ئىسلام دىنىنىڭ ئوتتۇراھال يول تۇتۇش ئىدىيەسى مۇھاكىمە يىغىنىدىن خاتىرىلەر

مېھرىگۈل غۇپۇر

‹‹ مۇھەممەد ئەلەيھىسسالام تىنچلىقپەر بولۇشنى كۆپ قېتىم تىلغا ئالىدۇ، تىنچلىقنى مۇراجىئەت قىلىدۇ . مېنىڭچە تىنچلىقنى چۈشەنمەيدىغانلار، دىن بايرىقىنى كۆتۈرۈۋېلىپ بىگۇناھ ئادەمنى ئۆلتۈرىدىغانلار ، تىنچلىققا بۇزغۇنچىلىق قىلىدىغانلار ئىسلامغا ھەقىقىي يېقىنلاشمىغانلار، چۈشەنمەيدىغانلاردۇر ›› دېدى جۇڭگو ئىسلام جەمئىيىتىنىڭ مۇئاۋىن رەئىسى، ئاپتونوم رايونلۇق ئىسلام جەمئىيىتىنىڭ رەئىسى ئابدۇلېتىپ ئابدۇرەھىم مۇھاكىمە يىغىنىدا .

ئىسلام دىنىنىڭ ئوتتۇراھال يول تۇتۇش ئىدىيەسى مۇھاكىمە يىغىنىدا، يېشى 70 قا يېقىنلىشىپ قالغان ئابدۇلېتىپ ئابدۇرەھىم ئۆزىنىڭ تۇرمۇش سەرگۈزەشتىسىگە بىرلەشتۈرۈپ مۇنداق دېدى: ‹‹مەن جاپا–مۇشەققەتلىك كۈنلەرنى ، ئەنسىزلىك قاپلىغان كۈنلەرنى بېشىمدىن ئۆتكۈزگەن . جەمئىيەت تىنچ ، مۇقىم بولمىسا ، كىشىلەر خاتىرجەم تىرىكچىلىك قىلالمايدۇ، ھەتتا نورمال دىنىي پائالىيەتنىمۇ قىلغىلى بولمايدۇ. پارتىيە ۋە ھۆكۈمەت خەلقنى بەختلىك تۇرمۇشقا ئېرىشتۈرۈش ئۈچۈن بوشاشماي تىرىشىپ كۈرەش قىلدى. تارىخىي تەرەققىياتقا نەزەر سالساق، تارىختا ھېچبىر خاندانلىق ھەر مىللەت خەلقنى بۈگۈنكىدەك باراۋەر ھوقۇقتىن بەھرىمەن قىلىپ، چىن كۆڭلىدىن پۇقرالارنىڭ بەختىنى كۆزلەپ، كۆپچىلىكنى بۈگۈنكىدەك بەختلىك تۇرمۇشقا ئېرىشتۈرمىگەن›› .

‹‹بۇ كىچىك بالىمۇ كۆرەلەيدىغان، ھېس قىلالايدىغان پاكىت، ئەمما دىن ئەسەبىيلىرى كۆزى ئوچۇق كور بولۇۋېلىپ، توختىماي ۋەقە پەيدا قىلىپ، خەلقنىڭ ھاياتى، مال – مۈلۈكىنىڭ بىخەتەرلىكىگە ئېغىر زىيان سالدى، ھەتتا مەسچىتكە ھۇجۇم قىلىپ، دىنىي زاتلارنى زەخمىلەندۈردى، ئۇلارنىڭ قىلمىشى ئىسلام دىنىنىڭ شەرىئىتىگە خىلاپ››، دېدى ئابدۇلېتىپ ئابدۇرەھىم غەزەپلىنىپ.

