ئامېرىكا ئاق ساراي 22-ماي بايانات ئېلان قىلىپ ، بۇ كۈنى جۇڭگو شىنجاڭ ئۈرۈمچى شەھىرىدە يۈز بەرگەن تېررورلۇق ھۇجۇمىنى ئەيىبلىدى .

ئاق ساراينىڭ باياناتچىسى كارنېي باياناتتا ‹‹ بۇ گۇناھسىز ئاۋام پۇقراغا قارىتىلغان بىر قېتىملىق قەبىھ ھەم كىشىنى چۆچۈتىدىغان زوراۋانلىق ، تېررورلۇق ھۇجۇمى ، ئامېرىكا ھەر قانداق شەكىلدىكى تېررورىزمغا قارشى تۇرىدۇ ›› دېدى .

ئۇ يەنە : ‹‹ بىز بۇ ۋەقەدە 31 ئادەمنىڭ قازا قىلىپ ، 90 دىن ئارتۇق ئادەمنىڭ يارىلانغانلىقىنى بىلدۇق ، بىز زىيانكەشلىككە ئۇچرىغۇچىلار ۋە ئۇلارنىڭ ئائىلە تاۋابىئاتلىرى ، شۇنداقلا بۇ ۋەقەنىڭ تەسىرىگە ئۇچرىغان كىشىلەردىن ھال سورايمىز ۋە ئۇلارغا بولغان ھېسداشلىقىمىزنى بىلدۈرىمىز ›› دېدى .

بېيجىڭ ۋاقتى 22-ماي سائەت 7 دىن 50 مىنۇتلار ئۆتكەندە ، نومۇر تاختىسى يوق ئىككى ئاپتوموبىل شىنجاڭ ئۈرۈمچى شەھىرىنىڭ سايباغ رايونى باغچا شىمالىي كوچىسىدىكى ئەتىگەنلىك بازارغا باستۇرۇپ كىرىپ ، كىشىلەرنى سوقۇپ، پارتلاتقۇچنى پارتلاتتى ، 31 كىشى قازا قىلدى ، 94 كىشى يارىلاندى .