2015 – يىلى ئۈرۈمچى شەھىرىگە ئاممىۋى ئىجارىلىك ئۆيدىن 9500 يۈرۈش، ئەرزان، قولاي ئۆيدىن 2000 يۈرۈش بولۇپ، جەمئىي 11 مىڭ 500 يۈرۈش تۇرالغۇ كاپالەت ئۆيى سېلىش پىلانلاندى.

22 – يانۋار مۇخبىرنىڭ ئۈرۈمچى شەھەرلىك تۇرالغۇ كاپالەت ۋە ئۆي-مۈلۈك باشقۇرۇش ئىدارىسىدىن ئىگىلىشىچە، نۆۋەتتە ئۈرۈمچى شەھىرىدە ئەرزان ئىجارىلىك ئۆي ۋە ئاممىۋى ئىجارىلىك ئۆينى ھەر تەرەپلىمە بىرىكتۈرۈش ئەمەلگە ئاشۇرۇلغان بولۇپ، بۇنىڭدا مەبلەغ توپلاش، ئىلتىماس قىلىش – تەكشۈرۈش، نۆۋەت بىلەن تەقسىملەش، كېيىنكى باسقۇچلۇق باشقۇرۇش قاتارلىقلارنىڭ ھەممىسى بىر گەۋدىلەشتۈرۈلىدىكەن.

بىرىكتۈرۈلگەندىن كېيىن، ئەرزان ئىجارىلىك ئۆي بىلەن ئاممىۋى ئىجارىلىك ئۆي ئومۇملاشتۇرۇلۇپ ئاممىۋى ئىجارىلىك ئۆي دېيىلىدىكەن، يەككە يۈرۈشلۈك تۇرالغۇ ئۆي كۆلىمى 35 كىۋادرات مېتىردىن 60 كىۋادرات مېتىرغىچە بولىدىكەن.

نۆۋەتتە، ئۈرۈمچى شەھىرىدە ئەرزان ئىجارىلىك ئۆي ئاساسلىقى تۆۋەن كىرىملىك ئائىلىلەرگە قارىتىلغان، ئاممىۋى ئىجارىلىك ئۆي بولسا ئوتتۇرا دەرىجىلىك ۋە ئۇنىڭدىن سەل تۆۋەن كىرىملىك ئائىلىلەر، يېڭىدىن خىزمەتكە چىققانلار ۋە سىرتتىن كەلگەن ئىشلەمچىلەرگە قارىتىلغان.

بىرىكتۈرۈش ئىشقا ئاشۇرۇلغاندىن كېيىن، ئەرزان ئىجارىلىك ئۆيدە تۇرۇۋاتقانلارنىڭ كىرىمى ئەگەر ئىلتىماس قىلىش ئۆلچىمىدىن ئېشىپ كەتسە، لېكىن ئاممىۋى ئىجارىلىك ئۆي كاپالەت دائىرىسىگە كىرسە، ئۇنداقتا بۇنداق ئائىلىلەر ھازىرقى تۇرۇۋاتقان ئۆيىدىن كۆچمىسىمۇ بولىدۇ، لېكىن ئىجارە ھەققىدە ئەرزان ئىجارىلىك ئۆي ئېتىباردىن بەھرىمەن بولالماي، ئاممىۋى ئىجارىلىك ئۆينىڭ ئىجارە ھەققى ئۆلچىمى بويىچە ھەق تۆلەيدۇ. بۇنداق قىلغاندا ئىككى خىل توپتىكى تۇرالغۇ كاپالىتىدىن بەھرىمەن بولۇۋاتقانلارنى يوچۇقسىز تۇتاشتۇرۇشنى ئەمەلگە ئاشۇرۇپ، ئۆزئارا ئالماشتۇرۇشقا قولايلىق ياراتقىلى بولىدۇ.

ئۈرۈمچى شەھىرىدە 2007 – يىلىدىن باشلاپ تۇرالغۇ كاپالەت خىزمىتى ئىشقا كىرىشتۈرۈلگەن بولۇپ، نۆۋەتكىچە تۇرالغۇ كاپالەت ئۆيىدىن جەمئىي 71400 يۈرۈش قۇرۇلۇپ، 24057 كىشى تۇرالغۇ كاپالەت ئۆيىگە كۆچۈپ كىرگەن.