بۇ يىل ئاپتونوم رايونىمىز قۇرۇلغىنىغا 60 يىل بولدى، 60 يىلدىكى ئالەمشۇمۇل ئۆزگىرىشلەر ۋە شانلىق نەتىجىلەرنى ئەسلىسەك، قانۇن ئىدارە قىلىش قۇرۇلۇشى ئۇنىڭ كەم بولسا بولمايدىغان مۇھىم تەركىبىي قىسمىدۇر. 20 – ئەسىرنىڭ 50 – يىللىرىدا تۇنجى تۈركۈمدىكى ئادۋوكاتلار بارلىققا كەلدى   63 ياشقا كىرگەن ساۋ خۇڭ شىنجاڭ ‹‹بېيفاڭ›› ئادۋوكاتلىق ئورنىنىڭ مۇدىرى، شىنجاڭ جىنايى ئىشلار قانۇنى ئىلمىي جەمئىيىتىنىڭ مۇئاۋىن باشلىقى، جۇڭگو خەلق ئۇنىۋېرسىتېتىنىڭ تەكلىپلىك پىروفېسسورى. ئۇ 1980 – يىلىدىن باشلاپ قانۇن خىزمىتى بىلەن شۇغۇللانغان، مەملىكەتلىك ئادۋوكاتلار جەمئىيىتىنىڭ كېڭەش ئەزالىقىغا سايلانغان، شىنجاڭ ئادۋوكاتلار جەمئىيىتىنىڭ مۇئاۋىن باشلىقى، دائىمىي مۇئاۋىن باشلىقى بولغان، ھازىر ئۈرۈمچى شەھەرلىك سىياسي – قانۇن كومىتېتىنىڭ مەسلىھەتچىسى، ئاپتونوم رايونلۇق خەلق ھۆكۈمىتى مەسلىھەتچىلەر كومىتېتىنىڭ ئەزاسى. 10 – نويابىر ساۋ خۇڭ بىلەن ئاپتونوم رايونىمىزنىڭ قانۇن ئىدارە قىلىش قۇرۇلۇش توغرىسىدا سۆھبەتلەشتۇق.

  1954 – يىلى 9 – ئايدا يېڭى جۇڭگودىكى تۇنجى ‹‹ئاساسىي قانۇن›› ۋە ‹‹خەلق سوت مەھكىمىسىنىڭ تەشكىلىي قانۇنى›› ئېلان قىلىنىپ، جىنايى ئىشلار جاۋابكارىنىڭ ئاقلىنىش ھوقۇقى قانۇندا مۇئەييەنلەشتۈرۈلۈپ، ئادۋوكاتلارنىڭ قانۇن بويىچە دەۋاغا قاتنىشىش سالاھىيىتى ۋە ئورنى بېكىتىلدى.

  1955 – يىلى 3 – ئايدا شىنجاڭدا 2 – قېتىملىق ئەدلىيە يىغىنى ئېچىلىپ، ئۈرۈمچىدە ئادۋوكاتلىق تۈزۈمىنى سىناق تەرىقىسىدە يولغا قويۇش قارار قىلىندى. ئارقىدىن ئۆلكىلىك يۇقىرى خەلق سوت مەھكىمىسى ئۈرۈمچى شەھەرلىك خەلق سوت مەھكىمىسىگە ئىككى ئاقلىغۇچى قويۇپ، ئادۋوكاتلىق كەسپىنى سىناق تەرىقىسىدە بېجىرىشنى قارار قىلدى.

  1956 – يىلى 10 – ئايدا ئۈرۈمچى شەھەرلىك قانۇندىن مەسلىھەت بېرىش ئورنى قۇرۇلۇپ، شىنجاڭدا تارىختىن بۇيان تۇنجى ئادۋوكاتلىق خىزمەت ئاپپاراتى بارلىققا كەلدى.

  1957 – يىلى 11 – ئايدىكى ئىستاتىستىكىسىغا ئاساسلانغاندا، ئەينى ۋاقىتتا ئەدلىيە نازارىتى تەستىقلىغان مەخسۇس ئادۋوكاتتىن 22سى، پىراكتىكانت ئادۋوكاتتىن سەككىزى، قوشۇمچە ۋەزىپىدىكى ئادۋوكاتتىن يەتتىسى، جەمئىي 37 ئادۋوكات بولۇپ، بۇنىڭ ئىچىدە ئاز سانلىق مىللەت ئادۋوكات 14 ئىكەن.

  ‹‹لېكىن 1957 – يىلىدىن 1976 – يىلىغىچە، شىنجاڭدىمۇ مەملىكەتنىڭ باشقا جايلىرىغا ئوخشاش 20 يىل <ئادۋوكاتلىق تۈزۈمى بولماسلىق، ئادۋوكاتلىق خىزمىتى بولماسلىق> ئەھۋالى كۆرۈلدى›› دېدى ساۋ خۇڭ ئەسلەپ.

