ئامېرىكىدىكى ئېبولا ۋىرۇسى بىلەن يۇقۇملانغان ئاخىرقى بىمار ساقىيىپ دوختۇرخانىدىن چىقتى (ماتېرىيال سۈرەت)

جۇڭگو ئاخبارات ئاگېنتلىقى ، ۋاشىنگتون ، 26-نويابىر تېلېگراممىسى : 26-نويابىر ئامېرىكا دۆلەتلىك سەھىيە تەتقىقات يۇرتى (NIH) تۇنجى ئېبولا ۋاكسىنىسىنىڭ كىلىنىكىلىق تەجرىبىدىن مۇۋەپپەقىيەتلىك ئۆتكەنلىكىنى ، ئۇنىڭ بىخەتەر، ئۈنۈملۈك ئىكەنلىكى ئىسپاتلانغانلىقىنى جاكارلىغان .

بۇ ئۇتۇق شۇ كۈنى ئامېرىكىنىڭ بىر تېببىي ژۇرنىلىغا بېسىلغان . ماقالىدە دېيىلىشىچە ، NIH قارىمىقىدىكى زىيادە سەزگۈرلۈك ۋە يۇقۇملۇق كېسەللىكلەر تەتقىقات ئورنى بىلەن GSK شىركىتىنىڭ تەتقىقاتچى خادىملىرى ئېبولا ۋىرۇسىدىن قىسمەن گېن ئېلىپ ، ئۇنى ئادەم ئورگانىزمى ھۈجەيرىسىگە كۆچۈرگەندىن كېيىن ، ئەڭ ئاخىرىدا بۇ ۋاكسىنىنى ياساپ چىققان .

ئىگىلىنىشىچە ، بۇ ۋاكسىنا ئالدى بىلەن ھايۋانات تېنىدە سىناقتىن ئۆتكەندىن كېيىن ، تەتقىقات خادىملىرى سېنتەبىردىن باشلاپ مارىلاند ئىشتاتىدىكى NIH كىلىنىكا مەركىزىدە ئادەم تېنىگە سىناق قىلغان . تۇنجى تۈركۈمدە 18 ياشتىن 50 ياشقىچە بولغان 20 نەپەر پىدائىيغا بۇ ۋاكسىنا ئەملەنگەندىن كېيىن ، ئۇلارنىڭ ئىممۇنىتېت سىستېمىسىدا ئېبولا ۋىرۇسى ئانتىتېلاسى پەيدا بولغان . بۇنىڭ بىلەن بىر ۋاقىتتا ، بىر قىسىم پىدائىيلارنىڭ تېنىدە ئانتىۋىرۇس ئىممۇنلۇق ھۈجەيرىسى پەيدا بولغان ، بۇ يەنە ‹‹T-ھۈجەيرە ›› دەپمۇ ئاتىلىدىغان بولۇپ ، بۇ خىل ھۈجەيرە ئادەم تېنىنىڭ ئېبولا ۋىرۇسى بىلەن يۇقۇملىنىشىنى ئۈنۈملۈك توسۇيدىكەن . تەتقىقات نەتىجىسىدە يەنە بۇ ۋاكسىنىنىڭ كۆرۈنەرلىك ئەكس تەسىرى يوقلۇقى بايقالغان . پەقەت ئىككى پىدائىيغا ۋاكسىنا سۇيۇقلۇقى سەل كۆپ ماڭدۇرۇلغانلىقتىن قىسقا ۋاقىت قىزىغان .

ئىگىلىنىشىچە ، پىدائىيلارنىڭ تېنىدە ئانتىۋىرۇس ئىممۇنلۇق ھۈجەيرىسىنىڭ پەيدا بولۇشى ئاكتىپ سىگنال ئىكەن . تەتقىقات خادىملىرى ئامېرىكا ۋە غەربىي ئافرىقىدا بۇ ۋاكسىنىنىڭ بىخەتەرلىكى ھەققىدە يەنىمۇ ئىلگىرىلەپ سىناق ئېلىپ بارىدىكەن .

گەرچە بۇ ۋاكسىنىنىڭ بىخەتەر ۋە ئۈنۈملۈك ئىكەنلىكى ئىسپاتلانغان بولسىمۇ ، لېكىن تەتقىقات نەتىجىسىدىن ئادەم تېنى ئىمۇنىتېت سىستېمىسىنىڭ كۆپ مىقداردىكى ۋاكسىنا بولغاندىلا ئاندىن يېتەرلىك ئانتىتېلا پەيدا قىلالايدىغانلىقى مەلۇم بولغان بولۇپ ، بۇ قىسقا مۇددەت ئىچىدە بۇ ۋاكسىنا ئىشلەپچىقىرىشىنىڭ ئېھتىياجنى قامدىيالمايدىغانلىقىدىن دېرەك بېرىدۇ .

ئامېرىكا ئاق ساراي 26-نويابىر بانايات ئېلان قىلىپ NIH كوللېكتىپىنىڭ ۋاكسىنا تەتقىقاتىدا قولغا كەلتۈرگەن بۇ ‹‹ئابىدە›› خاراكتېرلىك نەتىجىسىنى تەبرىكلىگەن . باياناتتا يەنە ئامېرىكا زۇڭتۇڭى ئوبامانىڭ 2-دېكابىر NIH نىڭ باش تەتقىقات يۇرتىغا بارىدىغانلىقى ئېيتىلغان .