ئەنگلىيە رادىيو شىركىتى (BBC) تاراتقۇسىنىڭ 16-دېكابىردىكى خەۋىرىدە دېيىلىشچە، ئامېرىكا ھۆكۈمىتى شۇ كۈنى تەيۋەنگە 1 مىليارد 831 مىليون دوللار قىممىتىدىكى قورال-ياراغ سېتىپ بېرىدىغانلىقىنى جاكارلىغان. ھەمدە دۆلەت پارلامېنتىغا مۇناسىۋەتلىك رەسمىيەتلەرنى قاراپ چىقىش توغرىسىدا ئۇقتۇرۇش قىلغان. ئامېرىكىنىڭ بۇ قېتىم تەيۋەنگە سېتىپ بەرمەكچى بولغىنى «پىلى» ناملىق قوغدىغۇچى ھەربىي پاراخوتى، سۇ ۋە قۇرۇقلۇقتا تەڭ جەڭ قىلالايدىغان تۇيۇقسىز ھۇجۇم قىلغۇچى ھەربىي ماشىنا قاتارلىقلارنى ئۆز ئىچىگە ئالىدىكەن. شۇنىڭ بىلەن بىرگە، ئامېرىكا ئاقساراي مۇنۇلارنى بىلدۈرۈپ، ئامېرىكىنىڭ ئۇزاق مۇددەتتىن بۇيان چىڭ تۇرۇپ كەلگەن «بىر جۇڭگو» پىرىنسىپى يەنىلا ئۆزگەرمەيدۇ، دېگەن. بۇ تۆت يىلدىن بۇيانقى ئامېرىكىنىڭ تۇنجى قېتىم تەيۋەنگە قورال سېتىپ بېرىشى بولۇپ ھېسابلىنىدۇ.    بۇنىڭغا قارتا، تەيۋەننىڭ «زۇڭتۇڭ مەھكىمىسى» باياناتچىسى چىن يېشىن مۇنۇلارنى بىلدۈرۈپ: ما يىڭجۇ تەيۋەننىڭ «زۇڭتۇڭى» بولغان مەزگىلدە ھەر يىللىق ھەربىي قورال-ياراغ سېتىۋېلىش سوممىسى 2 مىليارد 510 مىليون دوللارغا يېتىپ، چىن شۈبىيەن «زۇڭتۇڭ» بولغان مەزگىلىدىكى ھەر يىللىق ئوتتۇرىچە سېتىۋېلىش سوممىسى 1 مىليارد 50 مىليون ۋە لى دېڭخۇي «زۇڭتۇڭ» ۋاقتىدىكى ھەر يىللىق ئوتتۇرىچە سېتىۋېلىش سوممىسى 1 مىليارد 350 مىليون دوللاردىن زور دەرىجىدە ئېشىپ كەتتى، دېدى. تەيۋەن «دۆلەت مۇداپىئە مىنىستىرلىكى»نىڭ مۇنۇلارنى بىلدۈرۈشىچە، بۇ ما يىڭجۇ ۋەزىپىگە ئولتۇرغاندىن بۇيانقى تۆتىنچى قېتىملىقى، ئوباما ھۆكۈمىتىنىڭ تەيۋەنگە ئۈچىنچى قېتىملىق زور مىقداردا قورال-ياراغ سېتىپ بېرىشى ئىكەن. بۇ قارارنامە بىر ئايدىن كېيىن رەسمىي ئىجرا قىلىنىدىكەن، تەيۋەن «دۆلەت مۇداپىيە مىنىستىرلىكى» ئامېرىكا تەرەپنىڭ بۇ قارارىغا رەھمىتىنى بىلدۈردى.

      خەۋەردە كۆرستىلىشچە، تەيۋەن ئىزچىل ئامېرىكىنىڭ سۇ ئاستى پاراخوتى ۋە F-16 بەلگىلىك كۈرەشچى ئايروپىلانىغا ئېرىشىشنى ئۈمىد قىلىپ كەلگەن، لېكىن بۇ قېتىملىق قورال سېتىۋېلىشتا بۇ ئارزۇسى ئىشقا ئاشمىغان. جۇڭگو ھۆكۈمىتىنىڭ غەزىپىنى قوزغاپ قويۇشتىن ئەنسىرىگەچكە، ئوباما ھۆكۈمىتى بۇ قېتىم تەيۋەنگە سېتىپ بېرىدىغان قورال-ياراغ تىزىملىكىگە تېخىمۇ زامانىۋىلاشقان يېڭى تىپتىكى F-16

 بەلگىلىك كۈرەشچى ئايروپىلاننى كىرگۈزمىگەن. ئىگىلىنىشچە، بۇ قېتىم تەيۋەنگە سېتىپ بېرىدىغىنى ئىككى دانە ھەربىيلىكتىن چېكىنگەن قوغدىغۇچى ھەربىي پاراخوت ئىكەن.

     ئامېرىكىنىڭ تەيۋەنگە قورال سېتىپ بېرىش ئىشىغا قارتا، جۇڭگو دىپلوماتىيە مىنىستىرلىكىنىڭ باياناتچىسى خوڭ لېي 15-دېكابىر مۇخبىرلارنى كۈتۈۋېلىش يىغىنىدا مۇنداق دېگەن: جۇڭگو تەرەپ ئامېرىكىنىڭ تەيۋەنگە قورال-ياراغ سېتىپ بېرىش ئىشىغا قەتئىي قارشى تۇرىدۇ، جۇڭگونىڭ بۇ مەيدانى مۇستەھكەم، ئېنىق بولۇپ، مەڭگۈ ئۆزگەرمەيدۇ. مەن يەنە شۇنى تەكىتلەيمەنكى ئامېرىكىنىڭ تەيۋەنگە قورال سېتىپ بېرىشى جۇڭگو بىلەن ئامېرىكا تۈزگەن ئۈچ بىرلەشمە باياناتنىڭ مەزمۇنىغا ئېغىر دەرىجىدە خىلاپلىق قىلغانلىق، جۇڭگونىڭ ئىچكى ئىشىغا ئارىلاشقانلىق بولۇپ، بۇ ئىككى قىرغاق مۇناسىۋىتى ۋە جۇڭگو ئامېرىكا مۇناسىۋىتىگە ئېغىر دەرىجىدە تەسىر يەتكۈزىدۇ. جۇڭگو تەرەپ ئامېرىكا تەرەپنىڭ تەيۋەنگە قورال سېتىپ بېرىشنىڭ ئاقىۋىتىنىڭ يامانلىقىنى تونۇپ يېتىشىنى، ۋەدىسىگە ئەمەل قىلىپ، تەيۋەنگە قورال سېتىپ بېرىشنى توختىتىشىنى، جۇڭگو ئامېرىكا مۇناسىۋىتىنىڭ چوڭ ۋەزىيىتى ۋە ئىككى قىرغاق مۇناسىۋىتىنىڭ ساغلام تەرەققىي قىلىشىغا پايدىلىق كۆپرەك ئىشلارنى قىلىشىنى قاتتىق مۇراجىئەت قىلىدۇ.