ئامېرىكا «ۋاشىنگىتون كۈندىلىك پوچتا گېزىتى» نىڭ 17-چېسلا خەۋەر قىلىشىچە، ئامېرىكا ئوكلاخوما شىتاتى ئوكلخوما شەھىرىدىكى بىر ساقچى 10-چىسلا سوتلاندى، زاسداتىللار ئۆمىكى ئۇنى ساقچىلىق ۋەزىپە ئۆتەش جەريانىدا باسقۇنچىلىق قىلىش ۋە جىنسىي زوراۋانلىق قىلىش قاتارلىق جىنايەتلەرنى سادىر قىلغان دەپ قاراپ، 263 يىللىق قاماق جازاسىغا ھۆكۈم قىلدى.

          ئامېرىكا سىملىق تېلېۋىزىيە ئىستانسىسى ئاخبارات تور بېكىتىنىڭ خەۋەر قىلىشىچە، سەككىز ئەر ۋە تۆت ئايالدىن تەشكىل تاپقان، جەمئىي 12 نەپەر ئاق تەنلىك زاسداتىل تۆت كۈن جەريانىدا 40 نەچچە سائەت كېڭىشىش ئارقىلىق، 10-چىسلا كېچىدە، بۇ يىل 29 ياشقا كىرگەن، ئوكلاخوما شەھىرىنىڭ ساقچىسى دانىيېل خولتىزكىلاۋ (Daniel Holtzclaw) نى جىنسىي زوراۋانلىق، باسقۇنچىلىق قاتارلىقلارنى سادىر قىلغان دەپ قارىغان ۋە جەمئىي 36 خىل ئەيىبلەشنامىنى ئوتتۇرىغا قويغان، يەنى يۇقارقى ئىككى جىنايەتتىن باشقا يەنە ئوغۇرلۇق جىنايەتچىسى، باشقىلارنىڭ ئىزىغا چۈشۈش، پەسكەشلىك قىلىش قاتارلىق جىنايەتلەرمۇ بار، بۇ 36 خىل جىنايەتنىڭ 18 ى بېكىتىلىپ بولدى.

         جازا ھۆكۈمى ئېلان قىلىنىدىغان ۋاقىتتا، دانىيېل خولتىزكىلاۋ جىنايەتچى ئورنىدا ئولتۇرۇپ يىغلاپ كەتتى. ئۇ ئۆتكۈزگەن تۆت تۈرلۈك بىرىنچى دەرىجىلىك باسقۇنچىلىق جىنايىتىنىڭ ھەر بىرىگە 30 يىلدىن قاماق جازاسى بېرىلدى، بۇنىڭ ئۆزىلا ئۇنىڭ كېيىنكى ئۆمرىنى تۈرمە ئىچىدە ئۆتكۈزۈشىگە يېتىپ ئاشىدۇ. ئۇنىڭ جىنايىتىگە ئاساسەن، زاسداتىللار ئۆمىكى ئۇنىڭغا 263 يىللىق قاماق جازاسى بېرىشنى تەۋسىيە قىلغان. سوتچى كېلەر ئايدا دانىيېل خولتىزكىلاۋغا ھۆكۈم ئېلان قىلىدىكەن.

        تەپتىش مەھكىمىسىنىڭ قارىشىچە، دانىيېل خولتىزكىلاۋ ئوكلاخوما شىتاتىدىكى ئەڭ نامرات رايونلاردا قىز-ئاياللارنىڭ پىيىگە چۈشۈپ يۈرگەن، ئۇ يەنە ۋاقىتلىق تەكشۈرۈش جەريانىدا ئۆزىنىڭ ساقچىلىق گىربى ۋە فورمىسىدىن پايدىلىنىپ، زىيانكەشلىككە ئۇچرىغۇچىلارنى ئاختۇرغان ۋە جىنسىي پاراكەندىچىلىك قىلغان، ئۇ يەنە زىيانكەشلىككە ئۇچرىغۇچىلارنى قولغا ئالماسلىققا ۋەدە بېرىش قاتارلىق شەكىللەر بىلەن، قىز-ئاياللارنىڭ قارشىلىق قىلىشىغا تاقابىل تۇرغان.

       مەلۇم بىر دەۋاگەر سوت جەريانىدا ئىسپات سۆزى قىلىپ مۇنداق دېدى:«مەن ماڭا ھېچ قانداق ئادەم ئىشەنمەيدۇ، دەپ قارايمەن، چۈنكى مەن بولسام بىر قارا تەنلىك قىز.» ئەمەلىيەتتە، بىر قىسىم زىيانكەشلىككە ئۇچرىغۇچىلارنىڭ زەھەر چېكىش ياكى پاھىشىلىك قىلىش قاتارلىق تارىخى بولغان، شۇڭلاشقا ئۇلارنىڭ كۆپىنچىسى ساقچىغا دېلو مەلۇم قىلىشقا جۈرئەت قىلالمىغان.

      دانىيېل خولتىزكىلاۋ 2014-يىلى ئەيىبلىنىپ ۋەزىپىسىدىن ھەيدەلدى. مەزكۇر دېلو يەنە ئىچكى قىسىمدا تەكشۈرۈشكە سەۋەب بولدى، دانىيېل خولتىزكىلاۋنىڭ سابىق باشلىقى ۋىلىيام سىتتىي (William Citty) بۇنىڭغا قارىتا مۇنداق دېدى:«بۇ مەن ساقچىلىق قىلغان 37 يىلدىن بۇيان ئۇچراتقان، ساقچىلارنىڭ ھوقۇقىدىن قالايمىقان پايدىلىنىشىغا دائىر ئەڭ چوڭ بىر دېلو ھېسابلىنىدۇ.»

     ئامېرىكا بىرلەشمە ئاگېنتلىقى 10-چىسلا مۇنۇلارنى بىلدۈردى، دانىيېل خولتىزكىلاۋغا بولغان ئەيىبلەش، پۇقرالار ئارىسىدا ساقچىلارنىڭ جىنسىي پاراكەنچىلىك قىلىش دېلوسىغا بولغان دىققىتىنى قايتا قوزغاتتى. بىر قىسىم ساقچى ئىدارىلىرىنىڭ بۇنداق دېلولار ئۈستىدە تەكشۈرۈش ئېلىپ بېرىۋاتقىنىغا بىر قانچە يىل بولدى. يېقىندا ئېلىپ بېرىلغان بىر تەكشۈرۈش نەتىجىسىدىن ئايان بولۇشىچە، ئۆتكەن ئالتە يىل ئىچىدە پۈتۈن ئامېرىكىدىكى 41 شىتاتتا 1000 دىن ئارتۇق قانۇن ئىجرا قىلغۇچى خادىملار جىنسىي پاراكەندىچىلىك، ئوغۇرلۇق قىلىش ۋە ۋەزىپە ئۆتەش جەريانىدا مۇناسىۋەت قىلىش قاتارلىق قىلمىشلار سەۋەبىدىن ۋەزىپىسىدىن ئايرىلغان. كۆپ قىسىم زىيانكەشلىككە ئۇچرىغۇچىلار ساقچىلارنىڭ ئۆچ ئېلىشىدىن قورقۇپ، دەردىنى ئىچىگە يۈتۈشكە مەجبۇر بولغان. بىر قىسىم ساقچىلار بىلەن سوتچىلارنىڭ تىل بىرىكتۈرىۋېلىشىمۇ بۇنداق دېلولارنىڭ كۆپىيىشىگە سەۋەب بولغان.