سۈرەتتە: ئۈرۈمچى قىبلىتاغ ساقچىخانىسى ۋە جياڭشى ئۆلكىسى نەنچاڭ شەھەرلىك شىخۇ رايونى ج خ شۆبە ئىدارىسىنىڭ ساقچىلىرى تاپشۇرۇۋېلىش رەسمىيىتى بېجىرىپ، ليۇ فامىلىلىكنى يالاپ ئېلىپ ماڭماقتا.

    يۇرتدىشىغا بولۇشۇپ، باشقىلارنى چاناپ ئۆلتۈرۈپ قويغاندىن كېيىن، ليۇ فامىلىلىك ئۈرۈمچىگە قېچىپ كەلگەن 19 يىلدىن بۇيان، ئىسىم-فامىلىسىنى يوشۇرۇپ، كۈنلەرنى جاپادا ئۆتكۈزۈپ، ئائىلىسىدىكىلەر بىلەن ئالاقىلىشىشقىمۇ جۈرئەت قىلالمىغان. تۇتۇلغاندا 48 ياشقا كىرگەن بولۇپ، ئايالى ۋە بالىلىرىنىڭ چىرايىنىمۇ ئۇنتۇپ قالغان.

   12-ئاينىڭ 18-كۈنى، مۇخبىر بۇ دېلونى بېجىرگەن ئۈرۈمچى شەھىرى قىبلىتاغ ساقچىخانىسىدىن ئىگىلىشىچە، جىنايەت گۇماندارى ليۇ فامىلىلىك 12-ئاينىڭ 10-كۈنى مەكتەپكە بېرىپ بالا ئېلىۋاتقاندا ساقچىلار تەرىپىدىن قولغا ئېلىنغان.

   12-ئاينىڭ 5-كۈنى، قىبلىتاغ ساقچىخانىسى ئاممىنىڭ چاڭجياڭ يولى سودا سارىيى ئەتراپىدا ئىشلەمچىلىك قىلىۋاتقان ليۇ فامىلىلىكنىڭ پەۋقۇلئاددە چوڭ جىنايەتكە چېتىشلىق جىنايەت گۇماندارى بولۇشى مۇمكىنلىقى توغرىسىدىكى دېلو مەلۇماتىنى تاپشۇرۇپ ئالغان.

   ساقچىلار تەكشۈرۈش ئارقىلىق، 1996-يىلى 5-ئايدا، ليۇ فامىلىلىكنىڭ جياڭشى ئۆلكىسى نەنچاڭ شەھىرى شىخۇ رايونىدىكى بىر ئىجارە ئۆيدە، ھاراق ئىچكەندىن كېيىن بىر ئادەمنى چاناپ ئۆلتۈرۈپ قويۇپ قېچىپ كەتكەنلىكىدىن خەۋەر تاپقان. ساقچىلار نەنچاڭ شەھىرى شىخۇ رايونلۇق ج خ شۆبە ئىدارىسى جىنايى ئىشلار چوڭ ئەترىتى بىلەن ئالاقىلىشىپ، ليۇ فامىلىلىكنىڭ باشقىلارنى قەستەن يارىلاندۇرۇپ ئۆلۈشىنى كەلتۈرۈپ چىقارغان جىنايەت گۇماندارى ئىكەنلىكىنى بېكىتكەن.

   12-ئاينىڭ 10-كۈنى، ليۇ فامىلىلىك مەكتەپكە بېرىپ، بىللە تۇرۇۋاتقان قىز دوستىنىڭ بالىسىنى ئېلىۋاتقاندا ساقچىلار تەرىپىدىن قولغا چۈشكەن. ليۇ فامىلىلىك ئۆزىنىڭ قاتىللىق قىلمىشىنى ئېتىراپ قىلغان.

   ليۇ فامىلىلىكنىڭ ئىقرار قىلىشىچە، ئەينى ۋاقىتتا ئادەمنى چاناپ بولغاندىن كېيىن، ئۇ پىچاقنى ئالغان پېتى قېچىپ، قېچىش جەريانىدا پىچاقنى تۆمۈر يول بويىغا تاشلىۋەتكەن. ئارقىدىن ئۇ نەنچاڭ ۋوگزالىدىن پويىزغا ئولتۇرۇپ، شاڭتاڭ بازىرى ۋوگزالىغا بارغان، ئاندىن يەنە پويىزغا ئولتۇرۇپ چاڭشا، جېڭجۇغا بېرىپ، جېڭجۇدا بىر كېچە قونغان. ئىككىنچى كۈنى ئۈرۈمچىگە بارىدىغان پويىزغا ئولتۇرغان. ئۈرۈمچىگە كەلگەندىن كېيىن، يۇرتداشلىرىنىڭ ياردىمىدە، ئىسىم-فامىلىسىنى يوشۇرۇپ، ئىشلەمچىلىك قىلغان.

   دېلو بېجىرگۈچى ساقچىلارنىڭ تونۇشتۇرۇشىچە، ليۇ فامىلىلىك تۇتۇلغاندىن كېيىن، ئۆزىنىڭ ئەڭ چوڭ ئارزۇسىنىڭ بىللە تۇرۇۋاتقان قىز دوستى ۋە بالىسىنى كۆرۈش ئىكەنلىكىنى ئېيتقان.