شىنخۇا تورى، يېڭى دېھلى، 18-سېنتەبىر تېلېگراممىسى: دۆلەت رەئىسى شى جىنپىڭ 18-سېنتەبىر يېڭى دېھلىدا ھىندىستان زۇڭتۇڭى مۇكارجى بىلەن كۆرۈشتى.

شى جىنپىڭ مۇنۇلارنى بىلدۈردى: زۇڭتۇڭ مۇكارجىنىڭ مېنى ھىندىستاندا زىيارەتتە بولۇشقا تەكلىپ قىلغانلىقى ۋە ھىندىستان ھۆكۈمىتى ۋە خەلقىنىڭ بىزنى دوستانە كۈتۈۋالغانلىقى ۋە ئەتراپلىق ئورۇنلاشتۇرغانلىقىغا تەشەككۈر ئېيتىمەن. مەن بۇ قېتىمقى زىيارىتىم ئارقىلىق جۇڭگو-ھىندىستان ئىككى دۆلەتنىڭ ئالاقىسىنىڭ تولىمۇ ئۇزۇنلۇقىدىن، ئىككى دۆلەت خەلقىنىڭ چوڭقۇر دوستلۇق مېھرىگە ئىگە ئىكەنلىكىدىن قاتتىق تەسىرلەندىم.

مەن ۋە ھىندىستان رەھبەرلىرى شۇنداق قارىدۇقكى، جۇڭگو بىلەن ھىندىستان يېڭىدىن گۈللەنگەن بازار دۆلەتلىرى بولۇپ، ئىككىلىسى مىللىي گۈللىنىشنىڭ تارىخىي باسقۇچىدا تۇرماقتا، يەنە دۇنيانىڭ كۆپ قۇتۇپلىشىش مۇساپىسىدىكى مۇھىم كۈچلەردىن، جۇڭگو-ھىندىستان مۇناسىۋىتىنى تەرەققىي قىلدۇرۇشنىڭ ئىككى دۆلەتكە، ئاسىياغا، دۇنياغا بولغان ئەھمىيىتى زور. جۇڭگو-ھىندىستان ئىككى تەرەپ ئىستراتېگىيەلىك ئۆزئارا ئىشىنشنى چوڭقۇرلاشتۇرۇپ، ئەمەلىي ھەمكارلىقنى كۈچەيتىپ، خەلقئار دوستلۇقىنى كۈچەيتىپ، ئىختىلاپلارنى ئوبدان بىر تەرەپ قىلىپ، ئىككى دۆلەت مۇناسىۋىتىنى باشتىن-ئاخىر توغرا يۆنىلىشنى بويلاپ ساغلام تەرەققىي قىلدۇرۇشى كېرەك.

مۇكارجى مۇنۇلارنى بىلدۈردى: بۈگۈن، رەئىس شى جىنپىڭ بىلەن زۇڭلى مودى مول مەزمۇنلۇق سۆھبەت ئۆتكۈزۈپ، نۇغۇنلىغان مۇھىم، ئورتاق تونۇش ھاسىل قىلدى، نۇرغۇن تۈرلەردە ھەمكارلىق كېلىشىمى ئىمزالاندى، مەن بۇنىڭدىن تولىمۇ خۇشال. ھىندىستان-جۇڭگو ئىككى دۆلەتنىڭ نوپۇسىنى قوشقاندا دۇنيا نوپۇسىنىڭ ئۈچتىن بىر قىسمىنى ئىگىلەيدۇ، ئىككى دۆلەت تىنچلىقتا بىللە تۇرۇش، قول تۇتۇشۇپ تەرەققىي قىلىشنىڭ ئەھمىيىتى زور. ھىندىستان تەرەپ جۇڭگو تەرەپ بىلەن بولغان ئالماشتۇرۇش ۋە ھەمكارلىقنى كۈچەيتىپ، بىر-بىرىنىڭ مەنپەئەتىگە چېتىلىدىغان مەسىلىلەردە ئۆزئارا غەمخورلۇق قىلىشىپ، ھەل قىلىنماي كەلگەن مەسىلىلەرنى مۇۋاپىق ھەل قىلىپ، ھىندىستان بىلەن جۇڭگونىڭ تىنچلىق ۋە گۈللىنىشكە يۈزلەنگەن ئىستراتېگىيەلىك ھەمكارلىق، شېرىكلىك مۇناسىۋىتىنى ئورتاق بەرپا قىلىشنى خالايدۇ. ھىندىستان تەرەپ ئىقتىسادنىڭ تېز ئېشىشىنى تىرىشىپ ساقلاۋاتىدۇ، جۇڭگو تەرەپنىڭ ھىندىستاننىڭ ئۇچۇر كەسپى، ياسىمىچىلىق، تۆمۈر يول، تاشيول، پورت قاتارلىق قاتناش ئەسلىھەلىرى قۇرۇلۇشى ساھەلىرىگە مەبلەغ سېلىشنى زورايتىشىنى قارشى ئالىدۇ، ھىندىستان تەرەپ جۇڭگو كارخانىلىرىغا ئەۋزەل مەبلەغ سېلىش مۇھىتى يارىتىپ بېرىدۇ.

سۆھبەتتىن كېيىن، مۇكارجى شى جىنپىڭنىڭ شەرىپىگە زىياپەت بەردى، ھىندىستان زۇڭلىسى مودى، مۇئاۋىن زۇڭتۇڭ ئەنسارى قاتارلىق رەھبەرلەر ۋە ھەرقايسى ساھەلەردىكى نامدار ئەربابلار زىياپەتكە قاتناشتى. نەق مەيداندا ئىككى دۆلەتنىڭ دۆلەت شېئىرى ئورۇنلاندى. ئىككى دۆلەت باشلىقلىرى قىزغىنلىق بىلەن سۆز قىلدى.