تۈنۈگۈن يەنى 12-ئاينىڭ 13-كۈنى ئاخىرلاشقان قازاقىستان ياش-ئۆسمۈرلەر خەلقئارالىق بوكس مۇسابىقىسىدە، شىنجاڭ بوكس كوماندىسىدىكى كىچىك پالۋانلار قەيسەرلىك بىلەن ئېلىشىپ، بىر كۈمۈش مېدال ۋە بىر مىس مېدالنى قولغا كەلتۈردى.

      شىنجاڭ كوماندىسى ماھىرى ئابدۇرىشىت 91 كېلوگراملىقلار مۇسابىقىسى بىرىنجى مەيدانىدا روسىيەلىك ماھىر فىدوروۋ بىلەن مەيدانغا چۈشتى ھەمدە ئۈچىنجى ئايلانمىغا بارغاندا قارشى تەرەپنى يېقىتتى. ئىككىنجى مەيداندا قازاقىستانلىق ماھىر سادىكباي بىلەن مەيدانغا چۈشۈپ، ئىككىنجى ئايلانمىدا قارشى تەرەپنى ئۇرۇپ بۇرنىدىن قان چىقىرىۋەتتى، قان توختىمىغانلىقى ئۈچۈن رېپىر مۇسابىقىنى ئاخىرلاشتۇردى، ئۈچىنجى مەيداندا ئۆزبېكىستانلىق ماھىرغا ئۇتتۇرۇپ قويۇپ، ئىككىنجىلىككە ئېرىشتى ھەمدە كۈمۈش مېدالنى قولغا كەلتۈردى.

     شىنجاڭ كوماندىسىنىڭ يەنە بىر ماھىرى مەردان مەمەت 81 كېلوگراملىقلار مۇسابىقىسى بىرىنجى مەيدانىدا روسىيەلىك ماھىر سىكىراكوۋ بىلەن مەيدانغا چۈشتى، ھەمدە ئىككىنجى ئايلانمىدىلا قارشى تەرەپنى مەغلۇپ قىلدى. ئىككىنجى مەيداندا قازاققىستانلىق ماھىر شولتۇكوۋ بىلەن مەيدانغا چۈشتى ھەمدە قارشى تەرەپنى مەغلۇپ قىلدى، ئۈچىنجى مەيداندا ئۆزبېكىستانلىق ماھىر تۇرسۇنوۋغا ئۇتتۇرۇپ قويۇپ، مىس مېدالغا ئېرىشتى.