ئۈرۈمچى شەھىرى مىچۈەن-كۆكتاغ رايونىدىكى مەلۇم ئوتتۇرا مەكتەپنىڭ ئىشخانا مۇدىرى چېن X مالىيە خادىمى تاپشۇرغان 36 مىڭ يۈەندىن ئارتۇق پۇلنى ئۆز ئالدىغا يۇتۇۋېلىپ ، بۇ پۇلغا خىزمەتداشلىرىنى مېھمان قىلغان . 6-نويابىر مۇخبىرنىڭ ئۈرۈمچى شەھىرى مىچۈەن-كۆكتاغ رايونلۇق خەلق سوت مەھكىمىسىدىن ئىگىلىشىچە ، چېن X خىيانەتچىلىك جىنايىتىگە چېتىلغاچقا ، مۇددەتلىك ئۈچ يىللىق قاماق جازاسىغا ھۆكۈم قىلىنغان .

2006-يىلى 26-مايدا ئۈرۈمچىدىكى مەلۇم ئوتتۇرا مەكتەپنىڭ ئىشخانا مالىيە خادىمى لى X يۆتكىلىپ كېتىشتىن بۇرۇن ، ئۆزى ساقلاپ كەلگەن 36830.01 يۈەنلىك چەكنى چېن X كە بېرىپ ، مەخپى نومۇرىنى ئېيتىپ بەرگەن . چېن X شۇ يىلى 2-ئىيۇن ئەسلىدىكى پۇل ۋە ئۆسۈمى بولۇپ جەمئىي 36833.55 يۈەننى ئايالى ليۇ X نىڭ بانكا كارتىسىغا يۆتكەپ ، كېيىن ئۆزىنىڭ شەخسىي نامى بىلەن خىزمەتداشلىرىنى مېھمان قىلىپ ، 36833.55 يۈەننى تۈگىتىۋەتكەن .

تۇدۇڭخابا رايونلۇق خەلق تەپتىش مەھكىمىسى خىيانەتچىلىك–پارىخورلۇققا قارشى تۇرۇش ئىدارىسى 2013-يىل 16-مايدا چېن X نى چارقىتىپ دېلو تۇرغۇزغان . دېلو تۇرغۇزۇلغاندىن كېيىن ، چېن X پۇلنىڭ ھەممسىنى قايتۇرغان . سوت مەھكىمىسى چېن X دۆلەت خادىمى تۇرۇقلۇق ، ئوتتۇرا مەكتەپنىڭ ئىشخانا مۇدىرى بولغان مەزگىلدە ، ۋەزىپىسىدىكى قولايلىقتىن پايدىلىنىپ ، مەكتەپنىڭ ساقلاشقا بېرىلگەن پۇلىنى قانۇنسىز ئىگىلىۋېلىپ ، دۆلەت خادىملىرىنىڭ كەسىپتىكى پاكلىقى ۋە جامائەت مۈلكىنىڭ ئىگىدارلىق ھوقۇقىغا دەخلى-تەرۇز قىلغان ، بۇ قىلمىشىدىن خىيانەتچىلىك جىنايىتى شەكىللىنىدۇ ، دەپ قارىغان . ئەيىبلىگۈچى ئورگان ئەيىبلەشتىكى پاكىتلارنىڭ راستلىقىنى ئىسپاتلاپ ، دېلو تۇرغۇزغان ؛ چېن X نىڭ جىنايىتىنى تونۇش پوزىتسىيەسى ياخشى بولغاچقا ھەمدە خىيانەت قىلغان پۇلنىڭ ھەممىسىنى قايتۇرغاچقا ، يېنىكلىتىپ جازا بېرىش قارار قىلىنغان .