ئابدۇلېتىپ ئابدۇرەھىم مۇنداق دېدى: ‹‹ئىسلام دىنى ئوتتۇراھال يول تۇتۇشنى، تىنچلىقنى تەشەببۇس قىلىدىغان دىن، بۇ دىن ھەر بىر مۇسۇلماندىن تېجەشلىك، لاياقەتلىك، پاك بولۇشنى، مېھىر – شەپقەتلىك بولۇشنى، ھاياتلىقنى قەدىرلەشنى، ھەققانىيەتنى ياقلاشنى تەلەپ قىلىدۇ. مۇسۇلمانلار تىنچلىقنى ياخشى كۆرىدۇ، تۈرلۈك شەكىلدىكى ئەسەبىيلىك ۋە تېررورلۇققا قارشى تۇرىدۇ. دىن ئەسەبىيلىرى دىن نامىدىن پايدىلىنىپ، ئىسلام دىنى ئەقىدىسىنى ئۆزگەرتىپ، بۇرمىلاپ، ئەسەبىيلىكنى تەرغىپ قىلىپ، زوراۋانلىققا قۇتراتقۇلۇق قىلىپ، قۇرئان كەرىم، ھەدىس شەرىفتىكى تەلىم – تەربىيەگە خىلاپلىق قىلىپ، ئەقەللىي ئىنسانىي ھوقۇققا پىسەنت قىلماي، ئارقا – ئارقىدىن قانلىق ۋەقە تۇغدۇرۇپ، مەملىكىتىمىزدىكى ئىسلام دىنى ساھەسىدىكىلەر ۋە بارلىق مۇسۇلمان ئاممىنى ئۆز ئىچىگە ئالغان ھەر مىللەت خەلقنىڭ ئورتاق ئەيىبلىشىگە ئۇچرىدى››.

‹‹مېنى بەكمۇ ئېچىندۇرغىنى شۇكى، دىن نامىدىن پايدىلىنىپ يولغا قويۇلغان زوراۋانلىق، تېررورلۇق پائالىيەتلىرى تاشقى دۇنيادىكىلەردە ئىسلام دىنى ۋە مۇسۇلمانلارغا نىسبەتەن خاتا چۈشەنچە ۋە بىر تەرەپلىمە قاراش پەيدا قىلىپ، ئىسلام دىنىنىڭ ساغلام تەرەققىياتىنى ئېغىر خىرىسقا دۇچار قىلدى. گەرچە دىن ئەسەبىيلىرى ئىسلام دىنى ساھەسىدىكى زاتلارغا ئۈزلۈكسىز خىرىس قىلىۋاتقان بولسىمۇ، ئىسلام دىنى ساھەسىدىكى زاتلارنىڭ باتۇرلۇق بىلەن ئوتتۇرىغا چىقىپ، زوراۋان–تېررورچىلارنىڭ ئىسلام دىنى نامىدىن پايدىلانغانلىقىدەك ساختا قىياپىتىنى ئېچىپ تاشلاپ ، بارلىق مۇسۇلمان ئاممىسىنى زوراۋان–تېررورچىلار بىلەن قەتئىي كۈرەش قىلىشقا سەپەرۋەر قىلىش مەسئۇلىيىتى بار›› دېدى ئابدۇلېتىپ ئابدۇرەھىم ۋەزىنلىك قىلىپ .

ئۇ مۇنداق دېدى: ‹‹ھازىر شىنجاڭنىڭ ئىسلام دىنى ساھەسىدىكىلەر ئىلمىي ۋەز – تەبلىغ قىلىش ئارقىلىق دىنغا ئىشىنىدىغان بارلىق ئاممىنى دىنىي ئەقىدىلەرنى توغرا چۈشىنىشكە يېتەكلەشنى ئەڭ مۇھىم خىزمەت قىلىپ، دىنىي ئەقىدىلەرنى ۋەز – تەبلىغ قىلىش سالمىقىنى ئاشۇرۇپ، ئىسلام دىنىنىڭ ئوتتۇراھال يول تۇتۇش ئىدىيەسىنى كەڭ تەشۋىق قىلىپ، ئىلمىي ۋەز – تەبلىغ قىلىش ئارقىلىق دىنغا ئىشىنىدىغان ئاممىنى كۆزىنى يوغان ئېچىپ، ھەق – ناھەقنى پەرقلەندۈرۈشكە يېتەكلەپ، دىنىي ئەسەبىيلىك ئىدىيەلىرىنىڭ سىڭىپ كىرىشى، كېڭىيىشىنى قەتئىي توسۇشى كېرەك. ھەم شۇنداقلا پۈتۈن جەمئىيەتكە ئىسلام دىنىنىڭ تىنچلىق، ئوتتۇراھال يول تۇتۇش ئىدىيەسى، مېھىر – شەپقەتلىك، كەڭ قورساقلىق مەزمۇنلىرىنى تېخىمۇ ئەتراپلىق تونۇتۇش كېرەك››.