ئۆلتۈرۈلگەندىن كېيىن ئەزالىرى ئېلىۋېلىنغان قىزچاق كارولىننىڭ ئاتا-ئانىسى ئۇنىڭ ھايات ۋاقتىدىكى رەسىمىنى ئېلىپ، قىزىنى سېغىنغان. ئۇگاندا ئافرىقا قىتئەسىنىڭ شەرقىي قىسمىغا جايلاشقان بولۇپ، نۇرغۇنلىغان يەرلىك كىشىلەرنىڭ پىسخىكىسى ئېزىپ قالغان. ئۇلار قارىغۇلارچە خۇراپاتلىققا ئىشىنىدىغان بولۇپ، ئۇلار ئادەم ئەزاسىنى قۇربانلىق قىلغاندا ئىلاھنىڭ ئۇلارغا ساغلاملىق ۋە بايلىق ئېلىپ كېلىدىغانلىقىغا ئىشىنىدىكەن. شۇ سەۋەبتىن تۇتقۇن قىلىش ھەمدە ئادەم بەدىنى ئەزالىرىنى ئېلىۋېلىنىدىغان زىيانكەشلىككە ئۇچرىغۇچىلار بارغانچە كۆپەيگەن. بۇنىڭ ئىچىدە بالىلار ئەڭ كۆپ زىيانكەشلىككە ئۇچرىغۇچىلار بولۇپ، ئۇگاندا ساقچى تەرەپ بۇنىڭغا نىسبەتەن يېتەكلەش ئېلىپ بېرىپ، كىشىلەرنىڭ ھوشيارلىقىنى ئۆستۈرۈشىنى ئۈمىد قىلغان ھەمدە ئۆتكەن يىلى مۇشۇنىڭغا قارشى تۇرۇش گۇرۇپپىسى تەشكىللەپ، بۇنداق ئېچىنىشلىق ئىشلارنىڭ قايتا يۈز بېرىشىنىڭ ئالدىنى ئالماقچى بولغان.

        بىر قۇشنىڭ جەسىتى پېرىخون ئۆيىنىڭ ئالدىدا تۇرغان كۆرۈنۈش. ئۇگاندانىڭ شەرقىدىكى بىر بازاردا بۇ يىل 1-ئايدا بىر ئېچىنىشلىق ۋەقە يۈز بەرگەن بولۇپ، سەككىز ياشلىق قىز كارولىن ئۆيىنىڭ ئالدىدا ئويناۋاتقاندا تۇتقۇن قىلىنغان، يەنى قوشنىسى ئۇنىڭ ئېغىزىنى ئېتىپ ئېلىپ كەتكەن. نەچچە كۈندىن كېيىن، ساقچى تەرەپ بۇ ئۆينىڭ ئەتراپىدىكى ئېتىزلىقتىن بۇ قىزنىڭ جەسىتىنى تاپقان. ئۇنىڭ تىلىنى كېسىۋالغان بولۇپ، باشقا ئەزالىرىمۇ تولۇق ئەمەسكەن. ئۇگاندا ساقچى تەرەپ بۇ قىزنىڭ ئاللىقاچان يەرلىكتىكى خۇراپاتلىقنىڭ قۇربانى بولۇپ كەتكەنلىكىگە ئىشەنگەن. 

