ئامېرىكا ‹‹ۋاشىنگىتون كۈندىلىك پوچتا گېزىتى›› نىڭ 4-فېۋرال خەۋەر قىلىشىچە، رۇسىيە كرېمل سارىيى ئاخبارات باشقارمىسىنىڭ بىلدۈرۈشىچە، رۇسىيە زۇڭتۇڭى پۇتىن 9-فېۋرالدىن 10-فېۋرالغىچە مىسىردا زىيارەتتە بولۇپ ، ئىككى دۆلەت مۇناسىۋىتىنى ئىلگىرى سۈرۈش توغرىسىدا سۆھبەت ئېلىپ بارىدىكەن .

خەۋەردە دېيىلىشىچە، يېقىندا ئېلىپ بېرىلىدىغان رۇسىيە-مىسىر يۇقىرى دەرىجىلىكلەر سۆھبىتىدە ، ئىككى دۆلەت رەھبەرلىرى ئوتتۇرا شەرق ۋە شىمالىي ئافرىقا رايونى ۋەزىيىتى قاتارلىق مەسىلىلەر ئۈستىدە پىكىر ئالماشتۇرىدىكەن، ئۇندىن باشقا يەنە ئىراق، سۇرىيە، لىۋىيە ۋە پەلەستىن بىلەن ئىسرائىلىيە مۇناسىۋىتى قاتارلىق ئىككى تەرەپ ئورتاق كۆڭۈل بۆلىدىغان مەسىلىلەردىمۇ سۆھبەتلىشىدىكەن.

بۇنىڭدىن بۇرۇن مىسىرنىڭ رۇسىيەدە تۇرۇشلۇق باش ئەلچىسى مۇھەممەد بادرى مۇنۇلارنى بىلدۈرگەن: مىسىر تەرەپ ياۋروپا-ئاسىيا ئىقتىساد ئىتتىپاقى ئەركىن سودا رايونى قۇرۇش سۆھبىتىگە قاتنىشىشنى ئارزۇ قىلىدۇ.

2014-يىلى رۇسىيە -مىسىر ئىككى دۆلەتنىڭ سودا سوممىسى 3 مىليارد ئامېرىكا دوللىرىغا يەتكەن بولۇپ، رۇسىيە مىسىرغا ئاشلىقنى ئاساس قىلغان ھالدا باشقا بۇيۇملارنى ئېكسپورت قىلغان. بۇنىڭ ئىچىدە مىسىرنىڭ رۇسىيەگە قىلغان ئېكسپورت سوممىسى 250 مىڭ ئامېرىكا دوللىرىغا يەتكەن.