مۇخبىر ۋاڭ دۇڭنىڭ ئۈرۈمچى شەھەرلىك يېمەكلىك، دورىنى نازارەت قىلىپ باشقۇرۇش ئىدارىسىدىن ئىگىلىشىچە، ئۈرۈمچى شەھەرلىك يېمەكلىك، دورىنى نازارەت قىلىپ باشقۇرۇش ئىدارىسى يېقىندا ئۈرۈمچى شەھىرىنىڭ مەكتەپ ئەتراپلىرىدىكى كىنىشكىسىز تىجارەت قىلغان، تازىلىق شارائىتى لاياقەتسىز، ئوت ئۆچۈرۈش ئەسلىھەلىرى مۇكەممەل بولمىغان 111 كىچىك ئاشپۇزۇلغا ئۆزگەرتىش بۇيرۇقى چۈشۈرۈپ، مۆھلەت ئىچىدە ئۆزگەرتىشنى تەلەپ قىلغان.

ئىگىلىنىشىچە، ئۈرۈمچى شەھىرىدىكى مەكتەپلەرنىڭ ئەتراپلىرىدا 370 كىچىك ئاشپۇزۇل بولۇپ، كۆپىنچىسى ئاھالىلەر رايونىنىڭ ئىچىدە ئېچىلغان، تىجارەت ئورنى تارقاق، يوشۇرۇن، نازارەت قىلىش قىيىن بولۇش قاتارلىق مەسىلىلەر مەۋجۇت ئىكەن. يېمەكلىك مۇلازىمىتىدىكى ئىجازەتنامە ۋە سودا – سانائەت مەمۇرىي باشقۇرۇش تىجارەت ئىجازەتنامىسى ئالغان كىچىك ئاشپۇزۇللار ئومۇمىي ساننىڭ يېرىمىدىن كۆپرەكىنى ئىگىلەيدىكەن.

ئۈرۈمچى شەھەرلىك يېمەكلىك، دورىنى نازارەت قىلىپ باشقۇرۇش ئىدارىسى 8 – ئايدا مەخسۇس نازارەت قىلىپ تەكشۈرۈش خىزمىتىنى قانات يايدۇرۇپ، ھازىرغىچە 291 كىچىك ئاشپۇزۇلنى تەكشۈرۈپ، 126 ئاشپۇزۇلغا يېمەكلىك بىخەتەرلىكى تەربىيەسى بەرگەن، ئاشپۇزۇل ئېچىش شارائىتىنى ھازىرلىمىغان 111 ئاشپۇزۇلنى مۆھلەت ئىچىدە ئۆزگەرتىشكە بۇيرۇغان.

ئۈرۈمچى شەھەرلىك يېمەكلىك، دورىنى نازارەت قىلىپ باشقۇرۇش ئىدارىسى يېمەكلىك بىخەتەرلىكى قانۇن ئىجراسى تارماق ئەترىتىنىڭ مەسئۇلى مۇنداق دېدى: تەكشۈرۈشكە ھەيدەكچىلىك قىلىش جەريانىدا رايون، ناھىيەلەردىكى مەھەللە ۋە مەكتەپلەر بىلەن ھەمكارلىشىپ، شەھەردىكى ئوتتۇرا، باشلانغۇچ مەكتەپلەرنىڭ ئالدىغا ئېلان تاختىسى تەسىس قىلىپ، مەكتەپ ئەتراپىدىكى كىچىك ئاشپۇزۇللارنىڭ تارقىلىشى، سۈپىتى، مۇھىتى ۋە تىجارەتچىلەرنىڭ ئەھۋالى قاتارلىقلارنى ئېلان قىلىمىز؛ كىنىشكىسى يوق، تىجارىتى قېلىپلاشمىغانلارنى بايقىغان ھامان ئۆزگەرتىشكە بۇيرۇيمىز.