«رۇسىيە داژې باشنى تورىنىڭ 19-يانۋاردىكى خەۋىرى» ياۋروپا يەھۇدىيلىرى چوڭ قۇرۇلتىيىنىڭ باشلىقى ۋېياچېسلاۋ كانتور پۇتىنغا:«ياۋروپا يەھۇدىيلىرى 2-دۇنيا ئۇرۇشىدىن بۇيانقى ئەڭ يامان ئەھۋالغا دۇچ كەلدى، يەھۇدىيلارغا قارشى تۇرۇش سادالىرى پەلەككە يەتكەنلىكتىن ۋە مۇسۇلمان كۆچمەنلەر شىددەت بىلەن كۆپەيگەنلىكتىن يەھۇدىيلار تەرەپ-تەرەپكە پىتىراپ كېتىشكە مەجبۇر بولماقتا» دېدى، ئاغرىنغان ھالدا. پۇتىن ئۇنىڭ پىكىرگە ئىنكاس قايتۇرۇپ:«ئۇنداق بولسا رۇسىيەگە قايتىپ كېلىڭلار» دېدى.

      19-يانۋار، پۇتىن ياۋروپا يەھۇدىيلىرى چوڭ قۇرۇلتىيىنىڭ ۋەكىللىرى بىلەن كۆرۈشكەن ۋاقىتتا، سابىق سوۋېت ئىتتىپاقىدىن قېچىپ كەتكەن بىر تۈركۈم يەھۇدىيلارنىڭ تارىخىنى ئەسلەپ چىقتى. ئۇ تەبەسسۇم قىلغىنىچە:«قايتىپ كېلىڭلار» دېدى.

       پۇتىن سۆزىنى تولۇقلاپ:«مەن كۆرگەن بىر قىسىم خەۋەرلەردە، ھازىر ياۋروپادا ياشاۋاتقان يەھۇدىيلارنىڭ ھەتتا ئاممىۋى سورۇنلاردا ئۆزىنىڭ ئەنئەنىۋى تەلپىكىنى كىيىشكىمۇ پېتىنالمايدىغانلىقى، ئۆزىنىڭ مىللەت تەۋەلىكىنى يوشۇرۇشقا تىرىشىدىغانلىقى، يېزىلىپتۇ» دېدى. بىراق پۇتىن، ياۋروپانىڭ ھەممە يېرىدە بۇنداق ئەھۋالنىڭ مەۋجۇت بولۇشىدىن گۇمان قىلىدىغانلىقىنى بىلدۈرگەن.

      پۇتىن رۇسىيەدىكى يەھۇدىيلارنىڭ مەدەنىيەت ۋە دىن ساھەسىگە ئاكتىپلىق بىلەن تۆھپە قوشۇۋاتقانلىقىنى كۆرسىتىپ ئۆتكەن. ئۇ يەنە يېقىندىلا رۇبليافۇكاغا يېڭىدىن يەھۇدى دىنى ئىبادەتخانىسى سېلىنغانلىقىنى تىلغا ئالغان ھەمدە يېڭىدىن سېلىنغان يەھۇدىي دىنى ئىبادەتخانىسىنى كۆرۈپ كېلىشكە ۋەدە بەرگەن. پۇتىن ئىلگىرى 2015- يىلى 1- ئاينىڭ ئاخىرى موسكۋادىكى يەھۇدىيلار مۇزېيىدا ئوسۋېنتسىم جازا لاگېرىنى ئازاد قىلغانلىقىنىڭ 70 يىللىق خاتىرىلەش پائالىيىتى ئۆتكۈزىدىغانلىقىنى ئېيتقان.

يېقىندا بۇيان ياۋروپادا يەھۇدىيلارغا ھۇجۇم قىلىش ۋەقەلىرى كۆپىيىپ قالغان. تاراتقۇلارنىڭ خەۋىرىگە قارىغاندا، مۇشۇنداق ھۇجۇم قىلىش ۋەقەلىرىنى كۆزدە تۇتۇپ يەھۇدىي دىنى باستېرلىرى ئۆزىنى قوغداش ۋە يارىدارلارنى جىددىي قۇتقۇزۇش ماھارەتلىرىنى ئۆگىنىشكە باشلىغان. 2015- يىلى 1-ئاينىڭ 16-كۈنى، ياۋروپادىكى يەھۇدىيلار چوڭ قۇرۇلتىيى، ياۋروپادىكى قانۇن چىقىرىش ئورگانلىرىغا يەھۇدىيلارنىڭ يېنىدا قورال ئېلىپ يۈرۈپ ئۆزىنى قوغداشقا يول قويۇشقا مۇراجىئەت قىلغان.

     ياۋروپا يەھۇدىيلار چوڭ قۇرۇلتىيى 1986- يىلى قۇرۇلغان خەلقئارالىق قانۇنسىز تەشكىلات بولۇپ، ياۋروپادىكى 42 دۆلەتكە تارقالغان يەھۇدىيلارنىڭ مەنپەئەتىگە ۋەكىللىك قىلىدۇ.