«ئوربىتا تورى ئۇنىۋېرسال خەۋىرى» ئەنگلىيە «مۇھاپىزەت گېزىتى»نىڭ 3-يانۋاردىكى خەۋىرىگە قارىغاندا، 40 مۇساپىر ئولتۇرغان كېمە گىرېتسىينىڭ ئاگاسونى ئارىلىغا مېڭىش يولىدا، خادا تاشقا سوقۇلۇپ كېتىپ، ئىككى ياشلىق ئوغۇل بالا بەختكە قارشى قازا قىلغان، شۇنىڭ بىلەن بۇ بالا بۇ يىلقى ياۋروپاغا بېرىش سەپىرىدە قازا قىلغان تۇنجى مۇساپىر بولۇپ قالغان.

     خەۋەردە دېيىلىشىچە، كېمە تاڭ سەھەردە تۈركىيەدىن يولغا چىققان بولۇپ، گىرېتسىيەنىڭ ئاگاسونى ئارىلىغا مېڭىش سەپىرىدە خادا تاشقا سوقۇلۇپ كەتكەن، ئىككى ياشلىق ئوغۇل بوۋاق سۇغا چۈشۈپ كېتىپ بەختكە قارشى قازا قىلغان. قالغان 39 يولۇچىنى شۇ جايدىكى بېلىقچىلار قۇتۇلدۇرۇۋالغان، بۇنىڭ ئىچىدىكى ئون نەپەر ھايات قالغۇچىنىڭ بەدەن تېمپېراتۇرىسى زىيادە تۆۋەن بولغانلىقتن، دوختۇرخانىغا ئېلىپ بېرىلىپ داۋالىتىلغان. قازا قىلغان بوۋاقنىڭ ئاپىسىنى ئۆز ئىچىگە ئالغان ھايات قالغۇچىلار، 50 كىلومېتىر يىراقلىقتىكى سامۇس ئارىلىغا جايلاشقان پېتگور ئاپورتىغا ئېلىپ بېرىلغان.

     ئىگىلىنىشىچە، مۇساپىرلارنىڭ دېڭىز يولى بىلەن ياۋروپاغا بېرىشىغا بار كۈچى بىلەن ياردەم قىلىۋاتقان چەتئەللىك كۆچمەنلەرنى قۇتقۇزۇش پونكىتى دەرھال قۇتقۇزۇش كېمىسى ئەۋەتكەن ھەمدە گىرېتسىيە دېڭىز قىرغىقى قوغدىنىش ئەترىتى بىلەن بىرلىكتە دېڭىزدا تۇرۇپ قالغان مۇساپىرلارنى بىخەتەر جايغا ئاپىرىپ قويغان. دېڭىز قىرغىقى قوغدىنىش ئەترىتىنىڭ دېيىشىچە، بېلىقچىلار ئوغۇل بوۋاقنىڭ جەسىتىنى دېڭىزدىن سۈزۈۋالغان. نۆۋەتتە ھايات قالغان مۇساپىرلارنىڭ دۆلەت تەۋەلىكى ئېنىقلانمىغان.

     چەتئەللىك كۆچمەنلەرنى قۇتقۇزۇش پونكىتىنىڭ بەرپا قىلغۇچىسى كىرىستوف كاتلانب: «مەن كەلگۈسىدە قانداق قورقۇنچلۇق ئىشلارنى يۈز بېرىشىنى تەسەۋۋۇر قىلىشقا ئامالسىز قالدىم. بۈگۈن بىز ھازىرغا قەدەر داۋاملىشىۋاتقان مۇساپىرلار كىرىزىسىدا كۆپلىگەن بالىلارنىڭ قازا قىلغانلىقىدەك پاجىئەنى كۆرۈپ تۇرۇپتىمىز، بۇ تىراگېدىيە بىزگە نەچچە ئون مىليون ئادەمنىڭ ھاياتىنى ساقلاپ قېلىش ئۈچۈن پاجىئەلىك ئەھۋالغا ئۇچراۋاتقانلىقىدەك ئاچچىق رىئاللىقىنى نامايەن قىلماقتا» دېدى.

     كۆپلىگەن مۇساپىرلار ۋە كۆچمەنلەر قىش پەسلىدىكى سۆڭەكتىن ئۆتىدىغان دېڭىز سۈيىگە، ئۆركەشلەپ ئېقىۋاتقان دولقۇنغا قارىماي، جېنىنى ئالىقانغا ئېلىپ قويۇپ، تۈركىيەدىن يولغا چىققىنىچە، ئېگېي دېڭىزىدىن كېسىپ ئۆتۈپ، گىرېتسىيەگە بېرىۋېلىشنى ئۈمىد قىلماقتا. ئىگىلىنىشىچە، 2015- يىلى جەمئىي 1 مىليون مۇساپىر تۈركىيە ۋە شىمالىي ئافرىقىدىن كېمىگە ئولتۇرۇپ ياۋروپاغا بېرىپ جاھاندارچىلىق قىلىشقا ئاتلانغان، بۇنىڭ ئىچىدىكى كۆپ قىسىم مۇساپىرلار سۈرىيە، ئافغانىستان ۋە ئىراقتىن كەلگەن بولۇپ، ئۇلار ۋەتىنىدىكى ئايىغى چىقماس ئۇرۇشتىن جاق تويغاچقا مۇساپىر بولۇش يولىنى تاللىغان، 3600 دىن كۆپرەك كىشى ياۋروپاغا بېرىش سەپىرىدە قازا قىلغان.