2016-يىلى 1-ئاينىڭ 9-كۈنى سەھەر سائەت بىردىن 40 مىنۇت ئۆتكەندىن تارتىپ سەھەر سائەت ئۈچتىن 15 مىنۇت ئۆتكىچە بولغان ئارلىقتا، ۋۇخەن شەھىرى خۇڭشەن رايونى گۇەنشەن چوڭ يولىدىكى جۇڭجىيەن كاڭچېڭ ئولتۇراق رايونى 9-بىنادا نۇرغۇن ئۆيلەرگە ئوغرى كىرگەن بولۇپ، بۇنىڭ ئىچىدە، مەزكۇر ئولتۇراق رايوندىكى 9-بىنادا ئولتۇرىدىغان ئىككى ئائىلىلىكنىڭ ئۆيىدىن 5000 يۈەندىن ئارتۇق نەقپۇل ئوغرىلاپ كېتىلگەن.

    مۇخبىرنىڭ ساقچى تەرەپ دېلو يۈز بەرگەن ئۆيدىكى كىشىلەرنىڭ ئۆيىگە ئورنىتىلغان ئائىلە كۆزىتىش كامىراسىدىكى خاتىرىدىن ئالغان ۋېدىئوسىدىن كۆرۈشىچە، بېشىغا يىپتىن توقۇلغان پوسما كىيىۋالغان بىر ياش ئەر سەھەر سائەت ئىككىدىن 10 مىنۇتلار ئۆتكەندە كامىرادا كۆرۈنگەن بولۇپ، بۇ ئەر ئۈستىگە مايكا كىيىپ، قولىغا ئاق رەڭلىك پەلەي كىيىپ ئېلىكتىر چىراغ كۆتۈرۈۋالغانىدى، بۇ ئەرنىڭ كىيىنىشلىرى ناھايىتى ‹كەسپىي› بولۇپ، ھەركەتلىرىمۇ ناھايىتى ئېھتىياتچان ئىدى.

     ئۆيگە ئوغرىلىققا چۈشكەن بۇ ئوغرى ئوغرىلىق قىلىش جەريانىدا بۇ ئۆيگە ئورنىتىلغان كىچىك تىپتىكى كامىرانى بايقاپ قالغان.

     ئىگەللىنىلىشىچە، بۇ ئوغرى ئۆيگە ئورنىتىلغان كامىرانى يېڭى بايقىغان چاغدا قاتتىق ھودۇقۇپ كەتكەن بولۇپ، دەرھال شارپىسى ئارقىلىق يۈزىنى ئېتىۋالغان، لېكىن بۇ ئوغرى بۇ ئۆي ئىچىدە يەنە داۋاملىق بىر سائەتتەك تۇرغان بولۇپ تاكى سەھەر سائەت ئۈچتىن 10 مىنۇت ئۆتكەن چاغدىلا ئاندىن بۇ ئۆيدىن چىقىپ كەتكەن.

    ئۆيىدىكى مال-مۈلكى ئوغرىلانغان ئۆي ئىگىسىنىڭ تونۇشتۇرۇشىچە، بۇ ئوغرى پەقەت ئۆي ئىچىدىكى نەقپۇل سېلىنغان پورتماللارغىلا قىزىققان بولۇپ، ئۆيدىكى ئېلىكتىر ئۈسكۈنىلىرى ۋە يانفون قاتارلىق قىممەت پۇللۇق نەرسىلەرگە قول تەگكۈزمىگەن.

    ئۈستۈنكى قەۋەتتە ئولتۇرىدىغان، ئۆيىدىكى مال-مۈلكى ئوغرىلانغان ئۆي ئىگىسىنىڭ مۇخبىرغا ئېيتىپ بېرىشىچە، ئۇلار سەھەر سائەت بىردىن 40 مىنۇتلار ئۆتكەندە غەلىتە شەپىنى سېزىپ قالغان بولسىمۇ لېكىن ئورنىدىن تۇرۇپ تەكشۈرمىگەن بولۇپ، ئۇلارنىڭ ئۆيىدىكى 5000 يۈەندىن ئارتۇق نەقپۇل ئوغرىلاپ كېتىلگەن، لېكىن مېھمانخانا ئۆيدىكى كومپىيوتېر قاتارلىق نەرسىلەر ئوغرىلانمىغان ئىكەن.