2015-يىلى قىش كىرگەندىن بۇيان، ئۈرۈمچى شەھىرىدە تېمپېراتۇرا مۇقىم بولۇپ، يۇقىرى-تۆۋەنلىك پەرقى ئانچە چوڭ بولمىدى، بۇ، قىش پەسىلىدە قۇرۇلۇش ئېلىپ بېرىشنى قولايلىق شارائىت بىلەن تەمىنلىگەچكە، ئۈرۈمچى مېترو 1-لىنىيەسى نۆۋەتتە چىڭ تۇتۇپ ئېلىپ بېرىلماقتا. 2-دېكابىر مۇخبىرنىڭ ئۈرۈمچى شەھەرلىك مېترو 1-لىنىيەسى 8-قارارلىق قۇرۇلۇشى سەككىز قەۋەت بېكىتىدىن ئىگىلىشىچە، بۇ بېكەتنى قېزىش خىزمىتى نۆۋەتتە پۈتۈنلەي ئاياغلاشقان.    مۇخبىر مېترو سەككىز قەۋەت بېكىتى قۇرۇلۇشى نەق مەيدانىدىن بۇ بېكەتنى قېزىش خىزمىتىنىڭ پۈتۈنلەي ئاياغلاشقانلىقىنى، ئىشچىلارنىڭ تەخمىنەن 28.8 مېتىر چوڭقۇرلۇقتىكى يەر ئاستى 3-قەۋىتىدە قۇرۇلۇش ئېلىپ بېرىۋاتقانلىقىنى، يەر ئاستى 4-قەۋىتىنىڭ ئاساسىي گەۋدىسىنىڭمۇ ئاساسەن تاماملانغانلىقىنى كۆرگەن.

   جۇڭگو تۆمۈريول 4-ئىدارىسى گۇرۇھى چەكلىك شىركىتى ئۈرۈمچى مېترو 1-لىنىيەسىنىڭ 8-قارارلىق قۇرۇلۇش تۈر دىرېكتورى شېن جىنىڭ تونۇشتۇرۇشىچە، ئادەتتە 20-يانۋاردىن باشلاپ قىشلىق قۇرۇلۇش مەزگىلىگە قەدەم قويىدىكەن، تېمپېراتۇرا بىر قەدەر تۆۋەن بولغاندا بېتون قۇيۇش مەشغۇلاتى ئېلىپ بېرىش تەس بولغاچقا، قۇرۇلۇش تەننەرخىمۇ ئېشىپ كېتىدىكەن. قۇرۇلۇش باشلانغاندىن بۇيان، تەننەرخ تەخمىنەن 1 مىليون 650 مىڭ يۈەن ئېشىپ كەتكەن.

   ئىگىلىنىشىچە، سەككىز قەۋەت بېكىتى ئاساسىي گەۋدە قۇرۇلمىسىدا جەمئىي 136 دانە تىك تۈۋرۈك بار بولۇپ، نۆۋەتتە 68 دانىسى قويۇلۇپ بولغان. لېكىن تېمپېراتۇرا تەسىرىدە تۈۋرۈك قويۇش سۈرئىتى ئاستىلاپ قالغان. نورمال تېمپېراتۇرىدا بىر تۈۋرۈكنى قويۇش ئۈچۈن ئۈچ كۈن ئەتراپىدا ۋاقىت كېتىدىكەن، لېكىن قىش پەسلىدە تېمپېراتۇرا تۆۋەن بولغاچقا بىر تۈۋرۈكنى قويۇش ئۈچۈن 10 كۈندىن ئارتۇق ۋاقىت كېتىدىكەن.

   سەككىز قەۋەت بېكىتى مېترو 1-لىنىيەسى بىلەن 3-لىنىيەسى ئۇچرىشىدىغان بېكەت بولۇپ، جەمئىي سەككىز كىرىش-چىقىرىش ئېغىزى تەسىس قىلىنىدىكەن، يەر ئاستى 1-قەۋەت بىلەن 2-قەۋەت خوجىلىق باشقۇرۇش ئورنى، يەر ئاستى 3-قەۋەت بىلەن 4-قەۋەت بېلەت ئىشلىرى ۋە مېترو تىجارىتى ئورنى ئىكەن. سەككىز قەۋەت بېكىتىنىڭ كەڭلىكى تەخمىنەن 22.3 مېتىر، ئومۇمىي ئۇزۇنلۇقى 331 مېتىر كېلىدىغان بولۇپ، ئوچۇق قېزىش بىلەن يېپىق قېزىش بىرلەشتۈرۈلگەن شەكلىدە قۇرۇلۇش ئېلىپ بېرىلغان، بۇنىڭ ئىچىدە يېپىق قېزىلىدىغان قىسمى تەخمىنەن 200 مېتىر، ئوچۇق قېزىلىدىغان قىسمى تەخمىنەن 131 مېتىر ئىكەن.

   بۇ قارارلىق قۇرۇلۇش بىر بېكەت بىر رايون ئارىلىقىدا بولۇپ، ئايرىم ھالدا سەككىز قەۋەت بېكىتى، سەككىز قەۋەتتىن داشىگۇ بېكىتى رايون ئارىلىقىغىچە ئىكەن. بۇنىڭ ئىچىدە رايون ئارا تۇنېل ئۇزۇنلۇقى 1.86 كىلومېتىر بولۇپ، نۆۋەتتە 1.44 كىلومېتىر ئۇزۇنلۇقتىكى تۇنېل ياسىلىپ بولغان.