ئاپتونوم رايونىمىز 1998–يىلى قىرغىزىستان جۇمھۇرىيىتى بىلەن جۇڭگو – قىرغىزىستان ھۆكۈمەتلىرى ئارا ئىقتىساد– سودا ھەمكارلىق كومىتېتى شىنجاڭ – قىرغىزىستان جۇمھۇرىيىتى خىزمەت گۇرۇپپىسى مېخانىزمىنى يولغا قويغاندىن بۇيان، ئىككى تەرەپ قەرەللىك ئۇچرىشىپ، ئۆزئارا پىكىر ئالماشتۇرۇپ كەلدى. بۇ خىزمەت گۇرۇپپىسى مېخانىزمى ئىككى تەرەپنىڭ ئىقتىساد – سودا مۇناسىۋىتىنى چوڭقۇرلاشتۇرۇشتا ئاكتىپ رول ئوينىدى. سالىيېۋ تۆمۈر بۇ قېتىم ئۈرۈمچىگە خىزمەت گۇرۇپپىسىنىڭ 7–قېتىملىق يىغىنىغا قاتنىشىش ئۈچۈن ئالايىتەن كەلگەنىدى. يىغىن مەزگىلىدە، ئىككى تەرەپ ئىقتىساد – سودا، قاتناش–تىرانسپورت ، يېزا ئىگىلىكى ، تاموژنىدىن ئۆتكۈزۈش ، مەدەنىيەت ۋە ساياھەت قاتارلىق ساھەلەردىكى ھەمكارلىقنى چۆرىدەپ چوڭقۇر پىكىر ئالماشتۇردى ھەم يىغىن خاتىرىسى ئىمزالىدى .

نۇر بەكرى مۇنداق دېدى : بۇلتۇر باش شۇجى شى جىنپىڭ ئوتتۇرا ئاسىيانى زىيارەت قىلغاندا، يىپەك يولى ئىقتىساد بەلبېغىنى ئورتاق قۇرۇش تەسەۋۋۇرىنى ئوتتۇرىغا قويدى، ھازىر دۆلىتىمىز شىنجاڭنى يىپەك يولى ئىقتىساد بەلبېغى يادرولۇق رايونى قىلىپ قۇرۇپ چىقىشنى ئېنىق ئوتتۇرىغا قويدى، بۇ ئىككى تەرەپنىڭ ھەمكارلىقى ۋە ئالاقىسىنى يەنىمۇ كۈچەيتىشكە تېخىمۇ كۆپ پۇرسەت يارىتىپ بېرىدۇ. بىز يىپەك يولى ئىقتىساد بەلبېغى يادرولۇق رايونى قۇرۇش پىلانىنى يولغا قويۇشقا باشلىدۇق، بۇ پىلاننىڭ ئىككى تەرەپنىڭ ئىقتىساد–سودا، يېزا ئىگىلىكى ۋە قاتناش قاتارلىق ساھەلەردىكى ھەمكارلىقىدا غايەت زور تۈرتكىلىك رول ئوينايدىغانلىقى مۇقەررەر. ئىككى تەرەپنىڭ بۇ قېتىمقى يىغىن پۇرسىتىدىن پايدىلىنىپ، دوستلۇق ۋە ھەمكارلىقنى يەنىمۇ كۈچەيتىپ، تېخىمۇ كۆپ ساھەدە ھەمكارلىشىشىنى ئۈمىد قىلىمەن.

سالىيېۋ تۆمۈر مۇنداق دېدى: جۇڭگو قىرغىزىستان جۇمھۇرىيىتىنىڭ ئەڭ چوڭ سودا شېرىكى، جۇڭگو كارخانىلىرىنىڭ قىرغىزىستان جۇمھۇرىيىتىگە سالغان مەبلىغى ناھايىتى كۆپ نىسبەتنى ئىگىلەپ، قىرغىزىستان جۇمھۇرىيىتىنىڭ تەرەققىياتىنى زور ئىلگىرى سۈردى. ھازىر جۇڭگو بىلەن قىرغىزىستان جۇمھۇرىيىتىنىڭ ھەمكارلىقى ۋە ئالاقىسى يېڭى باسقۇچقا قەدەم قويدى، ئىككى تەرەپنىڭ بۇ قېتىمقى يىغىن ئارقىلىق، تېخىمۇ كۆپ ئورتاق تونۇش ھاسىل قىلىپ، سودا، تۆمۈر يول قۇرۇلۇشى قاتارلىق جەھەتلەردىكى ھەمكارلىقىنى كۈچەيتىشىنى ئۈمىد قىلىمەن.