يېقىنقى يىللاردىن بۇيان ئافرىقا ئىقتىسادىنىڭ ئۇچقاندەك تەرەققىي قىلىشىغا ئەگىشىپ ھەرقايسى لىنىيىلەردىكى نۆۋەتچى ئايروپىلانلار ۋە يولۇچىلار بارغانسېرى كۆپىيىشكە باشلىغان بولۇپ، ئافرىقا ئاۋىئاتسىيە ئىشلىرى ئوتتۇرا شەرق ۋە ئاسىيادىن قېلىشقۇسىز دەرىجىدە تەرەققىي قىلماقتا، بىراق ئايروپىلانلار يوقاپ كېتىش، چۈشۈپ كېتىش ۋەقەلىرىمۇ كۆپ يۈز بېرىدىغان بولۇپ، بۇ جەھەتتە دۇنيا بويىچە بىرىنچى ئورۇندا تۇرىدۇ.

ئاۋىئاتسىيە مۇتەخەسسىسلىرىنىڭ كۆرسىتىشىچە، سىرتقى ساھەدىكىلەر گەرچە نەچچە يىلدىن بۇيان ئافرىقا ئاۋىئاتسىيە ئىشلىرىنىڭ بىخەتەرلىك دەرىجىسىنى ئۆستۈرۈش ئۈچۈن ئۇدا تىرىشىپ كەلگەن بولسىمۇ بىراق بەزى يەرلىك ئاۋىئاتسىيە شىركەتلىرى يەنىلا ئۆزى بىلگەننى قىلىپ كەلگەن بولۇپ، بىخەتەرلىك مەسىلىلىرى ھەل بولمايلا قالماستىن بەلكى بارغانسېرى ئېغىرلاشقان.

ماتېرىياللاردا كۆرسىتىلىشىچە، دۇنيا ئاۋىئاتسىيە قاتناش ترانسپورتىدا ئافرىقا ئاۋىئاتسىيىسىنىڭ ئىگىلىگەن نىسبىتى ئاران %3، بىراق ئۆتكەن يىلى يۈزبەرگەن 265 ئادەم قازا قىلغان 29 قېتىملىق ۋەقەنىڭ %20 ى ئافرىقا ئاۋىئاتسىيە قاتنىشىدا يۈز بەرگەن. ئۆتكەن يىلى يىل ئاخىردا موزامبىكتا ئېغىر ئاۋىئاتسىيە ۋەقەسى يۈزبەرگەن بولۇپ ئايروپىلاندىكى 33 ئادەمنىڭ ھەممىسى قازاغا ئۇچرىغان.

خەلقئارا ئاۋىئاتسىيە بىخەتەرلىك تورىنىڭ ئىز قوغلاپ تەكشۈرۈشىگە قارىغاندا، ئۆتكەن يىلى ئافرىقىدا جەمئىي ئالتە قېتىم ئايروپىلان ۋەقەسى يۈز بەرگەن، ھازىر بۇ سان ھەر يىلى بىر قېتىمدىن كۆپەيمەكتە. ناۋادا ئۆلۈم-يىتىم كۆرۈلمىگەن ئايروپىلان ۋەقەلىرىنى قوشۇپ ھېسابلىغاندا بۇ سان تېخىمۇ كۆپ.

ئۆتكەن يىلى ھەرقايسى ئافرىقا ئەللىرى ھۆكۈمەتلىرى ۋە ئاۋىئاتسىيە باشقۇرۇش تارماقلىرى ئېغىر ۋەقە يۈز بېرىش نىسبىتىنى 2016 –يىلىغا بارغۇچە ھازىرقى نىسبەتنىڭ يېرىمىغا چۈشۈرۈش نىشانىنى ئوتتۇرىغا قويغان، بىراق ھازىر ۋاقىتنىڭ يېرىمى ئۆتۈپ بولغان بولسىمۇ ئەھۋالدا قىلچىلىك ياخشىلىنىش بولمىغان.

خەلقئارا ئاۋىئاتسىيە ترانسپورت جەمئىيىتىنىڭ باشلىقى تونى تېيلىر ئۆتكەن يىلى ئېفىئوپىيەدە ئېچىلغان مۇھاكىمە يىغىنىغا قاتناشقاندا، ئافرىقا دۆلەتلىرىنى بىخەتەرلىك مەسىلىلىرىنى ئايروپىلان ئۇچۇشتىن بورۇن بىر تەرەپ قىلىش توغرىسىدا ئاگاھلاندۇرغان بولۇپ، يىغىندا ئۇ ئافرىقىدىكى ئاۋىئاتسىيە شىركەتلىرىنىڭ گەرچە غەرب ئەللىرىدە ئىشلەنگەن ئايروپىلاننى ئىشلىتىۋاتقان بولسىمۇ بىراق بىخەتەرلىك مەسىلىسىنىڭ ئۇدا ساقلىنىپ كېلىۋاتقانلىقى، بۇ مەسىلىلەرنىڭ ئافرىقا ئاۋىئاتسىيە قاتنىشىنىڭ ئابرۇيىغا ئېغىر تەسىر يەتكۈزۈۋاتقانلىقىنى ئېيتقان.