ئىسپانىيىدىكى Levante تور بېكىتىنىڭ 1-ئاينىڭ 28-كۈنىدىكى خەۋىرىگە قارىغاندا، ئىسپانىيىلىك بىر ئەر ئاچقۇچىنى ئۇنتۇپ قالغانلىقتىن بىنانىڭ تۆتىنچى قەۋىتىدىكى ئۆيىنىڭ دېرىزىسىگە يامىشىپ چىققان بولۇپ، لېكىن بەختكە قارشى يىقىلىپ چۈشۈپ ئۆلۈپ كەتكەن، بۇ كۆرۈنۈش يېقىندا توردا تارقىلىشقا باشلىغان.

      ئىگەللىنىلىشىچە،بىناغا يامىشىپ چىققان بۇ ئەر ئاچقۇچىنى ئۆيىدە ئۇنتۇپ قالغان بولغاچقا، ئۆيىگە كىرەلمەي قالغان. قوشنىسى بىنانىڭ ئۆگزىسىدىن بىر تال ئارغامچىنى ساڭگىلىتىپ بۇ ئەرنىڭ ئارغامچىغا ئېسىلىپ ئۆيىنىڭ دېرىزىسىگە يامىشىپ چىقىپ ئۆيىگە كىرىشىگە قولايلىق تۇغدۇرۇپ بەرگەن.

        لېكىن دەل شۇ چاغدا كۈتۈلمىگەن ئەھۋال يۈز بەرگەن، يەنە بۇ ئەر ئارغامچىنى چىڭ تۇتۇۋالالمىغانلىقتىن بىنادىن يىقىلىپ چۈشۈپ ئۆلۈپ كەتكەن. بۇ ئەرنىڭ بىنادىن يىقىلىپ چۈشۈپ ئۆلۈپ كەتكەنلىكىنى كۆرگەن نەق مەيداندىكى قولۇم-قوشنىلار قاتتىق قورقۇپ كەتكەن.

        ئىگەللىنىلىشىچە، ئەرنىڭ يىقىلىپ چۈشكەن سىن كۆرۈنۈشى ئىسپانىيىنىڭ جەنۇبىي قىسمىدىكى ئالكانت شەھىرىدە (Alicante) تارتىلغان. كۆرۈنۈشنىڭ سىنغا ئېلىنغان نۇقتىسىدىن قارىغاندا، بۇ سىن كۆرۈنۈشى قارشى تەرەپتىكى بىنادا ئولتۇرۇشلۇق بىرەيلەن تەرىپىدىن تارتىلغان بولۇشى مۇمكىن.