چەتئەل تاراتقۇلىرىنىڭ خەۋەر قىلىشىچە، ئىتالىيە باج تارماقلىرى يېقىندا ئامېرىكا ئىنتىرنىت كاتتىبېشى گۇگېل شىركىتىنىڭ ئىتالىيىدە 227 مىليون ياۋرو باجدىن قېچىشقا چېتىلىپ قالغانلىقىنى بىلدۈرگەن.

  خەۋەردە ئېيتىلىشىچە، گۇگېل شىركىتىنىڭ ئىتالىيىدىكى باجدىن قېچىش قىلمىشىنى 2009-يىلىدىن 2013-يىلىغىچە بولغان ۋاقىتلارغا سۈرۈشكە توغرا كېلىدىغان بولۇپ، گۇگېل ئىتالىيىدىكى بىر نامسىز تەشكىلات ئارقىلىق باجدىن قاچقان. ئىتالىيە باج تارماقلىرى گۇگېلنى نازارەت قىلىپ تەكشۈرۈشىنى باشلىغان بولۇپ، ئاخىرىدا گۇگېل شىركىتى قاچقان باجنى تولۇقلاپ تاپشۇرۇش ئارقىلىق بۇ ماجرادىن قۇتۇلىشى مۇمكىن ئىكەن.

   بەزى خەۋەرلەردە ئېيتىلىشىچە، گۇگېل شىركىتى بايانات ئېلان قىلىپ، ئىتالىيە باج تارماقلىرىنىڭ بۇ دوكلاتىنى ئىنكار قىلغان بولۇپ، شىركەتنىڭ تىجارەت قىلىۋاتقان بارلىق دۆلەتلەردە باج تۈزۈمىگە قاتتىق رىئايە قىلىپ ئاكتىپلىق بىلەن باج تاپشۇرۇپ كېلىۋاتقانلىقىنى بىلدۈرگەن.

   گۇگېل شىركىتى تېخى يېقىندىلا ئەنگلىيە باج تارماقلىرىغا 130 مىليون فوندىستېرلىڭ باجنى تولۇقلاپ تاپشۇرۇشقا ماقۇل بولغان ئىدى. تاراتقۇلارنىڭ خەۋىرىدە ئېيتىلىشىچە، 2013-يىلى گۇگېلنىڭ ئەنگىلىيەدىكى تىجارەت كىرىمى 3.8 مىليارد فوندىستېرلىڭغا يەتكەن. لىكىن شۇ يىلى گۇگېل ئەنگلىيە باج تارماقلىرىغا پەقەت 20 مىليون 400 مىڭ دوللار باج تاپشۇرغان ئىدى.

   گۇگېل ئىتالىيەدە باجدىن قېچىشقا چېتىلىپ قالغان تۇنجى چەتئەل شىركىتى ئەمەس. ئىتالىيە تاراتقۇلىرىنىڭ خەۋەر قىلىشىچە، ئالما شىركىتىمۇ بۇنىڭدىن ئىلگىرى ئىتالىيە باج تارماقلىرى بىلەن ئورتاق تونۇش ھاسىل قىلىپ 318 مىليون ياۋرو باجنى تولۇقلاپ تاپشۇرۇشقا ماقۇل بولغان. ئىتالىيە باج تارماقلىرى بۇلتۇر 3-ئايدا ئالما شىركىتىنىڭ «پايدىنى يۆتكەش» ۋاستىسى ئارقىلىق ئىتالىيىدە 879 مىليون ياۋرو باجدىن قاچقانلىقىنى ئاشكارىلىغان ئىدى.