ئاپتونوم رايونلۇق خەلق ھۆكۈمىتى بىلەن جۇڭگو سودا – سانائەت بانكىسى 3 – ئىيۇل پۇل مۇئامىلە مۇلازىمىتى توغرىسىدا ئىستراتېگىيەلىك ھەمكارلىق كېلىشىمى ئىمزالىدى. ئاپتونوم رايونلۇق پارتكومنىڭ مۇئاۋىن شۇجىسى، ئاپتونوم رايوننىڭ رەئىسى نۇر بەكرى كېلىشىم ئىمزالاش مۇراسىمىغا قاتناشتى.

مەركەزنىڭ 1 – قېتىملىق شىنجاڭ خىزمىتى سۆھبەت يىغىنىدىن بۇيان، جۇڭگو سودا – سانائەت بانكىسى چوڭ بانكىنىڭ مۇلازىمىتىدىكى باشلامچىلىق رولىنى تولۇق جارى قىلدۇرۇپ، ئاپتونوم رايونىمىزنى ئومۇميۈزلۈك، چوڭقۇر قاتلاملىق پۇل مۇئامىلە مۇلازىمىتى بىلەن تەمىنلىدى. ھازىر جۇڭگو سودا – سانائەت بانكىسىنىڭ ئاپتونوم رايونىمىزدىكى قەرز پۇل قالدۇقى 105 مىليارد 500 مىليون يۈەنگە يېتىپ، 2010 – يىلىدىكىدىن 65 مىليارد يۈەندىن كۆپرەك ئېشىپ، 1.6 ھەسسە كۆپەيدى؛ ئاپتونوم رايونىمىزغا بەرگەن قەرز پۇلنىڭ كۆپىيىش سۈرئىتى پۈتۈن بانكا ۋە غەربىي رايوننىڭ ئوتتۇرىچە سەۋىيەسىدىن ئىزچىل يۇقىرى بولۇپ، ئاپتونوم رايونىمىزنىڭ ئۇل ئەسلىھە قۇرۇلۇشى، ئەۋزەل بايلىقلارنى ئېچىش ۋە گۈللەنمە كەسىپلەر تەرەققىياتى، ئوتتۇرا، كىچىك كارخانىلار، ‹‹يېزا ئىگىلىكى، يېزا، دېھقانلار مەسىلىسى›› ۋە خەلق تۇرمۇشى قۇرۇلۇشىنى زور كۈچ بىلەن قوللاپ، ئاپتونوم رايونىمىزنىڭ ئىقتىسادىي، ئىجتىمائىي تەرەققىياتىغا پائال تۆھپە قوشتى.

نۇر بەكرى ئىمزا قويۇش مۇراسىمىدا مۇنداق دېدى: جۇڭگو سودا – سانائەت بانكىسى بىلەن ئىستراتېگىيەلىك ھەمكارلىق كېلىشىمى ئىمزالاش ئاپتونوم رايونىمىزنىڭ تېخىمۇ تېز ھەم ياخشى تەرەققىياتى ئۈچۈن زور ھەرىكەتلەندۈرگۈچ كۈچ ئاتا قىلىپلا قالماي، يەنە جۇڭگو سودا – سانائەت بانكىسى پاي ھەسسىدارلىق چەكلىك شىركىتىنىڭ بۇنىڭدىن كېيىنكى تەرەققىياتىغا نىسبەتەن ئېيتقاندىمۇ ئىنتايىن مۇھىم ئەھمىيەتكە ئىگە. جۇڭگو سودا – سانائەت بانكىسىنىڭ بۇ قېتىمقى كېلىشىم ئىمزالاشنى ئىككى تەرەپ ھەمكارلىقىنىڭ يېڭى پەللىسى قىلىپ، ئاپتونوم رايونىمىزنىڭ ئىقتىسادىي تەرەققىياتىنى قوللاش سالمىقىنى داۋاملىق ئاشۇرۇشىنى، بولۇپمۇ ئاپتونوم رايونىمىزنىڭ نۇقتىلىق كەسىپلەر تەرەققىياتى، نۇقتىلىق تۈرلەر قۇرۇلۇشى شۇنداقلا ‹‹يېزا ئىگىلىكى، يېزا، دېھقانلار مەسىلىسى››، كىچىك، مىكرو كارخانىلار ۋە جەنۇبىي شىنجاڭغا بولغان پۇل مۇئامىلە مەدىتىنى يەنىمۇ زورايتىپ، خەلق تۇرمۇشىنى ياخشىلاش، ئىشقا ئورۇنلاشتۇرۇشنى ئىلگىرى سۈرۈش ۋە يەرلىككە نەپ يەتكۈزۈشنىڭ جانلىق ئەمەلىيىتىگە پائال ئاتلىنىشىنى ئۈمىد قىلىمەن. ئاپتونوم رايونلۇق پارتكوم، خەلق ھۆكۈمىتى جۇڭگو سودا – سانائەت بانكىسىنىڭ ئىسلاھات ۋە تەرەققىياتىنى ئىلگىرىكىدەكلا قوللاپ، پائال پايدىلىق شارائىت ھازىرلاپ، ئەلا سۈپەتلىك ۋە يۇقىرى ئۈنۈملۈك مۇلازىمەت بىلەن تەمىنلەيدۇ. ئورتاق تىرىشىش ئارقىلىق، ئىككى تەرەپنىڭ ئىستراتېگىيەلىك ھەمكارلىق كېلىشىمىنىڭ چوقۇم ئوڭۇشلۇق يولغا قويۇلۇپ، ئىككى تەرەپنىڭ ئۈستۈنلۈكتىن ئۆزئارا پايدىلىنىش، ئۆزئارا مەنپەئەت يەتكۈزۈپ تەڭ پايدا ئېلىش، ھەمكارلىشىپ تەرەققىي قىلىشتا يېڭى سەھىپە يارىتىلىدىغانلىقىغا ئىشىنىمەن.