2015-يىلدا خەلق پۇلىنىڭ خەلقئارالىشىش تەرەققىياتى بىر قاتار زور نەتىجىلەرگە ئېرىشتى. 2016-يىلغا بولغان مۆلچەردە دۇنيا ئىقتىسادى ۋە خەلقئارا پۇل مۇئامىلە بازىرىدىكى خەۋپ خەتەر سەۋەبىدىن خەلق پۇلىنىڭ خەلقئارالىشىش تەرەققىيات يولى تېخىمۇ ئەگرى توقايلىققا يۈزلىنىش ئېھتىماللىقى بولسىمۇ، ئەمما خەلق پۇلىنىڭ خەلقئارالىشىش تەرەققىيات كەلگۈسىدىن يەنىلا ئۈمىد بار.

ئومۇمىيلىقتىن قارىغاندا 2016-يىل دۇنيا ئىقتىسادىنىڭ جانلىنىپ ئەسلىگە كېلەلىشىگە ئېنىق بىر نەرسە دېمەك تەس، دۇنيادىكى ئەڭ چوڭ ئىقتىسادىي گەۋدە بولغان ئامېرىكىنىڭ ئۆسۈم قوشۇش مەسىلىسىنىڭ خەلقئارا پۇل مۇئامىلە بازىرىغا بولغان تەسىرىگە سەل قاراشقا بولمايدۇ. خەلق پۇلىنىڭ خەلقئارالىشىش جەھەتتىكى تەرەققىياتى تېخىمۇ كۆپ خىرىسقا دۇچ كېلىشى مۇمكىن. مەسىلەن، يېڭىدىن گۈللەنگەن بازار پۇللىرى قىممىتىنىڭ چۈشۈشى تەسىرىدە، بىر قىسىم ئەمدىلا خەلق پۇلىنىڭ خەلقئارادىكى ئورنىنى ئېتىراپ قىلىپ قوبۇل قىلىشقا باشلىغان دۆلەتلەر قولىدىكى خەلق پۇللىرىنى ئامېرىكا دوللىرىغا ئالماشتۇرۇشى مۇمكىن، دېگەندەك بىر قاتار مەسىلىلەر مەۋجۇت. گەرچە ئىلگىرىلەش يولى ئەگرى توقاي بولسىمۇ، ئەمما خەلق پۇلىنىڭ خەلقئارالىشىشتىكى چوڭ يۈزلىنىشى ئۆزگەرمەيدۇ، كەلگۈسىگە نىسبەتەن تۆۋەندىكىدەك تۆت خىل مۆلچەرنى كۈتۈش مۇمكىن:

1.جۇڭگو تاشقى پېرىۋوت بازىرى تېز سۈرئەتتە دۇنيا بازىرىغا سىڭىدۇ. بۇ يىل بېشىدىن باشلاپ جۇڭگو خەلق بانكىسى بانكىلار ئارا ئېلىپ بېرىلىدىغان تاشقى پېرىۋوت سودا ۋاقتىنى ئۇزارتىپ، چىگرا سىرتىدىكى لاياقەتلىك سۇبيېكىتلارنى بانكىلار ئارا ئېلىپ بېرىلىدىغان تاشقى پېرىۋوت سودىسىغا كىرىشكە جەلپ قىلىدۇ، تېخىمۇ كۆپلىگەن چىگرا سىرتىدىكى سۇبيېكىتلار دۆلىتىمىزدىكى سودىغا قاتنىشىدۇ، ئىچكى تاشقى بازارنىڭ بىرلىشىشى ئىلگىرى سۈرۈلىدۇ.

2.ئالاقە راۋانلاشتۇرۇلۇپ كاپىتال ھېساباتى ئېچىۋىتىشى مۇقىم قەدەم بىلەن ئالغا سىلجىتىلىدۇ. گەرچە ھەرخىل ئەقىلگە مۇۋاپىق بولغان يوللۇق ئەنسىرەشلەر مەۋجۇت بولسىمۇ ئەمما ئىسلاھات بۇنىڭلىق بىلەن توختاپ قالمايدۇ.

3.چىگرا سىرتىدىكى خەلق پۇلى رايون تەرەققىياتى مەركىزى تەدرىجىي شەكىللەندۈرۈلىدۇ. ھەرقايسى چوڭ قىتئەلەرنىڭ راسچوت كېلىشىمىنىڭ ئىمزالىنىشىغا ئەگىشىپ، تېخىمۇ كۆپ جۇڭگو مەبلىغىدىكى چىگرا سىرتىدىكى بانكىلار راسچوت مۇلازىمىتىنى يولغا قويدى، دۇنيادىكى چىگرا سىرتى خەلق پۇلى مەركىزى ئىلگىرىكى يالغۇز بىر شياڭگاڭغىلا تايىنىش يۈزلىنىشىنى ئۆزگەرتىپ، تەدرىجىي ھالدا رايون كۆلەم ئۈنۈمى شەكىللەندۈرۈپ، لوندون، ليۇكسېمبۇرگ قاتارلىق تېخىمۇكۆپ چىگرا سىرتىدىكى خەلق پۇلى رايون مەركىزى شەكىللەندۈرۈلىدۇ.

4.خەلق پۇلىنىڭ خەلقئارادىكى ئورنى تېخىمۇ يۇقىرى كۆتۈرۈلىدۇ. گەرچە ئامېرىكا دوللىرىنىڭ خەلقئارالىق پۇل سېستىمىسىدىكى يېتەكچىلىك ئورنى رەسمىي تەۋرەنمىگەن بولسىمۇ، ئەمما خەلق پۇلى ھازىر دۇنيادىكى ئەڭ قىزىق نۇقتا پۇلى بولۇپ قالدى. تېخىمۇ كۆپ دۆلەتلەر خەلق پۇلىنى تاشقى پېرىۋوت زاپىسى قىلىشنى ئويلىشىپ، خەلق پۇلىنىڭ شۇ يەردىكى ئايلىنىشى ئۈچۈن تېخىمۇ كۆپ تىرىشچانلىقلارنى كۆرسەتمەكتە. تېخىمۇ كۆپ پۇل مۇئامىلە ئورگانلىرى ۋە كارخانىلار خەلق پۇلى ئارقىلىق باھا مەلۇم قىلىدىغان زايوم مۈلكى تارقىتىشنى باشلىماقچى، خەلق پۇلى ئايلىنىش مېخانىزىمىنىڭ ئۈزلۈكسىز مۇكەممەللىشىشىگە ئەگىشىپ، تېخىمۇ كۆپ چەتئەل مەبلەغ سالغۇچىلىرى خەلق پۇلى مۈلۈكلىرىگە دىققەت نەزىرىنى ئاغدۇرىدۇ.