سۈرەتتە كولومبىيە مېدېللىندىكى بىر پارتلىتىۋېتىلگەن سەرگەردانلارنى يىغىۋېلىش ئورنى

ئې ف ئې    ئاگېنتلىقىنىڭ 3-ئاي 23- كۈنىدىكى تېلېگراممىسىغا ئاساسلانغاندا، كولۇمبىيىنىڭ شەرقىي شىمالى قىسمىدىكى شەھەر مېدېللىندىكى بىر سەرگەردانلارنى يىغىۋېلىش ئورنىدا پارتلىتىش ۋەقەسى يۈز بەرگەن بولۇپ، تۆت ئادەمنىڭ ئۆلۈشى ۋە 12 ئادەمنىڭ يارىلىنىشىنى كەلتۈرۈپ چىقارغان. مېدېللىن شەھىرىنىڭ شەھەر باشلىقىنىڭ دېيىشىچە، بۇ قېتىملىق پارتلىتىش ۋەقەسىنىڭ ئاساسلىق پىلانلىغۇچىلىرى بولسا يەرلىك زەھەر سودىگەرلىرى گۇرۇھى بولۇپ، ئۇلار مەزكۇر شەھەرنىڭ سەرگەردانلارغا ياردەم بېرىپ جەمئىيەتكە قايتىش لايىھىسىگە قارشى تۇرۇش ئۈچۈن بۇ قېتىملىق پارتلىتىش ۋەقەسىنى پىلانلىغان. نەچچە ئاي ئىلگىرى مېدېللىن شەھەرلىك ھۆكۈمەت سەرگەردانلارنىڭ جەمئىيەتكە قايتىش لايىھىسىنى ئېلان قىلغان بولۇپ، كوچىلاردىكى سەرگەردانلارنى تۇرالغۇ بىلەن تەمىنلەپ، يەنە زەھەرگە خۇمار بولۇپ قالغان سەرگەردانلارنىڭ زەھەر تاشلىشىغا ياردەم بەرگەن، ئۇلارغا پسىخىكىلىق ۋە فىزىكىلىق داۋالاش ئېلىپ بارغان.

تەكشۈرۈشكە ئاساسلانغاندا، بىر سەرگەردان پارتىلاتقۇچنى ئېلىپ مەزكۇر يىغىۋېلىش ئورنىغا كىرگەن، پارتىلاتقۇچ يانفون ئارقىلىق پارتىلىتىلغان، پارتىلاتقۇچنى ئېلىپ كىرگۈچى نەق مەيداندا قازا قىلغان، قازا قىلغان باشقا ئۈچ ئادەمنىڭ ھەممىسى مۇشۇ جايدا تۇرىدىغان سەرگەردانلار ئىكەن. يارىلانغان 12 ئادەمنىڭ ئىككىسى ساقچى بولۇپ، پارتىلاش يۈز بەرگەندە بىر قىسىم سەرگەردانلار خاتا ھالدا بۇ ئىشنى قوراللىق قىسىمدىكىلەر قىلدى دەپ قاراپ، يىغىۋېلىش ئورنىدىكى ساقچىلار بىلەن توقۇنۇشۇپ قالغان، ساقچىلار يارىلانغان.
مېدېللىن شەھىرىدە 250 تۈمەن ئاھالە بار بولۇپ، كولۇمبىيىدىكى ئىككىنچى چوڭ شەھەر، بۇ يەر بولسا زەھەر سودىسى قىلىدىغان ۋە زەھەر سودىگەرلىرى گۇرۇھىنىڭ زوراۋانلىق ھەرىكەتلىرى دائىم يۈز بېرىدىغان جاي.

مەنبەسى جۇڭگو ئاخبارات تورى