  1979 – يىلى ئادۋوكاتلىق تۈزۈمى ئەسلىگە كەلدى

  1978 – يىلىنىڭ ئاخىرى تارىخىي بۇرۇلۇش خاراكتېرلىك ئەھمىيەتكە ئىگە ج ك پ 11 – نۆۋەتلىك مەركىزىي كومىتېتىنىڭ 3 – ئومۇمىي يىغىنى ئېچىلدى. 1979 – يىلى 7 – ئايدا ‹‹جۇڭخۇا خەلق جۇمھۇرىيىتىنىڭ جىنايى ئىشلار قانۇنى›› ۋە ‹‹جۇڭخۇا خەلق جۇمھۇرىيىتىنىڭ جىنايى ئىشلار دەۋا قانۇنى›› ئېلان قىلىندى. ‹‹شىنجاڭ ئادۋوكاتلار تەرەققىيات دوكلاتى››دا خاتىرىلىنىشىچە، 1979 – يىل 9 – ئاينىڭ 9 – كۈنى بىلەن 10 – ئاينىڭ 28 – كۈنى مەركەز ۋە گوۋۇيۈەن ئىلگىرى – كېيىن بولۇپ ئۇقتۇرۇش تارقىتىپ، جايلاردىن ئادۋوكاتلىق تۈزۈمىنى تېز ئەسلىگە كەلتۈرۈشنى تەلەپ قىلغان. ئارقىدىنلا، ئاپتونوم رايونلۇق پارتكوم ۋە خەلق ھۆكۈمىتى ئاپتونوم رايونىمىزدىكى جايلاردىن مۇددەت ۋە تۈركۈمگە بۆلۈپ قانۇندىن مەسلىھەت بېرىش ئورنى قۇرۇپ، ئادۋوكاتلىق خىزمىتىنى تېزدىن قانات يايدۇرۇشنى تەلەپ قىلغان.

  30 نەچچە يىلدا ئادۋوكاتلار 36 ھەسسە كۆپەيدى

  ئۈرۈمچى شەھىرىدە قانۇندىن مەسلىھەت بېرىش ئورنى قۇرۇلۇش بىلەن بىللە، ئاپتونوم رايونىمىزدىكى بىر نەچچە ۋىلايەت، ئوبلاست، شەھەردىمۇ قانۇندىن مەسلىھەت بېرىش ئورنى قۇرۇلۇپ، بىر تۈركۈم ئادۋوكات ۋە قوشۇمچە ۋەزىپىدىكى ئادۋوكات سەپلەندى.

  1980 – يىلى شىنجاڭدىكى تۇنجى ئادۋوكاتلىق ئورنى شىنجاڭ ئادۋوكاتلىق ئورنى تەسىس قىلىندى. شۇ يىلى شىنجاڭ ئادۋوكاتلار جەمئىيىتى ئەسلىگە كەلتۈرۈلدى، ئادۋوكاتلار جەمئىيىتى ئەسلىگە كەلتۈرۈلگەندە ئادۋوكاتلىق ئىش ئورنىدىن 71ى، ئادۋوكاتلاردىن 204ى بار ئىدى. 2014 – يىلى 12 – ئاينىڭ ئاخىرىغىچە، ئاپتونوم رايون بويىچە ئادۋوكاتلار جەمئىيىتىنىڭ كوللېكتىپ ئەزاسى 435كە، شەخسىي ئەزاسى 4200گە، بۇنىڭ ئىچىدە ئاز سانلىق مىللەت ئادۋوكات 947گە يەتتى.

  2008 – يىلى 8 – ئاۋغۇست شىنجاڭدىكى تۇنجى شەخسى ئادۋوكاتلىق ئورنى ‹‹شىنجاڭ <خۇاڭبو> ئادۋوكاتلىق ئورنى›› ئاپتونوم رايونلۇق ئەدلىيە نازارىتىنىڭ تەستىقلىشى بىلەن قۇرۇلۇپ، شىنجاڭنىڭ ئادۋوكاتلىق كەسپىدە يېڭى شەكىل بارلىققا كەلدى.

