ئارگېنتىنا ‹ئەركىنلىك گېزىتى› نىڭ ئىجتىمائىي ئالاقە تورىدا ئېلان قىلىنغان ‹ئىپلاس دادا›-دومىنگو بۇلسىئونىڭ قولغا ئېلىنغانلىق كۆرۈنۈشى.

      شىنخۇا تورىنىڭ 1-ئاينىڭ 10-كۈنى بېيجىڭدىن ئەۋەتكەن تېلىگراممىسى: ئارگېنتىنالىق بىر ئەرنىڭ ئۆز قىزىغا 22 يىل باسقۇنچىلىق قىلغانلىقى توغرىسىدا شىكايەت قىلىنغان بولۇپ، بۇ ئەر يەنە قىزىنى سەككىز بالىلىق قىلىپ قويغان، ساقچى تەرەپ بۇ ئەرنى بىر ئاي قوغلاپ تۇتۇش ئارقىسىدا ئەڭ ئاخىرى بۇ ئەرنى قولغا ئالغان.

      بۇ ئەرنىڭ جىنايى قىلمىشى ئاۋىستىرىيىلىك سېسىق نامى پۇر كەتكەن ‹ئىپلاس دادا›- يوسېف فولەيسېل بىلەن ئوخشاپ كېتىدىغان بولغاچقا، ئاخبارات ۋاستىلىرى بۇ ئەرنى ‹ئارگېنتىنا نۇسخىسىىدىكى فولەيسېل› دەپ ئاتىغان.

‹ئىپلاس دادا›-دومىنگو بۇلسىئو

       ئارگېنتىنالىق بۇ ‹ئىپلاس دادا› نىڭ ئىسمى بولسا دومىنگو بۇلسىئو بولۇپ، بۇ يىل 56 ياشقا كىرگەن، ئۇلارنىڭ ئۆيى ئارگېنتىنا سانتىياگو-دېل ئېستېرو (Santiago del Estero) ئۆلكىسىدىكى مەلۇم كىچىك بازاردا ئىدى.

    شىنخۇا ئاگېنتلىقى خەلقئارا خەۋەرلەر تورىنىڭ ئىگەللىشىچە، دومېنگونىڭ خوتۇنى ئۈچ بالىسىنى ئېلىپ ئۇنىڭدىن ئايرىلىپ كېتىپ قالغاندىن كېيىن، دومېنگو بىلەن بىللە قالغان قىزى-ئانتونىيە ئۇنىڭ ‹جىنسىي قۇلى› غا ئايلىنىپ قالغان.

    ئانتونىيە توققۇز يېشىدىن باشلاپلا دادىسىنىڭ جىنسىي پاراكەندىچىلىك سېلىشى ۋە جىنسىي جەھەتتىن خورلىشىغا ئۇچراپ كەلگەن بولۇپ، بۇ يىل 31 ياشقا كىرگەن ئانتونىيە دادىسىدىن سەككىز بالا يۈزى كۆرگەن.

     يېقىندا ئانتونىيە دادىسىنىڭ يېنىدىن مۇۋەپپەقىيەتلىك ھالدا قېچىپ چىققان ھەم ئالاقىدار تارماقلاردىن ياردەم تەلەپ قىلغان.

     ئانتونىيەنىڭ يەرلىك ئاخبارات ۋاستىلىرىغا ئېيتىشىچە، ئۇنىڭ دادىسى نۇرغۇن قېتىم بالىلىرىنىڭ كۆز ئالدىدىلا ئانتونىيىگە پەسكەشلىك قىلغان ئىكەن.

