جەمئىيەتنىڭ ئۇچقاندەك تەرەققىي قىلىشى، تۇرمۇش رېتىمىنىڭ تېزلىشىشى ئاتا-ئانىلارنى بالىلىرىنى ياخشى تەربىيلەپ ياراملىق ئادەم قىلىش ئۈچۈن كېچە-كۈندۈز تىرىشىشقا مەجبۇر قىلىۋاتىدۇ. بەزى ئاتا-ئانىلار ھەر ۋاقىت بالىلارنىڭ غېمىدىلا يۈرۈپ، بالا تەربىيەلەشكىلا كۈچەپ كەتكەنلىكى، ھەممە ئىشتا بالىلارنى بىرىنچى ئورۇنغا قويغانلىقى سەۋەبلىك ئەر-ئاياللىق مۇناسىۋەتكە دەز كېتىپ، ئائىلىسى ۋەيران بولۋاتىدۇ. ئەمەلىيەتتە ئائىلىدە ئەر-ئايالنىڭ مۇناسىۋىتى ئەڭ مۇھىم ئورۇندا تۇرۇشى كېرەك. چۈنكى ئەر-ئاياللارنىڭ مۇناسىۋىتى مۇستەھكەم بولغاندىلا مۇكەممەل ئائىلە بولىدۇ، بالىلارمۇ نورمال، ياخشى ئائىلە مۇھىتىدا ساغلام بەختلىك ئۆسۈپ يېتىلىدۇ. بۇنداق ئائىلىدە تەربىيىلەنگەن بالا چوقۇم مۇۋەپپەقىيەتلىك تەربىيىلىنىدۇ. ئەر-ئاياللارنىڭ كۆپرەك پىكىر ئالماشتۇرۇپ تۇرۇشى ئىنتايىن مۇھىم، كۆپلىگەن ئەر-ئاياللار بالىلىق بولغاندىن كېيىن ئۆزئارا پىكىر ئالماشتۇرۇشنى ئۇنتۇيدۇ، سۆز تېمىسى بالىسىدىن چەتنەپ كېتەلمەيدۇ. ئەمەلىيەتتە، ھەر قانداق بالىنى ئالدىنقى ئورۇنغا قويۇپ، ھېسسىيات ئالماشتۇرۇپ تۇرۇشقا سەل قاراش ئەر-ئاياللارنىڭ مۇناسىۋىتىنى ئاستا-ئاستا سۇسلاشتۇرىدۇ.

     كەچلىك تاماق ۋاقتى پىكىر ئالماشتۇرغان ئەڭ ياخشى پۇرسەت. بەزى ئەر-ئاياللار  كەچلىك تاماقنى دوست-بۇرادەرلىرى ۋە باشقىلار بىلەن سىرتلاردا يەپ كۆنۈپ قالغان، ئەمما بىر ئائىلىنىڭ ئىللىقلىقى ئۈچۈن كەچلىك تاماقنى ئۆيىگە قايتىپ يېيىش ئىنتايىن مۇھىم. دوستلىرىڭىز، ئۇرۇق تۇغقانلىرىڭىز ھەر ۋاقىت سىزنى سىرتلاردا تاماق يېيىشكە تەكلىپ قىلىشى مۇمكىن، ئەمما مۇھىم ئىشىڭىز بارلىقىنى باھانە قىلىپ، ئۆيىڭىزگە قايتىپ كېتىشىڭىز، ئائىلىڭىز ئۈچۈن يىتەرلىك ۋاقىت چىقىرىشىڭىز كېرەك. بالىلارغا ئەركىن-ئازادە مۇھىت يارىتىپ بېرىش، ئۇلارنى ياخشى تەربىيىلەش ئۈچۈن ئالدى بىلەن ئەر-ئاياللار ئۆزلىرىنىڭ مۇناسىۋىتىنى بىرىنچى ئورۇنغا قويۇپ، بالىلار ئۈچۈن ئىناق، ئىللىق ئائىلە مۇھىتى يارىتىپ بېرىشى كېرەك.