  ‹‹ھازىر شىنجاڭدا ئادۋوكاتلىق بىلەن شۇغۇللىنىدىغانلار 30 يىل بۇرۇنقىدىن 36 ھەسسە ئاشتى. 1982 – يىلى ئاپتونوم رايونىمىزدا ھەر 111 مىڭ كىشىگە بىردىن ئادۋوكات توغرا كېلەتتى، 2012 – يىلى ھەر 6800 كىشىگە بىردىن ئادۋوكات توغرا كېلىدىغان بولدى. قانۇن خىزمىتى ئاپپاراتلىرى ۋە كەسپى ئادۋوكاتلار تەڭرىتاغنىڭ جەنۇبى ۋە شىمالىنى قاپلىدى›› دېدى ساۋ خۇڭ. قانۇن ئىدارە قىلىش قۇرۇلۇشى يېڭى دەۋرگە قەدەم قويدى

  لى شىنيۈەن، 54 ياش، 1982 – يىلى شىنجاڭ سىياسىي – قانۇن كادىرلار مەكتىپىنى پۈتكۈزگەندىن تارتىپ ھازىرغىچە ئۈرۈمچى شەھىرى سايباغ رايونلۇق خەلق سوت مەھكىمىسىدە خىزمەت قىلىۋاتىدۇ. ‹‹ئەينى ۋاقىتتا قانۇن يۈرگۈزۈش تارماقلىرىدىكى خىزمەتچىلەرنىڭ كۆپىنچىسى ئورگان، كارخانا، كەسپىي ئورۇنلاردىن يۆتكەپ كېلىنگەن، كەسپىي سەۋىيەسى يۇقىرى ئەمەس ئىدى. كېيىن سودىيە، پىروكۇرورلار بىر تۇتاش ئىمتىھان بىلەن قوبۇل قىلىنىدىغان بولدى، كېيىن يەنە كىرىش بوسۇغىسى ئېگىزلىتىلىپ، ئاپتونوم رايون بىر تۇتاش ئىمتىھان ئالىدىغان بولدى. ھازىر قانۇن يۈرگۈزۈش خادىملىرى دۆلەتنىڭ بىر تۇتاش ئىمتىھانى ئارقىلىق تاللىنىدۇ، قانۇن كەسپى بىلەن شۇغۇللىنىدىغانلار تەدرىجىي كەسىپلىشىشكە يۈزلەندى›› دېدى لى شىنيۈەن 12 – نويابىر.

  لى شىنيۈەننىڭ قارىشىچە، قانۇن يۈرگۈزۈش خادىملىرىنىڭ كەسپىي سەۋىيەسى بارغانسېرى ئاشقاندىن باشقا، ئاپتونوم رايونىمىزدا قانۇن ئىدارە قىلىش قۇرۇلۇشىمۇ بارغانسېرى مۇكەممەللەشكەن. 2010 – يىلى 5 – ئايدا مەركەزنىڭ 1 – قېتىملىق شىنجاڭ خىزمىتى سۆھبەت يىغىنى ئېچىلىپ، ئاپتونوم رايونىمىز تېز تەرەققىيات پۇرسىتىنى كۈتۈۋالدى، شۇنىڭغا ئەگىشىپ ئاپتونوم رايونىمىزنىڭ قانۇن ئىدارە قىلىش قۇرۇلۇشىمۇ ‹‹تېز سۈرئەتلىك يول››غا قەدەم قويدى. يەرلىك قائىدە – نىزاملارنى شىنجاڭنىڭ ئەمەلىيىتىگە يەنىمۇ ماسلاشتۇرۇش ئۈچۈن، ئاپتونوم رايون 2010 – يىلىدىن 2014 – يىلىنىڭ ئاخىرىغىچە يەرلىك قائىدە – نىزامدىن 87نى، ھۆكۈمەت بەلگىلىمىسىدىن 112نى تەرتىپكە سالدى.

  2010 – يىلى 23 – نويابىردىن 25 – نويابىرغىچە بولغان ئۈچ كۈن شىنجاڭنىڭ قانۇن ئىدارە قىلىش قۇرۇلۇشى تارىخىدىكى ئەستە ساقلاشقا ئەرزىيدىغان ئۈچ كۈن بولدى. ج ك پ ئاپتونوم رايونلۇق 8 – نۆۋەتلىك كومىتېتىنىڭ 8 – ئومۇمىي (كېڭەيتىلگەن) يىغىنى ئۈرۈمچىدە ئېچىلىپ، ‹‹ئاپتونوم رايونلۇق پارتكومنىڭ شىنجاڭنى قانۇن بويىچە ئومۇميۈزلۈك ئىدارە قىلىش، قۇرۇشنى ئىلگىرى سۈرۈش توغرىسىدىكى پىكرى›› قاراپ چىقىلىپ ماقۇللاندى. ‹‹ئاپتونوم رايونىمىزنىڭ قانۇن ئىدارە قىلىش قۇرۇلۇشى يەنە بىر يېڭى دەۋرگە يول ئالدى››، دېدى لى شىنيۈەن خۇشاللىق بىلەن.