          پېرىخون Musa Nsimbe ئۆيىدە ئولتۇرغان كۆرۈنۈش. يېقىنقى يىللاردىن بۇيان، ئۇگاندادا تۇتقۇن قىلىپ ئەزالىرىنى كېسىۋالىدىغان دېلولار كۆپەيگەن بولۇپ، كېسىۋېلىنىدىغان ئەزالار ھەمىشە يۈز قىسمىدىكى ئەزالار ياكى كۆپىيىش ئەزالىرى ئىكەن. يەنە كېلىپ، بۇ خىل ئەھۋاللار بالىلارنىڭ بېشىغا كۆپرەك كېلىدىكەن. ساقچى تەرەپنىڭ سانلىق مەلۇماتلىرىغا قارىغاندا، ئۆتكەن يىلى 15 نەپەر بالا ۋە 14 نەپەر قۇرامىغا يەتكەن كىشى مۇشۇ سەۋەبتىن ھاياتىدىن ئايرىلغان بولۇپ، 2007-يىلى بۇ سان پەقەت ئۈچ نەپەر ئىكەن. ساقچى تەرەپنىڭ بىلدۈرۈشىچە، رەسمىي بولمىغان زىيانكەشلىككە ئۇچرىغۇچىلارنىڭ سانى بۇنىڭدىن كۆپ ئىكەن. ئۆتكەن يىلى جەمئىي 154 نەپەر گۇماندار قولغا ئېلىنغان بولۇپ، بۇنىڭ ئىچىدە 50 نەپەر كىشى سوتنىڭ ھۆكۈمىنى قوبۇل قىلغان.

       ساقچى ئەمەلدارى Moses Binoga (سولدا) ۋە مۇئاۋىن كەنت باشلىقى Margareth Kabuye (ئوڭدا) خەلققە بالىلارنىڭ زىيانكەشلىككە ئۇچراش ئەھۋالى توغرىسىدا ئاگاھلاندۇرۇش بەرمەكتە. ئامېرىكا دۆلەت كېڭىشى مۇشۇ ئايدا ئاشكارلىغان دوكلاتقا قارىغاندا، ئامېرىكا 500 مىڭ ئامېرىكا دوللىرى خەجلەپ ئىككى مىڭ نەپەر ئۇگاندا ساقچىسىنى ئۆتكەن يىلى ئادەم بېدىكى ۋە ئادەم ئۆلتۈرۈش مۇراسىمى دېلولىلىرىنى تەكشۈرۈشكە ئورۇنلاشتۇرغان. خەلق ئاممىسى ئۇگاندا ساقچىلىرىنىڭ ۋە سوت مەھكىمىسى ئەمەلدارلىرىنىڭ پارىخورلۇق قىلمىشلىرىنىڭ ئېغىرلىقىدىن ئاغرىنغان. ئۇلارنىڭ بۇنداق قىلىشى تەبىئىيلا ئادەم تۇتقۇن قىلىپ ئەزالىرىنى ئېلىۋالىدىغان بۇنداق ئېچىنىشلىق ئەھۋالنى تۈزىتەلمەيلا قالماستىن، بەلكى تېخىمۇ كۆپەيتىۋېتىدىكەن.

       كەنت ئاھالىلىرى يىغىندا ساقچى تەرەپتىن تېخىمۇ كۆپ ياردەم قىلىشنى تەلەپ قىلغان. پىسخولوگلارنىڭ بىلدۈرىشىچە، بۇ خىل ئەھۋالنى «پىسخىكىلىق ئېزىش» دېيىشكە بولىدىكەن. كىشىلەر نىشانىدىن ئېزىپ قالغاندا، ئىنسان تەبىئىتىنى ھۆرمەت قىلمايدىغان بولۇپ قالىدىكەن. ئۇلار پەقەت پېرىخون ۋە ئىلاھنىڭ ئۇلارغا ياردەم بېرەلەيدىغانلىقىغا ئىشىنىدىكەن. بىر ئوغلىدىن ئايرىلىپ قالغان دادا ناھايىتى غەزەپلەنگەن ھالدا: «ئۇلارنىڭ ھەممىسى قاتىل، داۋالىغۇچى ئەمەس ھەم ئىلاھمۇ ئەمەس.» دېگەن. ئىگىلىنىشىچە، بۇ خىل قۇربانلىق قىلىش يەنە نۇرغۇنلىغان دۆلەتلەردە يۈز بېرىدىغان بولۇپ، بۇنىڭ ئىچىدە ھىندىستان، ھىندونېزىيە، جەنۇبىي ئافرىقا، گابون قاتارلىق دۆلەتلەر بار ئىكەن.