كورىيە بىرلەشمە ئاگېنتلىغىنىڭ 17-سىنتەبىردىكى خەۋىرىگە قارىغاندا، ئامېرىكىلىق بىر ئەر 16-سىنتەبىر كەچتە كورىيە گيوڭگى ئۆلكىسىنىڭ كىمپو رايونىدا دەريادىن ئۆتۈپ چاۋشيەن تەۋەسىگە كىرمەكچى بولغاندا كورىيە ئارمىيەسى تەرىپىدىن بايقىلىپ قولغا ئېلىنغان.

خەۋەرگە قارىغاندا، بۇ ئەر 30 ياشلار چامىسىدا بولۇپ، قولغا ئېلىنغاندىن كېيىن، چاۋشيەنگە بېرىپ چاۋشيەننىڭ ئالىي رەھبىرى كىم جۇڭئۇن بىلەن كۆرۈشمەكچى ئىكەنلىكىنى ئېيتقان.كورىيە ھۆكۈمىتىنىڭ خەۋەردار ئەربابىنىڭ ئاشكارىلىشىچە، بۇ ئەر ئېقىننى بويلاپ شىمالغا قاراپ ئۈزگەن، ئاخىرىدا ھېرىپ كەتكەنلىكتىن دەريا بويىغا يامىشىپ چىققاندا كورىيە ئارمىيەسى تەرىپىدىن بايقالغان. مۇشۇنداق دەريادىن ئۆتۈپ چاۋشيەنگە بېرىشقا ئۇرۇنۇش تېخى تۇنجى قېتىملىق ئىش ئىكەن.