خەلقئارادا نېفىت باھاسى يېڭى يىل كىرگەندىن بۇيان داۋاملىق چۈشۈپ، بىر نەچچە سودا كۈنىدە ھەر تۇڭ نېفىتنىڭ باھاسى 50 دوللارغا يېقىن چۈشتى. تەھلىلچىلەر، ‹‹نېفىت باھاسىنىڭ چۈشۈشى كەلگۈسىدە يېڭى تۇراقلىق ھالەتكە ئايلىنىشى مۇمكىن›› دېدى. بۇ، جۇڭگونى ئۆز ئىچىگە ئالغان نېفىت كۆپ ئىستېمال قىلىنىلىدىغان نۇرغۇن چوڭ دۆلەتنىڭ ئىقتىسادىغا پايدىلىق.

2014 – يىلى ئىيۇندىكى ئەڭ يۇقىرى باھاغا سېلىشتۇرغاندا، خەلقئارادا نېفىت باھاسى يېرىم ھەسسىدىن كۆپرەك چۈشۈپ كەتتى. نېفىت باھاسىنىڭ چۈشۈشىگە ئاساسلىقى نېفىت ئىشلەپچىقىرىشنىڭ ئېھتىياجدىن ئېشىپ كەتكەنلىكى سەۋەب بولدى. بىر تەرەپتىن، نېفىت ئېكسپورت قىلغۇچى چوڭ دۆلەتلەر نېفىت ئىشلەپچىقىرىشنى تېزلەتكەنلىكتىن، دۇنيادا نېفىتنىڭ مىقدارى ئېشىپ كەتتى؛ يەنە بىرتەرەپتىن، دۇنيا ئىقتىسادىنىڭ ئېشىش سۈرئىتىنىڭ ئاستىلىشى نېفىتقا بولغان ئېھتىياجنى بوغۇپ قويدى.

نېفىت باھاسى ھازىر بارغانسېرى چۈشمەكتە. لېكىن، دۇنيادىكى ئاساسلىق نېفىت ئېكسپورت قىلغۇچى رايونلار نېفىت ئىشلەپچىقىرىش ئىقتىدارىنى داۋاملىق ساقلاپ كەلمەكتە ياكى كۆپەيتمەكتە. سانلىق مەلۇماتلارغا قارىغاندا، ئامېرىكا ھازىركۈنىگە ئوتتۇرا ھېساب بىلەن 9 مىليون تۇڭ نېفىت ئىشلەپچىقىرىپ، تارىختىكى ئەڭ يۇقىرى سەۋىيەنى ياراتتى. رۇسىيە دۇنيادىكى نېفىت ئېكسپورت قىلغۇچى ئەڭ چوڭ دۆلەت بولۇش سۈپىتى بىلەن، بۇ يىلمۇ 2014 – يىلىدىكى نېفىت ئىشلەپچىقىرىش مىقدارىنى داۋاملىق ساقلاپ قالىدىغانلىقىنى جاكارلىدى. دۇنيا نېفىت بازىرىنىڭ ئۈچتىن بىر ئۈلۈشىنى ئىگىلەيدىغانOPEC (نېفىت ئېكسپورت قىلغۇچى دۆلەتلەر تەشكىلاتى)مۇ نېفىت ئىشلەپچىقىرىش مىقدارىنى ئازايتمايدىغانلىقىنى جاكارلىدى.

تەھلىلچىلەر مۇنداق دېدى: ئىقتىسادىي تەرەققىياتنىڭ تۈرتكىسىدە، ئېنېرگىيەگە بولغان ئېھتىياج تېخىمۇ ئاشىدۇ. جۇڭگو ئىقتىسادىنىڭ ئېشىش سۈرئىتى ئىلگىرىكى يىللاردىكىدىن سەل ئاستىلىغان بولسىمۇ، %7لىك ئېشىش سۈرئىتى پۈتۈن دۇنيا ئۈچۈن ئېيتقاندا يەنىلا يۇقىرى سەۋىيە ھېسابلىنىدۇ. سانائەت ھازىر ۋە كەلگۈسىدە جۇڭگو ئىقتىسادىنىڭ ئېشىشىغا تۈرتكە بولىدىغان ئاساسلىق كۈچ. بۇ جۇڭگونىڭ ئېنېرگىيەگە بولغان ئېھتىياجىنىڭ ئۈزلۈكسىز ئاشىدىغانلىقىدىن دېرەك بېرىدۇ.

جۇڭگونىڭ ياسىمىچىلىق كەسپى ئۈچۈن ئېيتقاندىمۇ، نېفىت باھاسىنىڭ چۈشۈشى ياخشى ئىش. مەلۇم مەنىدىن ئېيتقاندا، بۇ كارخانىلارنىڭ بېجىنى كېمەيتكەنلىك بىلەن باراۋەر بولۇپ، كارخانىلارنىڭ پايدا ئېلىش ئىقتىدارىنى ئۆستۈرۈشكە پايدىلىق.