىللاردىمۇ نۇرغۇن قېتىم تالىبان بىلەن تىنچلىق سۆھبىتى باشلاش ئۈچۈن تىرىشچانلىق كۆرسەتكەن ئىدى، بۇ دائىرىدە تىنچلىق كومىتىتى قۇرۇلۇشغا ئالاقىدار بىرەر نەتىجىگە ئېرىشەلمىگەن ئىدى. ئافغانىستان دائىرلىرى پاكىستاننىڭ ئافغانىستان تالىبانلىرىغا ياردەم قىلىدىغانلىقىنى ئىلگىرى سۈرۈپ، دۆلەتتە تىنچلىقنىڭ كاپالەتكە ئىگە بولۇشىنىڭ پاكىستاننىڭ قولىدا ئىكەنلىكى داۋا قىلغان، ئەمما پاكىستان بۇ داۋانى رەت قىلغان ئىدى. تۇنجى قېتىم ئۆتكەن ھەپتە پاكىستان باش شىتاب باشلىقى گېنىرال راھىل شەرىف ئافغانىستاندا تىنچلىقنىڭ كاپالەتكە ئېرىشىشى ئۈچۈن ئافغان ھۆكۈمىتىنى قوللايدىغانلىقىنى تەكىتلەپ، «ئافغانىستاننىڭ دۈشمىنى پاكىستاننىڭمۇ دۈشمىنىدۇر» دەپ ئىپادە بىلدۈرگەن ئىدى.