« يەر شارى تورى خەۋىرى» رۇسىيە «سۈنئىي ھەمراھ» ئاخبارات تورىنىڭ 26-يانۋاردىكى خەۋىرىگە قارىغاندا، تۈركىيەنىڭ دىپلوماتىيە مىنىستىرى چاۋۇش ئوغلۇ:«مۇبادا كۇرد دېموكراتىك ئىتتىپاقى پارتىيەسى جەنۋەدە ئۆتكۈزۈلىدىغان سۈرىيە تىنچلىق سۆھبىتىگە قاتنىشىپ قالىدىكەن، ئۇنداقتا ئەنقەرە بۇ قېتىملىق سۆھبەتكە قارشى تۇرىدۇ» دېگەن.

     چاۋۇش ئوغلۇ تۈركىيە NTV تېلېۋىزىيە ئىستانسىسىنىڭ زىيارىتىنى قوبۇل قىلغاندا:«كۇرد دېموكراتىك ئىتتىپاق پارتىيەسى قايسى سالاھىيىتى بىلەن سۆھبەت ئۈستىلىدە ئولتۇرىدىكەن؟ تېررورلۇق تەشكىلاتى خەلقكە ۋەكىل بولسا بولامدۇ-يوق؟ بۇ دېگەن ئۆكتىچىلەر بىلەن ھاكىمىيەت يۈرگۈزۈۋاتقان پارتىيە ئوتتۇرىسىدىكى سۆھبەت. تېررورلۇق تەشكىلاتى بۇ قېتىملىق سۆھبەتكە ئىشتىراك قىلسا بولمايدۇ. بىز بۇرۇن كۇرد دېموكراتىك ئىتتىپاقداش پارتىيەسىنى تەكلىپ قىلماسلىق توغرىلىق سۆزلىشىپ بولغان. مۇبادا ئۇلار جەنۋەدىكى سۆھبەتكە تەكلىپ قىلىنىدىكەن، بىز ئەلۋەتتە بۇ سۆھبەتكە قارشى تۇرىمىز» دېگەن.

      ب د ت نىڭ سۈرىيە مەسىلىسىدىكى ئالاھىدە ئەلچىسى دېمىستۇرا 25-يانۋار:«سۆھبەت مۇشۇ ئاينىڭ 29-كۈنى باشلىنىدۇ ھەم ئالتە ئاي داۋاملىشىدۇ» دېگەن. بىراق رۇسىيەنىڭ دىپلوماتىيە مىنىستىرى لاۋروف 26-يانۋار:«ئەگەر كۇردلار، بولۇپمۇ سۈرىيەدىكى كۇردلار بۇ سۆھبەتكە ئىشتىراك قىلمايدىكەن، سۈرىيە مەسىلىسىنى مۇرەسسە قىلىش سۆھبىتىدىن ياخشى نەتىجە چىقمايدۇ» دېگەن.

      تۈركىيە زۇڭلىسى داۋۇت ئوغلۇ كۇردلارنىڭ سۈرىيەدىكى ھەر قايسى تەرەپلەر قاتنىشىدىغان تىنچلىق سۆھبىتىگە ئىشتىراك قىلىشىنى قوللايدىغانلىقىنى بىلدۈرگەن بىراق داۋۇت ئوغلۇ:«ئەنقەرە كۇرد دېموكراتىك ئىتتىپاق پارتىيەسىنى تېررورلۇق تەشكىلاتى، دەپ قارايدۇ، شۇڭا بىز ئۇلارنىڭ بۇ قېتىملىق تىنچلىق سۆھبىتىگە قاتنىشىشىغا قارشى تۇرىمىز» دېگەن.