     ئانتونىيە ئەسلەپ مۇنداق دېدى:‹ئاپام بىزنىڭدىن ئايرىلىپ كەتكەندىن كېيىن مەن دادامنىڭ ‹خوتۇنى› بولۇپ قالدىم، دادام توققۇز يېشىمدىن باشلاپلا ماڭا جىنسىي زوراۋانلىق قىلىپ كەلدى›. ‹ناۋادا مەن قولۇم-قوشنىلارغا گەپ قىلىپ قالسام ياكى دومېنگو ماڭا جىنسىي زوراۋانلىق قىلماقچى بولسىلا مېنى ئۇرۇپ دۇمبالايدىغان بولۇپ، ئەگەر مەن تاياقتىن ئۆزۈمنى ئېلىپ قاچسام، ئۇ قولىغا كالتەك ئېلىپ ئۆي ئىچىدە مېنى قوغلاپ كېتىدۇ›.

     ئانتونىيە يەنە دادىسىنىڭ ئۆزىگە دائىم تەھدىت سېلىپ كەلگەنلىكىنى ئېيتقان بولۇپ، ئۇ مۇنداق دېگەن:‹دادام ماڭا ئەگەر بۇ ئىشنى باشقىلارغا دەيدىغان بولساڭ سېنى ئۆلتۈرۈپ تاشلايمەن دەپ تەھدىت سېلىپ كەلدى›.

      شىنخۇا ئاگېنتلىقى خەلىقئارا خەۋەرلەر تورىنىڭ ئىگەللىشىچە، ئانتونىيە دادىسىدىن باشقا يەنە تاغىسىنىڭمۇ جىنسىي زوراۋانلىقىغا ئۇچرىغان ئىكەن.

ئاۋىستىرىيىلىك سېسىق نامى پۇر كەتكەن ‹ ئىپلاس دادا›- يوسېف فولەيسېل

        ئانتونىيە ئۆيىدىن قېچىپ كەتكەندىن كېيىن، دومېنگومۇ ئۆيىدىن قېچىپ كەتكەن.

     ئەنگىلىيە ‹كۈندىلىك پوچتا گېزىتى› نىڭ 8-يانۋاردىكى خەۋىرىگە قارىغاندا، ساقچى تەرەپ بۇ ئەرنى بىر ئاي قوغلاپ تۇتۇش ئارقىسىدا ئەڭ ئاخىرى بۇ ئەرنى قولغا ئالغان.

      ئارگېنتىنا ساقچى تەرەپ ئىپادە بىلدۈرۈپ، دومېنگونىڭ نۇرغۇنلىغان باسقۇنچىلىق جىنايىتى بىلەن ئەيىبلىنىدىغانلىقىنى، تەپتىش تارماقلىرىنىڭ دومېنگوغا قارىتا DNA تەكشۈرۈشى ئېلىپ بېرىش ئارقىلىق بۇ سەككىز بالىنىڭ زادى دومېنگودىن تۇغۇلغان بالىلار ياكى ئەمەسلىكىنى جەزملەشتۈرىدىغانلىقىنى ئېيتقان.

  ئانتونىيە مۇنداق دېگەن:‹مەن ئۆزۈم ھەم بالىلىرىمنىڭ تەقدىرى ئۈچۈن قايغۇرۇۋاتىمەن، چۈنكى مەن دادامنىڭ ئاكا-ئىنى، ئاچا-سىڭىللىرىدىن كەلگەن تەھدىتنى تاپشۇرۇۋالدىم، ئۇلار مېنىڭدىن دادامنىڭ ئۈستىدىن قىلغان شىكايىتىمنى بىكار قىلىشىمنى تەلەپ قىلدى›. ئانتونىيە يەنە مۇنداق دېگەن:‹ئۇلارنىڭ (يەنە دادىسىنىڭ ئۇرۇغ-تۇغقانلىرىنى دېمەكچى) مېنىڭ قانداق كۈنلەرنى كۆرگەنلىكىم بىلەن قىلچە كارى يوق، لېكىن مەن ئۇنىڭ (يەنە دومېنگونى دېمەكچى) تۈرمىگە كىرىشىنى ئۈمىد قىلىمەن›.