بەش كۈن داۋاملىشىدىغان 2014 – يىللىق شىنجاڭنىڭ داڭلىق، ئالاھىدە، شۇنداقلا ئىنچىكە پىششىقلاپ ئىشلەنگەن يېزا ئىگىلىك مەھسۇلاتلىرى شاڭخەي كۆرگەزمىسىدە 4 مىليارد 600 مىڭ يۈەنلىك كېلىشىم ئىمزالاندى.

كۆرگەزمە مەزگىلىدە شاڭخەي غەربىي شەھەر ئەتراپى خەلقئارا يېزا ئىگىلىك مەھسۇلاتلىرى كۆرگەزمىسى بىۋاسىتە سېتىش مەركىزى ۋە شىنجاڭ ئالاھىدە يېزا ئىگىلىك مەھسۇلاتلىرى كۆرگەزمە مەركىزى قاتارلىق ئىككى سورۇندا مەھسۇلاتلار ئوبدان بازار تاپتى. كۆرگەزمىگە قاتناشقان شىنجاڭ كارخانىلىرى، شاڭخەي، چاڭجياڭ دېلتا رايونى، شۇنداقلا شەرقىي جۇڭگو رايونىدىكى يېزا ئىگىلىكىنى كەسىپلەشتۈرۈش بويىچە 200 نەچچە باشلامچى كارخانا، چوڭ تىپتىكى توپ تارقىتىش بازىرى، تاللا بازارلىرىنىڭ مال سېتىۋېلىش سودىگەرلىرى بىلەن كەڭ تۈردە ئالاقە باغلاش ھەم كېڭىشىش ئارقىلىق، يېزا ئىگىلىك مەھسۇلاتلىرىنى سېتىۋېلىش، شۇنداقلا ھەمكارلىشىش كېلىشىمى ئىمزالىدى.

دەسلەپكى ئىستاتىستكىغا قارىغاندا، بۇ قېتىملىق كۆرگەزمىدە يېزا ئىگىلىك مەھسۇلاتلىرىنى سېتىۋېلىش، شۇنداقلا ھەمكارلىشىش مۇددىئانامىسىدىن 90 پارچە ئىمزالىنىپ، كېلىشىم ئومۇمىي سوممىسى 4 مىليارد 600 مىليون يۈەن بولغان، بۇنىڭ ئىچىدە يېزا ئىگىلىك مەھسۇلاتلىرىنى سېتىۋېلىش مۇددىئانامىسىدىن 52 پارچە ئىمزالىنىپ، كېلىشىم سوممىسى 2 مىليارد 100 مىليون يۈەن بولغان؛ يېزا ئىگىلىك مەھسۇلاتلىرى بويىچە ھەمكارلىشىش مۇددىئانامىسىدىن 38 پارچە ئىمزالىنىپ، توختام ئىمزالاش سوممىسى 2 مىليارد 500 مىليون يۈەن بولغان.

بۇنىڭ ئىچىدە ئىلى تيەنياۋ بىيو پەن – تېخنىكا چەكلىك شىركىتى بىلەن شاڭخەي مېيشۇ دېھقانچىلىق تېخنىكىسى چەكلىك شىركىتى سېتىۋېلىش كېلىشىمى ئىمزالىغان بولۇپ، كېلىشىم سوممىسى 60 مىليون يۈەن بولغان؛ شىنجاڭ تيەنخۈي ھەسەلچىلىك پاي چەكلىك شىركىتى بىلەن شاڭخەي يۈەنجۇڭ ئوقەتچىلىك چەكلىك شىركىتى چەۋەندازلار ساغلاملىق كۇلۇبى ئىمزالىغان كېلىشىمنىڭ سوممىسى 180 مىليون يۈەن بولغان؛ شىنجاڭ كاڭيۈەن بىيو پەن – تېخنىكا چەكلىك شىركىتى بىلەن ئېگىزلىك جىغان مەھسۇلاتلىرى چەكلىك شىركىتى ئىمزالىغان كېلىشىمنىڭ سوممىسى 400 مىليون يۈەن بولغان.