شۇ يەر ۋاقتى 17-دېكابىر كەچتە، جۇڭگو دىپلوماتىيە مىنىستىرى ۋاڭيى نىيۇيوركتا ئىراق دىپلوماتىيە مىنستىرى جافال بىلەن كۆرۈشتى.     ۋاڭيى مۇنۇلارنى بىلدۈردى: نۆۋەتتە جۇڭگو بىلەن ئىراقنىڭ مۇناسىۋىتى ناھايىتى ياخشى كېتىپ بارىدۇ، جۇڭگو تەرەپ ئىراق تەرەپنىڭ دۆلەتنىڭ بىخەتەرلىكىنى قوغداش، ئىقتىسادنى قايتا قۇرۇپ چىقىش قاتارلىق مەسىلىلەردىكى توغرا ۋە مۇۋاپىق بولغان تەلىپىنى چۈشىنىدۇ، بىز كۈچىمىزنىڭ يېتىشىچە ئىراقنىڭ بىخەتەرلىكنى قوغدىشىغا ۋە ئىقتىسادنى قايتا قۇرۇپ چىقىشىغا ياردەم بېرىمىز، ۋە ھەمدە ئىراقنىڭ رايون مۇقىملىقىنى قوغداش ۋە تەرەققىي قىلدۇرۇشتا تەسىرىنى كۆرسىتىشنى كۆرۈشنى خالايمىز. جۇڭگو تەرەپ ئىراق تەرەپ بىلەن رەھبەرلىك قاتلىمىدىكى ئالاقىنى كۈچەيتىپ، ئېنېرگىيە ئىشلەپچىقىرىش جەھەتتىكى ھەمكارلىقنى كېڭەيتىپ، جۇڭگو ئىراق مۇناسىۋىتىنى يەنىمۇ يۇقىرى بالداققا كۆتۈرۈشنى خالايدۇ. بىز ئىراقنىڭ جۇڭگو تەرەپ خادىملىرىنىڭ ئىراقتا مۇناسىۋەتلىك تۈر ئىشلەپچىقىرىشقا قاتناشقاندا بىخەتەرلىكىگە كاپالەتلىك قىلىشىنى ئۈمىد قىلىمىز.

    جافال مۇنۇلارنى بىلدۈردى: زۇڭلى ئاباد مۇشۇ يېقىندا جۇڭگونى زىيارەت قىلىپ، ئىككى دۆلەتنىڭ ھەرقايسى ساھەلەردە ئۆز ئارا ھەمكارلىشىشىنى ئۈمىد قىلىدۇ. ئىراق تەرەپ جۇڭگو تەرەپنىڭ بىخەتەرلىك ۋە قايتا قۇرۇش جەھەتتە بەرگەن ياردىمىگە رەھمەت ئېيتىدۇ، ۋە ھەمدە ئۈنۈملۈك تەدبىر قوللىنىپ، جۇڭگو تەرەپنىڭ ئىراقتىكى خادىملىرىنىڭ بىخەتەرلىكىگە كاپالەتلىك قىلىدۇ.

جافال تۈركىيەنىڭ ئىراقنىڭ شىمالىي قىسمىغا ئەسكەر كىرگۈزگەنلىكى توغرىسىدا جۇڭگو تەرەپ بىلەن پىكىرلەشتى، ھەمدە بۇنى ئىراقنىڭ ئىگىلىك ھوقۇقىغا تاجاۋۇز قىلغانلىق، دەپ ئەيىبلىدى. ئۇ جۇڭگو تەرەپنىڭ ب د ت خەۋپسىزلىك كېڭىشى يىغىنىدا ئىراقنى قوللاپ قۇۋۋەتلەپ، تۈركىيەنىڭ دەرھال ئەسكەر چېكىندۈرۈشىنى ئىلگىرى سۈرۈشنى ئۈمىد قىلدى.

     ۋاڭيى مۇنداق دېدى: ئىراقنىڭ ئىگىلىك ھوقۇقى بىلەن زېمىن پۈتۈنلۈكى چوقۇم ھۆرمەت ۋە قوغداشقا ئىگە بولۇشى كېرەك، ھەرقانداق تېررورىزىمغا قارشى ھەرىكەت خەلقئارا قانۇن ئاساسىدا ئېلىپ بېرىلىشى، خەۋپسىزلىك كېڭىشىنىڭ مۇناسىۋەتلىك قارارىغا بويسۇنۇشى كېرەك، بولۇپمۇ مۇناسىۋەتلىك دۆلەتنىڭ ماقۇللۇقىنى ئېلىشى كېرەك. بۇ بۇ جەھەتتە ئىراقنىڭ مەيدانىنى قوغدايمىز.