سىشى لوڭشەن تېغى بۆلىكى G329 دۆلەت يولىدا كىشىنى چۆچۈتىدىغان ۋەقە يۈز بەردى. ئانا ئۆزىنىڭ ئىككى بالىسىنى ماشىنىلار مېڭىۋاتقان يولغا تاشلاپ قويدى، ئاقىۋەتتە 14 ئايلىق بولغان بالىسىنى ماشىنا بېسىۋېتىپ نەق مەيداندا قازا قىلدى، ئالتە ياشلىق بالىسىنى بەختكە يارىشا يولدىكى كىشىلەر قۇتۇلدۇرۇۋالدى.

     ئەينى ۋاقىتتا بېكەتتە نۇرغۇن كىشىلەر ماشىنا ساقلاۋاتقان بولۇپ، ئۇلارنىڭ دېيشىچە بۇ ئايال بالىسىنى ئىككى قېتىم يولغا تاشلاپ قويغان. بىرىنچى قېتىم بىر كىچىك پىكاپنىڭ ئالدىغا تاشلاپ قويغان بولسىمۇ، ئەمما پىكاپ ئەگىپ ئۆتۈپ كەتكەچكە بالىلار قۇتۇلۇپ قالغان. ئىككىنچى قېتىم ئايال بالىسىنى كۆتۈرۈپ يىراقتىن كېلىۋاتقان چوڭ يۈك ماشىنىسنىڭ ئالدىغا تاشلاپ قويغان، بۇ قېتىم يۈك ماشىنىسى ئۆزىنى ئېلىپ قاچالمىغان. بۇ ئايال بۇنىڭلىق بىلەن بولدى قىلماي چوڭ بالىسىنىمۇ ماشىنىلارنىڭ ئارىسىغا ئىتتىرىپ قويماقچى بولغان. بۇ ۋاقىتتا ساقچىلار يېتىپ كېلىپ ئايالنى ئورىۋالغان، بىر خوجايىن بالىنى كۆتۈرۈۋالغان ھەمدە كەينىدىن ساقچىخانىغا ئاپىرىپ قويغان.

      بۇ چوڭ يۈك ماشىنىسىنى ھەيدىگىنى نىڭبودىكى بىر يۈك ترانسپورتى شىركىتىدە ئىشلەيدىغان چى ئۇستاز بولۇپ، 10 نەچچە يىلدىن بۇيان ھادىسە كۆرۈلۈپ باقمىغانىكەن.

     شوپۇر مۇنداق دېگەن:« ئۇ كۈنى مەن سىشىدىن نىڭبوغا قايتىۋاتقان بولۇپ، ئەسلىدە ئوتتۇرىدىكى يولدا مېڭىۋاتقانىدىم، بىراق بۇ ئايالنىڭ ئوتتۇرىدا تۇرۇۋالغانلىقىنى كۆرۈپ ئەگىپ ئۆتۈپ كەتمەكچى بولدۇم. كىم بىلسۇن، ماشىنىنى ھەيدەپ ئۆتۈۋاتقىنىمدا بالىسىنى چاقنىڭ ئاستىغا تاشلاپ قويدى».

        شوپۇر ماشىنىدىن چۈشۈپ بالىنىڭ قازا قىلغانلىقىنى كۆرۈپ يۈكۈنۈپ ئولتۇرۇپ قالغان. ئەينى ۋاقىتتا شوپۇر بۇ ئايالغا :«نېمىشقا ماڭا زىيانكەشلىك قىلىسەن» دەپ ۋارقىرىغان، ئەمما ئايالنىڭ چىرايىدا ھېچقانداق ئۆزگىرىش بولمىغان.«ھېلىمۇ ياخشى ئەتراپتىكى كىشىلەر ماڭا گۇۋاھلىق بېرىدىغان بولدى. بۇنى كۆرۈپ بەدەنلىرىم شۈركىنىپ كەتتى، دۇنيادا مۇشۇنداقمۇ رەھىمسىز ئانا بولىدىكەن».